ವಾಂಖೆಡೆಯಲ್ಲಿ ಅಭಿಷೇಕ್​ ಶತಕದಾಟಕ್ಕೆ ಶೇಕ್​ ಆದ ಇಂಗ್ಲೆಂಡ್​​ : ಭಾರತಕ್ಕೆ 4-1 ರಲ್ಲಿ ಸರಣಿ ಗೆಲುವು

ಅಭಿಷೇಕ್​ ಶರ್ಮಾ ದಾಖಲೆಯ ಶತಕದಾಟದ ಮುಂದೆ ಇಂಗ್ಲೆಂಡ್​ ಬೌಲರ್​ಗಳು ಸುಸ್ತಾದರು. ಇದರಿಂದ 5 ಪಂದ್ಯಗಳ ಸರಣಿಯಲ್ಲಿ ಭಾರತ 4-1 ರಲ್ಲಿ ಗೆಲುವು ಸಾಧಿಸಿತು.

ಮುಂಬೈ (ಮಹಾರಾಷ್ಟ್ರ) : ಸಿಡಿಲ ಮರಿ ಅಭಿಷೇಕ್​ ಶರ್ಮಾರ ಅಬ್ಬರದ ಬ್ಯಾಟಿಂಗ್​ನಿಂದಾಗಿ ಇಂಗ್ಲೆಂಡ್​ ವಿರುದ್ಧದ ಐದನೇ ಮತ್ತು ಕೊನೆಯ ಟಿ20 ಪಂದ್ಯದಲ್ಲಿ ಭಾರತ ತಂಡ 150 ರನ್​ಗಳಿಂದ ಗೆಲುವು ಸಾಧಿಸಿತು. ಇದರಿಂದ ಸರಣಿಯನ್ನು 4-1 ರಲ್ಲಿ ತನ್ನದಾಗಿಸಿಕೊಂಡಿತು.

ಮೊದಲು ಬ್ಯಾಟ್​ ಮಾಡಿದ ಭಾರತ ತಂಡ ಅಭಿಷೇಕ್​ ಶರ್ಮಾರ ಶತಕದ ನೆರವಿನಿಂದ 9 ವಿಕೆಟ್​​ಗೆ 247 ರನ್​ ಬೃಹತ್​ ಮೊತ್ತ ದಾಖಲಿಸಿತು. ಇದಕ್ಕುತ್ತರವಾಗಿ ಆಂಗ್ಲ ಪಡೆಯು ಬ್ಯಾಟಿಂಗ್​ ವೈಫಲ್ಯದಿಂದ 10.3 ಓವರ್​ಗಳಲ್ಲಿ 97 ರನ್​ಗೆ ಸರ್ವಪತನ ಕಂಡು ಹೀನಾಯ ಸೋಲೊಪ್ಪಿಕೊಂಡಿತು.

𝙏𝙝𝙖𝙩 𝙒𝙞𝙣𝙣𝙞𝙣𝙜 𝙁𝙚𝙚𝙡𝙞𝙣𝙜! 🏆

Congratulations to the Suryakumar Yadav-led #TeamIndia on the T20I series win! 👏 👏#INDvENG | @IDFCFIRSTBank | @surya_14kumar pic.twitter.com/QvgUH8iClq

— BCCI (@BCCI) February 2, 2025

ಅಭಿಷೇಕ್​ ಆಟಕ್ಕೆ ಇಂಗ್ಲೆಂಡ್​ ತತ್ತರ : ಮುಂಬೈನ ವಾಂಖೆಡೆ ಕ್ರೀಡಾಂಗಣದಲ್ಲಿ ನೆರೆದಿದ್ದ ಕ್ರಿಕೆಟ್​ ಅಭಿಮಾನಿಗಳಿಗೆ ಅಭಿಷೇಕ್​ ಶರ್ಮಾ ರಸದೌತಣ ಉಣಬಡಿಸಿದರು. ಕ್ರೀಡಾಂಗಣದ ಮೂಲೆಮೂಲೆಗೂ ಚೆಂಡನ್ನು ಬಡಿದಟ್ಟಿದ ಎಡಗೈ ಬ್ಯಾಟರ್​ ದಾಖಲೆಯ ಶತಕ ಬಾರಿಸಿದರು. 54 ಎಸೆತಗಳಲ್ಲಿ 135 ರನ್​ ಗಳಿಸಿದರು. ಇದರಲ್ಲಿ 13 ಭರ್ಜರಿ ಸಿಕ್ಸರ್​, 7 ಬೌಂಡರಿಗಳಿದ್ದವು.

ಅಭಿಷೇಕ್​ ಆಟಕ್ಕೆ ಇಂಗ್ಲೆಂಡ್​ ತಂಡದ ಆರೂ ಬೌಲರ್​ಗಳು ದಂಡಿಸಿಕೊಂಡರು. ಅದರಲ್ಲೂ ಜೋಫ್ರಾ ಆರ್ಚರ್​ 4 ಓವರ್​ಗಳಲ್ಲಿ 55 ರನ್​ ಚಚ್ಚಿಸಿಕೊಂಡು ದುಬಾರಿಯಾದರು. ಪ್ರತಿ ಬೌಲರ್​ನ ಓವರ್​ನಲ್ಲಿ ಕನಿಷ್ಠ ಒಂದು ಬೌಂಡರಿ, ಸಿಕ್ಸರ್​​ ಬಾರಿಸಿದರು. ಬೌಲಿಂಗ್​ನಲ್ಲೂ ಮಿಂಚಿದ ಯುವ ಕ್ರಿಕೆಟಿಗ 2 ವಿಕೆಟ್​ ಕಿತ್ತು ತಾನೊಬ್ಬ ಆಲ್​ರೌಂಡರ್​​ ಎಂಬುದನ್ನು ಸಾಬೀತುಪಡಿಸಿದರು.

An impressive way to wrap up the series 🤩#TeamIndia win the 5th and final T20I by 150 runs and win the series by 4-1 👌

Scoreboard ▶️ https://t.co/B13UlBNLvn#INDvENG | @IDFCFIRSTBank pic.twitter.com/aHyOY0REbX

— BCCI (@BCCI) February 2, 2025

ಅಭಿಷೇಕ್​ ದಾಖಲೆಗಳು : ಅಭಿಷೇಕ್​ ಶರ್ಮಾ ಬಾರಿಸಿದ 135 ರನ್​ ಟಿ20 ಕ್ರಿಕೆಟ್​ನಲ್ಲಿ ಭಾರತೀಯ ಆಟಗಾರನ ಅತ್ಯಧಿಕ ಮೊತ್ತವಾಗಿದೆ. 37 ಎಸೆತಗಳಲ್ಲಿ ನೂರರ ಗಡಿ ದಾಟುವ ಮೂಲಕ ಎರಡನೇ ವೇಗದ ಶತಕ ಬಾರಿಸಿದ ಎರಡನೇ ಆಟಗಾರ ಎನಿಸಿಕೊಂಡರು. ರೋಹಿತ್​ ಶರ್ಮಾ 35 ಎಸೆತಗಳಲ್ಲಿ ಶತಕ ಬಾರಿಸಿದ್ದರು. ಒಂದೇ ಇನಿಂಗ್ಸ್​ನಲ್ಲಿ ಅತ್ಯಧಿಕ ಅಂದರೆ 13 ಸಿಕ್ಸರ್​ ಬಾರಿಸಿದ ಮೊದಲ ಆಟಗಾರ ಖ್ಯಾತಿಗೆ ಪಾತ್ರರಾದರು.

For ending the series with an impressive 14 wickets, Varun Chakravarthy is the Player of the Series 👏

Scoreboard ▶️ https://t.co/B13UlBNLvn#TeamIndia | #INDvENG | @IDFCFIRSTBank | @chakaravarthy29 pic.twitter.com/Pxs2liDEv1

— BCCI (@BCCI) February 2, 2025

ಬಸವಳಿದ ಇಂಗ್ಲೆಂಡ್​ ಬ್ಯಾಟರ್ಸ್ ​: 247 ರನ್​ಗಳ ಬೃಹತ್​ ಮೊತ್ತ ಕಂಡ ಇಂಗ್ಲೆಂಡ್​ ಆಟಗಾರರ ಬ್ಯಾಟಿಂಗ್​ ಬಸವಳಿದಿತ್ತು. ಫಿಲಿಫ್​​​ ಸಾಲ್ಟ್​ 55 ರನ್​ ಗಳಿಸಿದರೆ, ಉಳಿದ 9 ಆಟಗಾರರು 42 ರನ್​ ಗಳಿಸಿದರು. ಇದರಿಂದ ತಂಡ 11 ಓವರ್​ಗಳಲ್ಲಿಯೇ ಗಂಟುಮೂಟೆ ಕಟ್ಟಿತು.

14 ತಿಂಗಳ ಬಳಿಕ ಶಮಿಗೆ ವಿಕೆಟ್ ​: ಗಾಯಗೊಂಡು 14 ತಿಂಗಳ ಬಳಿಕ ಅಂತಾರಾಷ್ಟ್ರೀಯ ಕ್ರಿಕೆಟ್​ಗೆ ಮರಳಿದ ಮೊಹಮ್ಮದ್​ ಶಮಿ ತಮ್ಮ ಹಳೆಯ ಗತ್ತು ತೋರಿಸಿದರು. 2.3 ಓವರ್​ ಬೌಲ್​ ಮಾಡಿದ ಶಮಿ ಮೂರು ವಿಕೆಟ್​ ಗಳಿಸಿದರು. ವರುಣ್ ಚಕ್ರವರ್ತಿ, ಶಿವಂ ದುಬೆ, ಅಭಿಷೇಕ್​ ಶರ್ಮಾ ತಲಾ 2 ವಿಕೆಟ್​ ಕಿತ್ತರು.

ಇದನ್ನೂ ಓದಿ: 6,6,6,6,6,6! ಅಭಿಷೇಕ್​ ಶರ್ಮಾ ಸ್ಫೋಟಕ ಬ್ಯಾಟಿಂಗ್​ಗೆ ಹಲವು ದಾಖಲೆ ಉಡೀಸ್​!