ಕಾರವಾರ: ಅಂಕೋಲಾದ ಆಂದ್ಲೆಕ್ರಾಸ್ ಬಳಿ ಇತ್ತೀಚೆಗೆ ಶವವಾಗಿ ಪತ್ತೆಯಾಗಿದ್ದ ರವಿ ಹರಿಕಂತ್ರ ಅವರ ಸಾವು ಅನುಮಾನಸ್ಪದವಾಗಿದ್ದು, ಸೂಕ್ತ ತನಿಖೆ ನಡೆಸುವಂತೆ ಆಗ್ರಹಿಸಿ ಮೃತರ ಸಂಬಂಧಿಕರು ಡಿವೈಎಸ್‌ಪಿ ಶಂಕರ ಮರಿಹಾಳ ಹಾಗೂ ಜಿಲ್ಲಾಧಿಕಾರಿಯವರನ್ನು ಭೇಟಿ ಮಾಡಿ ಒತ್ತಾಯಿಸಿದರು.
ಅಂಕೋಲಾ ತಾಲೂಕಿನ ಶಿರೂರಿನ ರವಿ ಸುರೇಶ ಹರಿಕಂತ್ರ ಎಂಬಾತರನ್ನು ಅವರ ಮೂವರು ಸ್ನೇಹಿತರು ಪಾರ್ಟಿ ಕೊಡಿಸುವದಾಗಿ ಕರೆದೊಯ್ದು ಕೊಲೆ ಮಾಡಿದ್ದಾರೆ. ನಂತರ ಅಪಘಾತದಲ್ಲಿ ರವಿ ಸಾವನಪ್ಪಿದ್ದಾನೆಂದು ಬಿಂಬಿಸಲಾಗಿದೆ. ಕೊಲೆ ನಡೆದ ನಂತರ ಮೂವರು ಆರೋಪಿಗಳು ತಲೆ ಮರೆಸಿಕೊಂಡಿದ್ದು, ಅವರನ್ನು ಕೂಡಲೇ ಬಂಧಿಸಿ ವಿಚಾರಣೆ ನಡೆಸಬೇಕು ಎಂದು ಹೇಳಿದರು.
ಆರೋಪಿತರಲ್ಲಿ ಓರ್ವನ ಸಹೋದರಿಯನ್ನು ರವಿ ಪ್ರೀತಿಸುತ್ತಿದ್ದ. ಈ ಸಂಬಂಧ ಹಲವು ಬಾರಿ ಜಗಳವಾಗಿ ಬಳಿಕ ಬುದ್ಧಿ ಮಾತು ಹೇಳಿ ಮುಗಿಸಲಾಗಿತ್ತು. ಆದರೆ ಇದೇ ದ್ವೇಷದಿಂದ ಕೊಲೆ ನಡೆದಿದೆ ಎಂದು ಸಂಬಂಧಿಕರು ಆರೋಪಿಸಿದ್ದಾರೆ.
ರವಿ ಕೊಲೆಯಾಗುವದಕ್ಕೂ ಕೆಲ ಗಂಟೆಗಳ ಮೊದಲು ತನ್ನ ತಾಯಿಯೊಂದಿಗೆ ಪೋನ್‌ನಲ್ಲಿ ಮಾತನಾಡಿದ್ದ. ಆರೋಪಿಗಳ ಹೆಸರು ತಿಳಿಸಿ ಅವರ ಜೊತೆ ಪಾರ್ಟಿಯಲ್ಲಿರುವದಾಗಿ ಹೇಳಿಕೊಂಡಿದ್ದಾನೆ. ಆದರೆ ಬಳಿಕ ಅಪಘಾತದ ಸುದ್ದಿ ಬಂದಿದ್ದು, ಅವನು ಹೇಳಿದವರು ಯಾರು ಇರಲಿಲ್ಲ. ಅಪಘಾತದಿಂದ ಈ ಸಾವು ಸಂಭವಿಸಿದೆ ಎಂದು ಬಿಂಬಿಸಲಾಗಿದೆ. ಅಪಘಾತ ಆಗಿದ್ದರೆ ಘಟನೆ ನಡೆದ ನಂತರ ಗಾಯಾಳುವನ್ನು ಆಸ್ಪತ್ರೆಗೆ ದಾಖಲು ಮಾಡಬೇಕಿತ್ತು. ಆದರೆ, ಆರೋಪಿತರು ತಲೆ ಮರೆಸಿಕೊಂಡಿದ್ದಾರೆ. ಕೂಡಲೇ ಅವರನ್ನು ಬಂಧಿಸಬೇಲು ಎಂದು ಒತ್ತಾಯಿಸಿದರು.
