ಮುದ್ದೇಬಿಹಾಳ: ಮುದ್ದೇಬಿಹಾಳಕ್ಕೆ ಕೃಷಿ ವಿಸ್ತರಣಾ ಶಿಕ್ಷಣ ಕೇಂದ್ರ ಮಂಜೂರಾಗಿದ್ದರೂ ಅದರ ಸ್ಥಳಾಂತರಕ್ಕೆ ವಿಜಯಪುರದ ವಿಜ್ಞಾನಿಗಳೇ ಅಡ್ಡಿಯಾಗಿದ್ದಾರೆ ಎಂದು ಕೃಷಿಕ ಸಮಾಜದ ಜಿಲ್ಲಾ ಮುಖಂಡ ವೆಂಕನಗೌಡ ಪಾಟೀಲ ಆರೋಪಿಸಿದರು.
ಪಟ್ಟಣದ ಶಾಸಕರ ನಿವಾಸದಲ್ಲಿ ಗುರುವಾರ ವಿವಿಧ ರೈತಪರ ಸಂಘಟನೆಗಳ ಮುಖಂಡರೊಂದಿಗೆ ಕೃಷಿ ಕೇಂದ್ರದ ಸ್ಥಳಾಂತರ ಕುರಿತು ಶಾಸಕರ ಎದುರಿಗೆ ಮಾತನಾಡಿದ ಅವರು, ಅಲ್ಲಿನ ಪ್ರೊಫೆಸರ್ ಒಬ್ಬರು ಎರಡು ಕಡೆ ಇನ್‌ಚಾರ್ಜ ಇದ್ದಾರೆ. ವರ್ಷಕ್ಕೆ 72 ಲಕ್ಷ ರೂ.ಅನುದಾನ ಕೃಷಿ ವಿಶ್ವವಿದ್ಯಾಲಯಕ್ಕೆ ಬರುತ್ತದೆ. ಅಲ್ಲಿನ ಕೆಲ ಪ್ರೊಫೆಸರ್ ತಮ್ಮದೇ ರೈತರ ಗುಂಪು ಕಟ್ಟಿಕೊಂಡು ಬೇರೆ ಬೇರೆ ಕಡೆಗಳಿಂದ ಮನವಿ ಕೊಡಿಸುತ್ತಾರೆ ಎಂದು ಆರೋಪಿಸಿದರು. ಅಲ್ಲಿನ ವಿಜ್ಞಾನಿಗಳು ಮುದ್ದೇಬಿಹಾಳಕ್ಕೆ ಈ ಕೇಂದ್ರ ಸ್ಥಳಾಂತರಗೊಳ್ಳಲು ಅಡ್ಡಗಾಲು ಹಾಕಿಸುತ್ತಿದ್ದಾರೆ. ಯಾವುದೇ ಕಾರಣಕ್ಕೂ ಶಾಸಕರು ಈ ಕೇಂದ್ರ ಸ್ಥಳಾಂತರದಿಂದ ಹಿಂದೆ ಸರಿಯಬಾರದು ಎಂದು ಒತ್ತಾಯಿಸಿದರು.
ರೈತರ ಮನವಿ ಸ್ವೀಕರಿಸಿದ ಶಾಸಕ ಎ.ಎಸ್. ಪಾಟೀಲ ನಡಹಳ್ಳಿ ಮಾತನಾಡಿ, ಕಳೆದ ನಾಲ್ಕೈದು ವರ್ಷಗಳ ಹಿಂದೆ ಆದೇಶ ಆಗಿರುವ ಕೃಷಿ ವಿಸ್ತರಣಾ ಶಿಕ್ಷಣ ಕೇಂದ್ರವನ್ನು ಮುದ್ದೇಬಿಹಾಳಕ್ಕೆ ಸ್ಥಳಾಂತರಿಸುವುದು ಶತಃಸಿದ್ಧ. ಈಗಾಗಲೇ ಆ ಕೇಂದ್ರದ ಸ್ಥಳಾಂತರಕ್ಕೆ ಪತ್ರ ಬರೆದಿದ್ದೇನೆ. ಫೆ.23 ರಂದು ಮುದ್ದೇಬಿಹಾಳ ತಾಲೂಕಿಗೆ ಕೃಷಿ ಸಚಿವ ಬಿ.ಸಿ. ಪಾಟೀಲ ಪ್ರವಾಸ ಇದ್ದು ಅಂದೇ ಕೇಂದ್ರದ ಸ್ಥಳಾಂತರ ಘೋಷಣೆಯನ್ನೂ ಮಾಡಿಸುವ ಬಗ್ಗೆ ಸಚಿವರೊಂದಿಗೆ ಮಾತನಾಡುತ್ತೇನೆ. ಈ ವಿಷಯದಲ್ಲಿ ರೈತರು, ಪ್ರಗತಿಪರ ಸಂಘಟನೆಯ ಮುಖಂಡರು ತಮಗೆ ಸಹಕಾರ ನೀಡಬೇಕು ಎಂದು ಮನವಿ ಮಾಡಿದರು.
ಈ ಸಂದರ್ಭದಲ್ಲಿ ರೈತ ಮುಖಂಡರಾದ ಅರವಿಂದ ಕೊಪ್ಪ, ವೆಂಕನಗೌಡ ಪಾಟೀಲ, ಕೆ.ಎಂ. ದೊಡಮನಿ, ಸಿದ್ದನಗೌಡ ಬಿರಾದಾರ ಹಾಗೂ ಅರುಣ ಪಾಟೀಲ ಮತ್ತಿತರರು ಹಾಜರಿದ್ದರು.
