ಕೊರೊನಾ ತಡೆಯಲು ಸೆನ್ಸಾರ್ ಸ್ಯಾನಿಟೈಸರ್ ಯಂತ್ರ ಆವಿಷ್ಕಾರ: ವಿಜಯಪುರದ ವಿದ್ಯಾರ್ಥಿ ಸಾಧನೆ

ಕೊರೊನಾ ವೈರಸ್‌ನಿಂದ ದೇಶವೇ ತತ್ತರಿಸಿದೆ. ಇದರಿಂದ ದೂರವಿರಲು ಸ್ಯಾನಿಟೈಸರ್ ಬಳಕೆ ಮಾಡಲಾಗುತ್ತಿದೆ. ಆದರೆ ಸ್ಯಾನಿಟೈಸರ್ ಬಾಟಲ್ ಮುಟ್ಟಿ ಜನ ಕೈ ತೊಳೆಯುತ್ತಿರುವ ಕಾರಣ ಕೊರೊನಾ ಹರಡಬಹುದು ಎಂಬ ಕಾರಣದಿಂದ ಇಲ್ಲೊಬ್ಬ ವಿದ್ಯಾರ್ಥಿ ಯಂತ್ರವನ್ನು ಕಂಡು ಹಿಡಿದಿದ್ದಾನೆ.

ವಿಜಯಪುರ: ಸ್ಯಾನಿಟೈಸರ್ ಬಾಟಲ್ ಮುಟ್ಟಿ ಜನ ಕೈ ತೊಳೆಯುತ್ತಿರುವ ಕಾರಣ ಕೊರೊನಾ ಹರಡಬಹುದು ಎಂದು ಮನಗಂಡ ಎಂಜಿನಿಯರಿಂಗ್ ವಿದ್ಯಾರ್ಥಿಯೊಬ್ಬ ಸೆನ್ಸಾರ್ ಸ್ಯಾನಿಟೈಸರ್ ಸಿಂಪಡನೆ ಯಂತ್ರವನ್ನ ಸಂಶೋಧನೆ ಮಾಡಿದ್ದಾನೆ.

ಗುಮ್ಮಟ ನಗರಿಯ ಅಭಿಷೇಕ್ ಹಿಪ್ಪರಗಿ ಎಂಬ ಯುವಕ ಈ ಯಂತ್ರವನ್ನು ಸಂಶೋಧನೆ ಮಾಡಿದ್ದಾನೆ. ಸ್ಥಳೀಯವಾಗಿ ಸಿಗುವ ವಸ್ತುಗಳನ್ನ ಬಳಕೆ ಮಾಡಿಕೊಂಡು ಅಟೋಮ್ಯಾಟಿಕ್ ಸ್ಯಾನಿಟೈಸರ್ ಯಂತ್ರ ಸಂಶೋಧನೆ ಮಾಡಿದ್ದಾನೆ. ಈ ವಿದ್ಯಾರ್ಥಿ ಬಾಗಲಕೋಟೆಯ ಬಸವೇಶ್ವರ ಕಾಲೇಜಿನಲ್ಲಿ ಇಂಜಿನಿಯರಿಂಗ್ ಓದುತ್ತಿದ್ದು, ಕೇವಲ 1 ಸಾವಿರ ರೂ. ವೆಚ್ಚದಲ್ಲಿ ಈ ಮಷಿನ್ ಕಂಡು ಹಿಡಿದಿದ್ದಾನೆ. ಕೊರೊನಾ ತುರ್ತು ಸಮಯದಲ್ಲಿ ಸಮಾಜಕ್ಕೆ ನನ್ನಿಂದ ಏನಾದ್ರೂ ಸಹಾಯವಾಗಲಿ ಅಂತಾ ಯಂತ್ರ ತಯಾರಿಸಿದ್ದೇನೆ ಎಂದು ಅಭಿಷೇಕ್​ ಹೇಳಿದ್ದಾನೆ.

ಯಂತ್ರವನ್ನು ಸರ್ಕಾರಿ ಕಚೇರಿಗಳು, ಸಾರ್ವಜನಿಕ ಸ್ಥಳಗಳಲ್ಲಿ ಬಳಕೆ ಮಾಡುವುರಿಂದ ಕೊರೊನಾ ವೈರಸ್ ತಡೆಯಬಹುದು. ಮನೆಯಲ್ಲಿ ಬಳಕೆ ಮಾಡುವ ಡಬ್ಬ, ಐಆರ್​ಎಲ್‌ಇಡಿ, ಐಸಿಎಲ್‌ಎಂ35 ಹಾಗೂ ಡಿಸಿ ಪಂಪ್ ಬಳಕೆ ಮಾಡಿಕೊಂಡು ಅಭಿಷೇಕ್​ ಈ ಸೆನ್ಸಾರ್ ಚಾಲಿತ ಸ್ಯಾನಿಟೈಸರ್ ಮಷಿನ್​ ತಯಾರಿಸಿದ್ದಾನೆ‌.