ಕಣಿವೆ ನಾಡಿನಲ್ಲಿ 400 ಮೀಟರ್​ ಉದ್ದದ ತ್ರಿವರ್ಣ ಧ್ವಜ ಹಿಡಿದು ಸಾಗಿದ ಶಾಲಾ ಮಕ್ಕಳು

ಅನಂತನಾಗ್, ಜಮ್ಮು ಮತ್ತು ಕಾಶ್ಮೀರ: ಸ್ವಾತಂತ್ರ್ಯೋತ್ಸವಕ್ಕೆ ಇನ್ನು ಮೂರು ದಿನ ಬಾಕಿ ಇದೆ. ಈ ಸಂಭ್ರಮಕ್ಕೆ ಕಾರಣರಾದವರು ಲೆಕ್ಕವಿಲ್ಲದಷ್ಟು ಸ್ವಾತಂತ್ರ್ಯ ಹೋರಾಟಗಾರರು. ಈಗಾಗಲೇ ಅನೇಕ ಕಡೆ ಸ್ವಾತಂತ್ರ್ಯೋತ್ಸವ ಆಚರಿಸಲು ಸಜ್ಜಾಗುತ್ತಿವೆ. ಈಗಾಗಲೇ ಜಿಲ್ಲೆಯಲ್ಲಿ ಮಕ್ಕಳು ರ‍್ಯಾಲಿ ಮತ್ತು ಪ್ರಚಾರಗಳು ಕೈಗೊಂಡಿದ್ದಾರೆ.  

ಶುಕ್ರವಾರದಂದು ಅನಂತನಾಗ್​ ಜಿಲ್ಲೆಯಲ್ಲಿ ಶಾಲಾ ಮಕ್ಕಳ ಬೃಹತ್ ತಿರಂಗಾ ರ‍್ಯಾಲಿ ನಡೆಸಲಾಯಿತು. ಸ್ವಾತಂತ್ರ್ಯ ದಿನಾಚರಣೆ ನಿಮಿತ್ತ ಶಾಲಾ ಮಕ್ಕಳು 400 ಮೀಟರ್ ಉದ್ದದ ತ್ರಿವರ್ಣ ಧ್ವಜವನ್ನು ಹಿಡಿದುಕೊಂಡು ನಗರದ ಬೀದಿಗಳಲ್ಲಿ ಮೆರವಣಿಗೆ ಮಾಡಿದರು. ಈ ರ‍್ಯಾಲಿಯನ್ನು 'ಮೇರಿ ಮಾತಿ ಮೇರಾ ದೇಶ್' ಅಭಿಯಾನದ ಅಡಿ ಆಯೋಜಿಸಲಾಗಿತ್ತು. 

ದಕ್ಷಿಣ ಕಾಶ್ಮೀರ ಜಿಲ್ಲೆಯ ವೆರಿನಾಗ್‌ನ ಸದಿವಾರ ಗ್ರಾಮದಲ್ಲಿ ನಡೆದ ಈ ತಿರಂಗಾ ರ‍್ಯಾಲಿಯಲ್ಲಿ ವಿದ್ಯಾರ್ಥಿಗಳಿಗೆ ಅಪಾರ ಸಂಖ್ಯೆಯ ಜನ ಸಾಥ್​ ನೀಡಿದ್ದರು. ಸೇನೆ ಮತ್ತು ಪೊಲೀಸರ ನೆರವಿನೊಂದಿಗೆ ರ‍್ಯಾಲಿಯನ್ನು ಆಯೋಜಿಸಲಾಗಿತ್ತು. 400 ಮೀಟರ್ ಉದ್ದದ ತ್ರಿವರ್ಣ ಧ್ವಜವನ್ನು ಹೊತ್ತ ರ‍್ಯಾಲಿಯಲ್ಲಿ ಮಕ್ಕಳು ದೇಶ ಭಕ್ತಿಗೀತೆಗಳನ್ನು ಹಾಡಿದರು. ಮಕ್ಕಳ ಈ ತಿರಂಗ ರ‍್ಯಾಲಿ ಜನರ ಮತ್ತು ಸೇನೆಯ ಮೆಚ್ಚುಗೆ ಪಡೆಯಿತು.

ಓದಿ: ಬಿಹಾರದ ಮುಸ್ಲಿಂ ಕುಟುಂಬಗಳಿಂದ 10 ಸಾವಿರ ರಾಷ್ಟ್ರಧ್ವಜ ತಯಾರಿ.. ದಶಕಗಳಿಂದ ದೇಶ ಸೇವೆ