ಗಿರಿನಾಡಿನಲ್ಲಿ ಬರದ ಛಾಯೆ... ರೈತರು ಕಂಗಾಲು,ಗುಳೆ ಹೋಗುವ ಸ್ಥಿತಿ ನಿರ್ಮಾಣ

ರಣ ಬಿಸಿಲಿಗೆ ಹೆದರಿ ಜನರು ಜಿಲ್ಲೆಯಿಂದ ಹೊರ ಹೋಗುತ್ತಿದ್ದಾರೆ. ಇದರ ಮಧ್ಯೆ ರೈತರ ಗೋಳು ಕೇಳುವವರಿಲ್ಲದಂತಾಗಿದ್ದು, ಸಾಲ ಮಾಡಿ ಕುಟುಂಬ ನಿಭಾಯಿಸುವಂತಹ ಪರಿಸ್ಥಿರಿ ನಿರ್ಮಾಣವಾಗಿದೆ.

ಯಾದಗಿರಿ : ಭೀಕರ ಬರಗಾಲವನ್ನು ಎದುರಿಸುತ್ತಿರುವ ಗಿರಿನಾಡು ಯಾದಗಿರಿ ಜಿಲ್ಲೆ ಬರಗಾಲದ ಛಾಯೆಗೆ ತುತ್ತಾಗಿದೆ‌. ಜಿಲ್ಲೆಯಲ್ಲಿ ಕುಡಿಯಲು ನೀರಿಲ್ಲದೆ ಜನ ಜಾನುವಾರು ಪ್ರಾಣ ಸಂಕಟ ಅನುಭವಿಸುವಂತಾಗಿದೆ. ಇದರ ಮಧ್ಯೆ ಜನರು ಗುಳೆ ಹೋಗುವಂತಹ ಪರಿಸ್ಥಿತಿ ನಿರ್ಮಾಣವಾಗಿದೆ.

ಜಿಲ್ಲೆಯಲ್ಲಿ ಈ ಭಾರಿ ಭೀಕರ ಬರಗಾಲ ತಾಂಡವವಾಡುತ್ತಿದೆ. ಎಲ್ಲಿ ನೋಡಿದ್ರೂ ಕೆರೆ, ಬಾವಿ, ನಾಲೆ, ಕಾಲುವೆ, ನದಿಗಳು ಬತ್ತಿ ಹೋಗಿದ್ದು, ಭೂಮಿ ಬಾಯಿ ತೆರೆದುಕೊಂಡು ಭೂಗರ್ಭದ ಉಷ್ಣತೆಯನ್ನ ಹೊರಚಾಚುತ್ತಿದೆ. ಜಿಲ್ಲೆಯಲ್ಲಿ ಸುಮಾರು 45 ಡಿಗ್ರಿ ಸೆಲ್ಸಿಯಸ್ ತಾಪಮಾನ ಆವರಿಸಿದ ಪರಿಣಾಮ ಜಾನುವಾರುಗಳು ಸಾವಿಗೀಡಾಗುತ್ತಿವೆ. ಕುಡಿಯುವ ನೀರಿಲ್ಲದೆ ಜನ ಸಂಕಷ್ಟಕ್ಕೆ ಒಳಗಾಗಿದ್ದಾರೆ.

ಬಿಸಿಲಿನ ಬೆಗೆಗೆ ಜನರು ಅನಾರೋಗ್ಯಕ್ಕಿಡಾಗುತ್ತಿದ್ದು ಜಿಲ್ಲಾ ಆಸ್ಪತ್ರೆಗಳು ತುಂಬಿ ತುಳುಕುತ್ತಿವೆ. ರಣ ಬಿಸಿಲಿಗೆ ಹೆದರಿ ಜನರು ಜಿಲ್ಲೆಯಿಂದ ಹೊರ ನಡೆದಿದ್ದಾರೆ. ಇನ್ನೂ ರೈತರ ಗೋಳು ಕೇಳುವವರಿಲ್ಲದಂತಾಗಿದ್ದು, ಸಾಲ ಮಾಡಿ ಕುಟುಂಬ ನಿಭಾಯಿಸುವಂತಹ ಪರಿಸ್ಥಿತಿ ನಿರ್ಮಾಣವಾಗಿದೆ. ಕೈ ಹಿಡಿಯಬೇಕಿದ್ದ ಬೇಸಿಗೆ ಬೆಳೆ ಶೆಂಗಾ, ಸಜ್ಜಿ ನೀರಿಲ್ಲದೆ ಒಣಗಿ ಹೋಗಿವೆ. ಹಿಂಗಾರು ಬೆಳೆಗಳು ಸಾಕಷ್ಟು ಲಾಭ ನೀಡದಿರುವುದು ರೈತನನ್ನ ಆರ್ಥಿಕ ಸಂಕಷ್ಟಕ್ಕೆ ಗುರಿಮಾಡಿದೆ.

ಇನ್ನೂ ಮುಂಗಾರು ಬೆಳೆಗಳಾಗದ ತೊಗರಿ, ಜೋಳ, ಸಜ್ಜಿ ಬೆಳೆಗಳಿಗೆ ಸಕಾಲಕ್ಕೆ ಮಳೆಯಾದ್ರೆ ಮಾತ್ರ ರೈತ ಸ್ವಲ್ಪ ನೆಮ್ಮದಿಯಾಗಿ ನಿಟ್ಟುಸಿರು ಬಿಡಬಹುದು. ಜಿಲ್ಲೆಯಲ್ಲಿ ಕೃಷ್ಣ ನದಿ ಬತ್ತಿಹೋಗಿರುವುದರಿಂದ ಈ ಬಾರಿ ಭತ್ತ ಬೆಳೆಯುವ ರೈತರ ಜೀವನ ಆರ್ಥಿಕ ಸಂಕಷ್ಟದಿಂದ ಕೂಡಿದೆ.

ಜಿಲ್ಲೆಯಲ್ಲಿ ಸುಮಾರು ಕೆರೆಗಳು ಹೂಳು ತುಂಬಿಕೊಂಡಿವೆ. ಒಂದು ವೇಳೆ ಸರಕಾರ ಹೂಳು ತೆಗೆಯುವ ಕಾರ್ಯದಲ್ಲಿ ಶೀಘ್ರವಾಗಿ ಕಾರ್ಯಪ್ರವೃತ್ತರಾದ್ರೆ ಕೆರೆಗಳಿಗೆ ಜೀನೋದ್ಧಾರ ನೀಡಿದಂತಾಗುತ್ತದೆ.