ನವದೆಹಲಿ: ನಿರಂತರವಾಗಿ ಸುದ್ದಿಗಳನ್ನು ಪರಿಶೀಲಿಸುವ ಬಯಕೆ ಹೊಂದಿರುವ ಜನರು ಅತ್ಯಧಿಕ ಒತ್ತಡ, ಚಿಂತೆ ಮತ್ತು ದೈಹಿಕ ಅನಾರೋಗ್ಯದಿಂದ ಬಳಲುತ್ತಿದ್ದಾರೆ ಎಂದು ಅಧ್ಯಯನವೊಂದು ಹೇಳಿದೆ. ವಿಶೇಷವಾಗಿ ಕೆಟ್ಟ ಘಟನೆಗಳ ಸುದ್ದಿಗಳನ್ನು ಓದುವವರಲ್ಲಿ ಇಂತಹ ಅಪಾಯ ಅಧಿಕ ಪ್ರಮಾಣದಲ್ಲಿರುತ್ತದೆ ಎಂದು ಹೆಲ್ತ್‌ ಕಮ್ಯುನಿಕೇಷನ್‌ ಜರ್ನಲ್‌ನಲ್ಲಿ ಪ್ರಕಟವಾದ ಅಧ್ಯಯನ ತಿಳಿಸಿದೆ.
ಮಾನಸಿಕ, ದೈಹಿಕ ಆರೋಗ್ಯದ ಮೇಲೆ ಪರಿಣಾಮ: ಕಳೆದ ಎರಡು ವರ್ಷಗಳಲ್ಲಿ ಕೋವಿಡ್‌ ಸಾಂಕ್ರಾಮಿಕ, ಉಕ್ರೇನ್‌ನ ಮೇಲೆ ರಷ್ಯಾ ಆಕ್ರಮಣ, ದೊಡ್ಡ ಪ್ರಮಾಣದ ಪ್ರತಿಭಟನೆಗಳು, ಸಾಮೂಹಿಕ ಗುಂಡಿನ ದಾಳಿಗಳು, ವಿನಾಶಕಾರಿ ಕಾಳ್ಗಿಚ್ಚು ಸೇರಿದಂತೆ ಜಾಗತಿಕವಾಗಿ ಹಲವು ಸರಣಿ ಘಟನೆಗಳು ನಡೆದಿವೆ. ಇಂತಹ ಕೆಟ್ಟ ವರ್ತಮಾನ ಓದುವುದರಿಂದ ನಾವು ತಾತ್ಕಾಲಿಕವಾಗಿ ಬಲಹೀನರಾಗಬಹುದು ಮತ್ತು ದುಃಖಿತರಾಗಬಹುದು ಎಂದು ಅಧ್ಯಯನ ತಿಳಿಸಿದೆ.
ನಿತ್ಯ ಸುದ್ದಿ ಚಕ್ರಕ್ಕೆ ಒಡ್ಡಿಕೊಳ್ಳುವುದರಿಂದ ಮಾನಸಿಕ ಮತ್ತು ದೈಹಿಕ ಆರೋಗ್ಯದ ಮೇಲೆ ಗಂಭೀರ ಪರಿಣಾಮ ಉಂಟಾಗಬಹುದು. ವಿಶೇಷವಾಗಿ ಕೆಟ್ಟ ಘಟನೆಗಳ ಸುದ್ದಿಗಳನ್ನು ಅತಿಯಾಗಿ ಓದುವ ವ್ಯಸನಕ್ಕೆ ಒಳಗಾದವರಲ್ಲಿ ಹೆಚ್ಚಿನ ದೈಹಿಕ ಮತ್ತು ಮಾನಸಿಕ ತೊಂದರೆಗಳು ಉಂಟಾಗಬಹುದು ಎಂದು ಅಧ್ಯಯನ ತಿಳಿಸಿದೆ.
ವ್ಯಕ್ತಿಗಳು ಆಗಾಗ ಸುದ್ದಿಗಳಲ್ಲಿ ಮುಳುಗುತ್ತಾರೆ. ಅವರು ಕುಟುಂಬ ಮತ್ತು ಸ್ನೇಹಿತರೊಂದಿಗೆ ಹೆಚ್ಚಿನ ಸಮಯ ಕಳೆಯಲು ಬಯಸುವುದಿಲ್ಲ. ಇದು ಚಡಪಡಿಕೆ ಮತ್ತು ನಿದ್ರಾಹೀನತೆಗೆ ಕಾರಣವಾಗಿದೆ. ಹೆಚ್ಚಿನ ಮಟ್ಟದ ಸಮಸ್ಯಾತ್ಮಕ ಸುದ್ದಿ ಓದುವ ಜನರು ಮಾನಸಿಕ ಮತ್ತು ದೈಹಿಕ ಅಸ್ವಸ್ಥತೆ ಅನುಭವಿಸುವ ಸಾಧ್ಯತೆ ಹೆಚ್ಚು ಎಂದು ಅಧ್ಯಯನ ತಿಳಿಸಿದೆ.
ಆತಂಕದಲ್ಲಿ ದಿನದೂಡುತ್ತಾರೆ: ಶೇ.73.6ರಷ್ಟು ಸಮಸ್ಯಾತ್ಮಕ ಸುದ್ದಿ ಓದುವವರು ಮಾನಸಿಕ ಅಸ್ವಸ್ಥತೆಯನ್ನು ಅನುಭವಿಸುತ್ತಿದ್ದಾರೆಂದು ವರದಿಯಾಗಿದೆ. ಕೆಲವೊಂದು ಸುದ್ದಿಗಳನ್ನು ಓದಿದಾಗ ಕೆಲವು ವ್ಯಕ್ತಿಗಳು ಅದನ್ನು ತಮಗೆ ಅನ್ವಯಿಸಿಕೊಂಡು ಹೆಚ್ಚಿನ ಎಚ್ಚರಿಕೆ ವಹಿಸುತ್ತಾರೆ. ಜಗತ್ತೇ ಕತ್ತಲಲ್ಲಿ ಇದೆ ಮತ್ತು ತೊಂದರೆಯಲ್ಲಿ ಇದೆ ಎಂದು ಆತಂಕದಲ್ಲಿ ಇವರು ದಿನದೂಡುತ್ತಾರೆ ಎಂದು ಟೆಕ್ಸಾಸ್‌ ಟೆಕ್‌ ಯೂನಿವರ್ಸಿಟಿಯ ಮೀಡಿಯಾ ಆಂಡ್‌ ಕಮ್ಯುನಿಕೇಷನ್‌ ಕಾಲೇಜಿನ ಅಸೋಸಿಯೇಟ್‌ ಪ್ರೊಫೆಸರ್‌ ಬ್ರಿಯಾನ್‌ ಮೆಕ್‌ಲಾಗ್ಲಿನ್‌ ಹೇಳಿದ್ದಾರೆ.
"ಇಂತಹ ಸುದ್ದಿಗಳನ್ನು ನಿರಂತರವಾಗಿ ಓದುವ ಹಂಬಲವಾಗಿ ಈ ವ್ಯಸನ ಮುಂದುವರೆಯಬಹುದು. ಇಂತಹ ಸುದ್ದಿಗಳನ್ನು ಓದುವ ಗೀಳಿಗೆ ಒಳಗಾಗುತ್ತಾರೆ. ನಿತ್ಯ ಇಂತಹ ಸುದ್ದಿ ಮುಂದೇನಾಯ್ತು ಎಂದು ತಿಳಿಯಲು ಹಂಬಲಿಸುತ್ತಿರುತ್ತಾರೆ. ಇದು ಇವರ ಜೀವನದ ಇತರ ಚಟುವಟಿಕೆಗಳ ಮೇಲೆ ಹಸ್ತಕ್ಷೇಪ ಮಾಡಲು ಆರಂಭವಾಗುತ್ತದೆ" ಎಂದು ಅವರು ಹೇಳಿದ್ದಾರೆ.
ಸುದ್ದಿಯೋಗ್ಯ ಕಥೆ ಆಯ್ಕೆ: ಸುದ್ದಿಗಳೊಂದಿಗೆ ಆರೋಗ್ಯಕರ ಸಂಬಂಧವನ್ನು ಅಭಿವೃದ್ಧಿಪಡಿಸಲು ಜನರಿಗೆ ಸಹಾಯ ಮಾಡಲು ಕೇಂದ್ರೀಕೃತ ಮಾಧ್ಯಮ ಸಾಕ್ಷರತಾ ಅಭಿಯಾನದ ಅವಶ್ಯಕತೆಯಿದೆ. ಜನರು ಸುದ್ದಿಯಲ್ಲಿ ತೊಡಗಿಸಿಕೊಳ್ಳಬೇಕು ಎಂದು ನಾವು ಬಯಸುತ್ತಿರುವಾಗ ಅವರು ಸುದ್ದಿಯೊಂದಿಗೆ ಆರೋಗ್ಯಕರ ಸಂಬಂಧ ಹೊಂದಿರುವುದು ಮುಖ್ಯವಾಗಿದೆ. ಗ್ರಾಹಕರ ಗಮನವನ್ನು ಸೆಳೆಯುವ ಸುದ್ದಿಯೋಗ್ಯ ಕಥೆಗಳನ್ನು ಆಯ್ಕೆಮಾಡಲು ಪತ್ರಕರ್ತರನ್ನು ಉತ್ತೇಜಿಸಿ ಎಂದು ಮೆಕ್ಲಾಫ್ಲಿನ್ ಹೇಳುತ್ತಾರೆ.
ಅಮೆರಿಕದ ಸುಮಾರು 1100 ವಯಸ್ಕರನ್ನು ಸಮೀಕ್ಷೆಗೆ ಒಳಪಡಿಸಿ ಮೆಕ್ಲಾಫ್ಲಿನ್ ಮತ್ತು ಅವರ ಸಹೋದ್ಯೋಗಿಗಳಾದ ಡಾ. ಮೆಲಿಸ್ಸಾ ಗಾಟ್ಲೀಟ್‌ ಮತ್ತು ಡಾ. ಡೆವಿನ್‌ ಮಿಲ್ಸ್‌ ಈ ಅಧ್ಯಯನ ವರದಿ ಬರೆದಿದ್ದಾರೆ. ಸಮೀಕ್ಷೆಯಲ್ಲಿ ಭಾಗವಹಿಸಿದವರು, "ನಾನು ಸುತ್ತಲಿನ ಜಗತ್ತನ್ನೇ ಮರೆತುಬಿಡುವಷ್ಟು ಸುದ್ದಿಗಳಲ್ಲಿ ಮುಳುಗಿದ್ದೇನೆ" ಎಂದು ಕೆಲವರು ಅಭಿಪ್ರಾಯಪಟ್ಟಿದ್ದಾರೆ. ಇನ್ನು ಕೆಲವರು "ನನ್ನ ಮನಸು ಸದಾ ಸುದ್ದಿಯಲ್ಲಿಯೇ ಮುಳುಗಿರುತ್ತದೆ" ಎಂದು ಬಹುತೇಕರು ಹೇಳಿದ್ದಾರೆ.
ಅಧ್ಯಯನದ ಫಲಿತಾಂಶಗಳು ಸುದ್ದಿ ಮಾಧ್ಯಮ ಎದುರಿಸುವ ವಾಣಿಜ್ಯ ಒತ್ತಡಗಳು ಆರೋಗ್ಯಕರ ಪ್ರಜಾಪ್ರಭುತ್ವ ಕಾಪಾಡಿಕೊಳ್ಳುವ ಗುರಿಗೆ ಹಾನಿಕಾರಕವಲ್ಲ. ಬದಲಾಗಿ ಅವು ವ್ಯಕ್ತಿಗಳ ಆರೋಗ್ಯಕ್ಕೂ ಹಾನಿಕಾರಕವಾಗಿದೆ ಎಂದು ಅಧ್ಯಯನ ಒತ್ತಿ ಹೇಳುತ್ತದೆ.
ಇದನ್ನೂ ಓದಿ: ಟೊಮೇಟೊ ಜ್ವರ.. ಕೇಂದ್ರದಿಂದ ಮಾರ್ಗಸೂಚಿ ಬಿಡುಗಡೆ.. ಯಾವೆಲ್ಲ ಮುನ್ನೆಚ್ಚರಿಕೆ
