ಜಮೀನು ಪೋಡಿಗೆ ವಿಳಂಬ: ಪ್ರಾದೇಶಿಕ ಆಯುಕ್ತರ ಕಾರಿನ ಎದುರು ರೈತರಿಬ್ಬರ ಪ್ರತಿಭಟನೆ

ಜಮೀನು ಸರ್ವೆ ಮಾಡಿ ಪೋಡಿ ಮಾಡಲು ಸರ್ವೆ ಇಲಾಖೆಯ ಅಧಿಕಾರಿಗಳು ವಿಳಂಬಿಸುತ್ತಿದ್ದಾರೆ ಎಂದು ಆರೋಪಿಸಿ ರೈತರಿಬ್ಬರು ಪ್ರಾದೇಶಿಕ ಆಯುಕ್ತರ ಕಾರಿನ ಮುಂದೆ ಕುಳಿತು ಪ್ರತಿಭಟನೆ ನಡೆಸಿದ ಘಟನೆ ಕೊಪ್ಪಳ ಜಿಲ್ಲೆ ಕುಷ್ಟಗಿಯ ತಹಶೀಲ್ದಾರ್​ ಕಚೇರಿ ಮುಂದೆ ನಡೆದಿದೆ.

ಕೊಪ್ಪಳ : ಜಮೀನು ಸರ್ವೆ ಮಾಡಿ ಪೋಡಿ ಮಾಡಲು ಸರ್ವೆ ಇಲಾಖೆಯ ಅಧಿಕಾರಿಗಳು ವಿಳಂಬ ಮಾಡುತ್ತಿದ್ದಾರೆ ಎಂದು ರೈತರಿಬ್ಬರು ಪ್ರಾದೇಶಿಕ ಆಯುಕ್ತರ ಕಾರಿನ ಮುಂದೆ ಕುಳಿತು ಪ್ರತಿಭಟನೆ ನಡೆಸಿದ ಘಟನೆ ಜಿಲ್ಲೆಯ ಕುಷ್ಟಗಿಯ ತಹಶೀಲ್ದಾರ್​ ಕಚೇರಿ ಮುಂದೆ ನಡೆದಿದೆ.

ಕುಷ್ಟಗಿ ಪಟ್ಟಣದ ಮುತ್ತಮ್ಮ, ನಾಗರಾಜ ಎಂಬವರು ಪ್ರಾದೇಶಿಕ ಆಯುಕ್ತರ ಕಾರಿನ ಮುಂದೆ ಕುಳಿತು ಪ್ರತಿಭಟನೆ ನಡೆಸಿದ್ರು. ಕುಷ್ಟಗಿ ಪಟ್ಟಣದ ತಹಶೀಲ್ದಾರ್​ ಕಚೇರಿಗೆ ಪ್ರಾದೇಶಿಕ ಆಯುಕ್ತ ಸುಭೋದ್ ಯಾದವ್ ಆಗಮಿಸಿದ್ದರು. ಈ ಸಂದರ್ಭ ಅಲ್ಲಿಗೆ ಬಂದ ರೈತರಿಬ್ಬರು ಕಾರಿಗೆ ಅಡ್ಡಲಾಗಿ ಕುಳಿತು ಆಕ್ರೋಶ ವ್ಯಕ್ತಪಡಿಸಿದ್ರು.

ಕುಷ್ಟಗಿ ಪಟ್ಟಣದ ಸರ್ವೆ ನಂಬರ್ 2 ರಲ್ಲಿ ಮುತ್ತಮ್ಮ ಹಾಗೂ ವಿರುಪಾಕ್ಷಪ್ಪ ಬಂಡಿ ಜಂಟಿಯಾಗಿ 3 ಎಕರೆ 34 ಗುಂಟೆ ಭೂಮಿ ಹೊಂದಿದ್ದಾರೆ. ಜಮೀನಿನ ಸರ್ವೆಗಾಗಿ ಈ ಇಬ್ಬರು ಸುಮಾರು ಐದಾರು ಬಾರಿ ಅರ್ಜಿ ಸಲ್ಲಿಸಿ ಶುಲ್ಕ ಪಾವತಿಸಿದ್ದಾರೆ. ಆದರೆ, ಭೂಮಾಪಕರು ಸರ್ವೆ ಮಾಡದೆ ವಿಳಂಬ ಮಾಡುತ್ತಿದ್ದು,‌ ಇದರಿಂದ ರೋಸಿ ಹೋದ ರೈತರು ಈ ರೀತಿ ಪ್ರತಿಭಟನೆಗೆ ಮುಂದಾಗಿದ್ದಾರೆ.

ಪೋಡಿ ಎಂದರೇನು?

"ಪೋಡಿ" ಎಂದರೆ ದುರಸ್ಥಿ ಅಥವಾ ಭಾಗ ಮಾಡುವುದು ಎಂದರ್ಥ. ಒಬ್ಬರಿಗಿಂತ ಹೆಚ್ಚು ಆರ್​ಟಿಸಿದಾರರ ಹೆಸರು ಒಂದೇ ಸರ್ವೇ ನಂಬರ್​​ನಲ್ಲಿದ್ದರೆ, ಅದನ್ನು ಬಹುಮಾಲೀಕತ್ವದ ಆರ್​ಟಿಸಿ ಎನ್ನಲಾಗುತ್ತದೆ. ಇಂತಹ ಜಮೀನುಗಳನ್ನು ಪೋಡಿ (ಭಾಗ) ಮಾಡಬೇಕಾಗುತ್ತದೆ.