Watch... ಸಂಗೀತ ಕಾರ್ಯಕ್ರಮದಲ್ಲಿ ಗಾಯಕ ಬೆನ್ನಿ ದಯಾಳ್​ ತಲೆಗೆ ತಗುಲಿದ ಡ್ರೋನ್...​

ಚೆನ್ನೈ: 'ಬಡ್ತಮೀಜ್ ದಿಲ್' ಹಾಡಿನ ಖ್ಯಾತ ಗಾಯಕ ಬೆನ್ನಿ ದಯಾಳ್ ಸಂಗೀತ​ ಕಾರ್ಯಕ್ರಮವೊಂದರಲ್ಲಿ ಹಾಡುತ್ತಿದ್ದ ವೇಳೆ ಡ್ರೋನ್​ ಅವರ ತಲೆಗೆ ತಾಕಿ ಗಾಯಗೊಂಡಿರುವ ಘಟನೆ ನಡೆದಿದೆ. ಮೂಲಗಳ ಪ್ರಕಾರ ನಿನ್ನೆ ಇಲ್ಲಿಯ ವೆಲ್ಲೂರ್​ ಇನ್​ಸ್ಟಿಟ್ಯೂಟ್​ ಆಫ್​ ಟೆಕ್ನಾಲಜಿಯಲ್ಲಿ ಸಂಗೀತ ಕಾರ್ಯಕ್ರಮವನ್ನು ಆಯೋಜನೆ ಮಾಡಲಾಗಿತ್ತು. ವೇದಿಕೆ ಮೇಲೆ ಗಾಯಕ ಬೆನ್ನಿ ದಯಾಳ್​ ನೆರೆದಿದ್ದ ಜನರನ್ನು ರಂಜಿಸುತ್ತ ಊರ್ವಸಿ ಊರ್ವಸಿ ಎಂಬ ಹಾಡನ್ನು ಹಾಡುತ್ತಿದ್ದರು. ಇನ್ನು ಅವರ ಗಾಯನದ ದೃಶ್ಯವನ್ನು ಡ್ರೋನ್​ ಮೂಲಕ ಸೆರೆ ಹಿಡಿಯಲಾಗುತ್ತಿತ್ತು. ಅವರ ಹಿಂಭಾಗದಿಂದ ಡ್ರೋನ್​ ಮೂಲಕ ದೃಶ್ಯ ಸೆರೆ ಹಿಡಿಯಲು ಮುಂದಾದಾಗ ಡ್ರೋನ್​ ಅವರ ತಲೆ ಮತ್ತು ಕೈಗೆ ತಗುಲಿದೆ. ತಕ್ಷಣವೇ ಮೈಕ್​ ಸಮೇತ ಗಾಯಕ ನೆಲಕ್ಕೆ ಬಿದ್ದಿದ್ದಾರೆ. ಡ್ರೋನ್​ ತಾಗಿದ ಪರಿಣಾಮ ದಯಾಳ್​ ಅವರ ತಲೆ ಮತ್ತು ಬೆರಳಿಗೆ ಗಾಯಗಳಾಗಿವೆ. ಇನ್ನ ಅವರ ತಲೆಗೆ ಡ್ರೋನ್​ ತಾಕಿರುವ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್​ ಆಗಿದೆ. 

ಘಟನೆ ಕುರಿತು ಬೆನ್ನಿ ದಯಾಳ್​ ತಮ್ಮ ಇನ್​ಸ್ಟಾಗ್ರಾಮ್​ ಖಾತೆಯಲ್ಲಿ ವಿಡಿಯೋ ಪೋಸ್ಟ್​ ಮಾಡಿದ್ದು, ಅದರಲ್ಲಿ ಕಾರ್ಯಕ್ರಮದ ವೇಳೆ ಡ್ರೋನ್​ ಬಡಿದು, ನನ್ನ ತಲೆ ಭಾಗಕ್ಕೆ ಮತ್ತು ಕೈ ಬೆರಳಿಗೆ ಗಾಯಗಳಾಗಿವೆ. ಆದಷ್ಟು ಬೇಗ ಇದರಿಂದ ಚೇತರಿಸಿಕೊಳ್ಳುವೆ. ಅಲ್ಲದೇ ನನ್ನ ಆರೋಗ್ಯದ ಬಗ್ಗೆ ಪ್ರಾರ್ಥಿಸಿದ ಎಲ್ಲರಿಗೂ ಧನ್ಯವಾದಗಳು. ಇಂತಹ ಕಾರ್ಯಕ್ರಮಗಳಲ್ಲಿ ಡ್ರೋನ್​ ಬಗ್ಗೆ ಸಂಪೂರ್ಣ ತಿಳಿದಿರುವ ವೃತ್ತಿಪರ ಆಪರೇಟರ್​ಗಳನ್ನು ಕರೆಯಿಸಬೇಕು ಎಂದು ವಿನಂತಿಸಿಕೊಳ್ಳುತ್ತೇನೆ. ಅಲ್ಲದೇ ನಾವು ಗಾಯಕರು ನಮಗೆ ಸ್ಟಾರ್​ ನಟರಿಗೆ ಮಾಡುವಂತಹ ವ್ಯವಸ್ಥೆಗಳ ಅಗತ್ಯವಿಲ್ಲ, ಸರಳವಾದ ವ್ಯವಸ್ಥೆಯನ್ನು ಮಾಡಬೇಕೆಂದು ಆಯೋಜಕರಿಗೆ ಹೇಳಲು ಬಯಸುತ್ತೇನೆ ಎಂದಿದ್ದಾರೆ.  

ಇದನ್ನೂ ಓದಿ: 'ಕಾಂತಾರ 2 ಕೆಲಸ ಶುರು, ಮಾರ್ಚ್​​​ನಿಂದ ಫೋನ್ ಆಫ್': ಫಾಲ್ಕೆ ಪ್ರಶಸ್ತಿ ಬಗ್ಗೆ ರಿಷಬ್​ ಶೆಟ್ಟಿ ಹೀಗಂದ್ರು!