ಬೆಂಜ್​​​​ ಕಾರಿಗೆ ಡಿಕ್ಕಿ ಹೊಡೆದ ಕೆಎಸ್​ಆರ್​ಟಿಸಿ ಬಸ್: ಪ್ರಾಣಾಪಾಯದಿಂದ ಪಾರಾದ ದಂಪತಿ

ನೆಲಮಂಗಲ: ಯೂಟರ್ನ್ ಸ್ಥಳದಲ್ಲಿ ಬೆಂಜ್​​ ಕಾರು ಏಕಾಏಕಿ ರಸ್ತೆಗೆ ನುಗಿದ್ದು, ವೇಗವಾಗಿ ಬಂದ ಬಸ್ ಬೆಂಜ್​​ ಕಾರಿಗೆ ಗುದ್ದಿದ ಘಟನೆ ಇಂದು ನೆಲಮಂಗಲದಲ್ಲಿ ನಡೆದಿದೆ. ಅದೃಷ್ಟವಶಾತ್ ಕಾರಿನ ಏರ್ ಬ್ಯಾಗ್ ತೆರದ ಕಾರಣ ದಂಪತಿ ಪ್ರಾಣಾಪಾಯದಿಂದ ಪಾರಾಗಿದ್ದಾರೆ. ನಿಯಂತ್ರಣ ತಪ್ಪಿದ ಬಸ್ ಸ್ವಲ್ಪ ಮುಂದೆ ಚಲಿಸಿದ್ದರೂ 15 ಆಡಿಗಳ ಕಂದಕಕ್ಕೆ ಉರುಳುತ್ತಿತ್ತು. ಈ ಅಪಘಾತದ ದೃಶ್ಯ ಸಿಸಿ ಕ್ಯಾಮರಾದಲ್ಲಿ ಸೆರೆಯಾಗಿದೆ.

ನೆಲಮಂಗಲ ತಾಲೂಕಿನ ರಾಷ್ಟ್ರೀಯ ಹೆದ್ದಾರಿ 4ರ ಬೇಗೂರಿನ ಪಾಕಶಾಲ ಹೋಟೆಲ್ ಮುಂಭಾಗದಲ್ಲಿ ಈ ಘಟನೆ ನಡೆದಿದೆ. ಹೊಟೇಲ್​ನಲ್ಲಿ ಊಟ ಮಾಡಿದ ದಂಪತಿ ಯೂಟರ್ನ್​ನಲ್ಲಿ ಏಕಾಏಕಿ ನುಗಿದ್ದಾರೆ. ಈ ವೇಳೆ, ತುಮಕೂರಿನಿಂದ ಬೆಂಗಳೂರು ಕಡೆಗೆ ಬರುತ್ತಿದ್ದ ಬಸ್ ಬೆಂಜ್​​ ಕಾರಿಗೆ ಗುದ್ದಿದೆ. ಕಾರಿನಲ್ಲಿದ್ದ ಪೀಣ್ಯದ HHV ಕಂಪನಿ ಮಾಲೀಕ ಶ್ರೀಧರ್ ಮತ್ತು ಪತ್ನಿ ರಾಜೇಶ್ವರಿ ಅದೃಷ್ಟವಶಾತ್ ಪ್ರಾಣಪಾಯದಿಂದ ಪಾರಾಗಿದ್ದಾರೆ. ಶ್ರೀಧರ್ ಅವರ ಕೈಗೆ ಸಣ್ಣಪುಟ್ಟ ಗಾಯಗಳಾಗಿವೆ.

ನಿಯಂತ್ರಣ ತಪ್ಪಿದ ಬಸ್ ರಸ್ತೆ ಬದಿಯ ಕಂದಕದ ಬಳಿ ಬಂದು ನಿಂತಿದೆ. ಸಲ್ಪ ಮುಂದೆ ಚಲಿಸಿದ್ದರೂ ಬಸ್ 15 ಅಡಿಗಳ ಕಂದಕಕ್ಕೆ ಉರುಳುತ್ತಿತ್ತು. ಬಸ್​ನಲ್ಲಿದ್ದ ಪ್ರಯಾಣಿಕರಿಗೂ ಯಾವುದೇ ತೊಂದರೆಯಾಗದೇ  ಪಾರಾಗಿದ್ದಾರೆ. ಸ್ಥಳಕ್ಕೆ ಡಿವೈಎಸ್ಪಿ ಜಗದೀಶ್ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ. ನೆಲಮಂಗಲ ಸಂಚಾರಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಇದನ್ನೂ ನೋಡಿ: ನೋಯ್ಡಾದಲ್ಲಿ ಯುವಕನಿಗೆ ಡಿಕ್ಕಿ ಹೊಡೆದ ಕಾರು : ವಿಡಿಯೋ