ಮಹಿಳಾ ಟಿ20 ವಿಶ್ವಕಪ್: ಕಿವೀಸ್ ವಿರುದ್ಧ ಭಾರತಕ್ಕೆ ಭಾರಿ ಅಂತರದ ಸೋಲು - New Zealand Beats India

ಟಿ20 ಕ್ರಿಕೆಟ್​ ವಿಶ್ವಕಪ್​ ಟೂರ್ನಿಯಲ್ಲಿ ಭಾರತದ ವನಿತೆಯರು ಆರಂಭಿಕ ಪಂದ್ಯದಲ್ಲೇ ಸೋಲು ಕಂಡಿದ್ದಾರೆ. ನ್ಯೂಜಿಲೆಂಡ್​ ವಿರುದ್ಧ ಬ್ಯಾಟಿಂಗ್​ನಲ್ಲಿ ನೀರಸ ಪ್ರದರ್ಶನ ತೋರಿದ ಭಾರತ ತಂಡ ಪರಾಭವಗೊಂಡಿತು.

ದುಬೈ: ಐಸಿಸಿ ಟಿ20 ಕ್ರಿಕೆಟ್​ ವಿಶ್ವಕಪ್​ ಟೂರ್ನಿಯ ಆರಂಭಿಕ ಪಂದ್ಯದಲ್ಲಿ ಭಾರತದ ವನಿತೆಯರು ಸೋಲಿನ ಆಘಾತ ಎದುರಿಸಿದ್ದಾರೆ. ನ್ಯೂಜಿಲೆಂಡ್​ ವಿರುದ್ಧದ ಹಣಾಹಣಿಯಲ್ಲಿ ಟೀಂ ಇಂಡಿಯಾ 58 ರನ್​ಗಳ ಸೋಲು ಅನುಭವಿಸಿದೆ. ಇದರೊಂದಿಗೆ ಎ ಗುಂಪಿನಲ್ಲಿ ಹರ್ಮನ್​ ಪ್ರೀತ್​ ಕೌರ್​ ಪಡೆಯ ನಿವ್ವಳ ರನ್​ ರೇಟ್​ ಮೇಲೆ ಕೂಡ ಭಾರಿ ಪರಿಣಾಮ ಬೀರಿದೆ.

ಟಾಸ್​ ಗೆದ್ದ ನ್ಯೂಜಿಲೆಂಡ್​ ನಾಯಕಿ ಸೋಫಿಯಾ ಡಿವೈನ್​ ಮೊದಲು ಬ್ಯಾಟಿಂಗ್​ ಮಾಡಲು ನಿರ್ಧರಿಸಿದರು. ನಾಯಕಿಯ ನಿರ್ಧಾರಕ್ಕೆ ತಕ್ಕಂತೆ ಕಿವೀಸ್​ ತಂಡ, ಉತ್ತಮ ಆರಂಭ ಪಡೆಯಿತು. ಸುಜಿ ಬೇಟ್ಸ್ (27) ಹಾಗೂ ಜಾರ್ಜಿಯಾ ಪ್ಲಿಮ್ಮರ್ (34) ಮೊದಲ ವಿಕೆಟ್​ಗೆ 67 ರನ್​ ಸೇರಿಸಿ ಭರ್ಜರಿ ಬುನಾದಿ ಹಾಕಿಕೊಟ್ಟರು.

ಇವರಿಬ್ಬರ ವಿಕೆಟ್​ ಪತನದ ಬಳಿಕ ಕ್ಯಾಪ್ಟನ್​ ಡಿವೈನ್​ ಮಿಂಚಿನ ಅರ್ಧಶತಕ ದಾಖಲಿಸಿ ತಂಡಕ್ಕೆ ಆಸರೆಯಾದರು. ಕೇವಲ 36 ಎಸೆತಗಳಲ್ಲಿ 7 ಬೌಂಡರಿ ಸಹಿತ ಅಜೇಯ 57 ರನ್​ ಸಿಡಿಸಿದರು. ಡಿವೈನ್​ಗೆ ಅಮೆಲಿಯಾ ಕೆರ್ (13) ಹಾಗೂ ಬ್ರೂಕ್ ಹ್ಯಾಲಿಡೇ (16) ಉತ್ತಮ ಸಾಥ್​ ನೀಡಿದರು. ಇದರೊಂದಿಗೆ ಕಿವೀಸ್​ 20 ಓವರ್​ಗಳಲ್ಲಿ 4 ವಿಕೆಟ್​ಗೆ 160 ರನ್​ ಕಲೆ ಹಾಕಿತು.

New Zealand win Match 4⃣ of the #T20WorldCup.#TeamIndia will aim to bounce back in the next game.

Scorecard ▶️ https://t.co/XXH8OT5MsK#INDvNZ | #WomenInBlue pic.twitter.com/DmzOpOq87g

— BCCI Women (@BCCIWomen) October 4, 2024

ಭಾರತದ ಬ್ಯಾಟಿಂಗ್​ ವೈಫಲ್ಯ: ಬೌಲಿಂಗ್​ನಲ್ಲಿ ಸಾಧಾರಣ ಪ್ರದರ್ಶನ ತೋರಿದ ಭಾರತ ತಂಡ, ಬ್ಯಾಟಿಂಗ್​ನಲ್ಲೂ ಕೂಡ ವೈಫಲ್ಯ ಕಂಡಿತು. 161 ರನ್​ ಗುರಿ ಬೆನ್ನಟ್ಟಿದ ವನಿತೆಯರು ಆರಂಭದಿಂದಲೂ ವಿಕೆಟ್​ ಕಳೆದುಕೊಳ್ಳುತ್ತ ಸಾಗಿದರು. ಶಫಾಲಿ ವರ್ಮಾ 2 ರನ್​ಗೆ ಔಟಾಗುವ ಮೂಲಕ ನಿರಾಸೆ ಮೂಡಿಸಿದರು. ಇದರ ಬೆನ್ನಲ್ಲೇ ಸ್ಮೃತಿ ಮಂಧಾನ (12) ಕೂಡ ಪೆವಿಲಿಯನ್​ ಸೇರಿಕೊಂಡರು.

ಬಳಿಕ, ನಾಯಕಿ ಹರ್ಮನ್‌ಪ್ರೀತ್ ಕೌರ್ (15), ಜೆಮಿಮಾ ರಾಡ್ರಿಗಸ್ (13), ರಿಚಾ ಘೋಷ್ (12) ಹಾಗೂ ದೀಪ್ತಿ ಶರ್ಮಾ (13) ನಿರೀಕ್ಷೆ ಮೂಡಿಸಿದರೂ ಕೂಡ ದೊಡ್ಡ ರನ್ ಕಾಣಿಕೆ ನೀಡುವಲ್ಲಿ ಸಾಧ್ಯವಾಗಲಿಲ್ಲ. ಕೆಳ ಹಂತದ ಬ್ಯಾಟರ್​ಗಳು ಯಾರೂ ಕೂಡ ಎರಡಂಕಿ ಮೊತ್ತವನ್ನೂ ತಲುಪದೆ ವಿಕೆಟ್​ ಒಪ್ಪಿಸಿದ ಹಿನ್ನೆಲೆಯಲ್ಲಿ ಟೀಂ ಇಂಡಿಯಾ 19 ಓವರ್​ಗಳಲ್ಲೇ 102 ರನ್​ಗಳಿಗೆ ಆಲೌಟ್​ ಆಯಿತಲ್ಲದೆ, 58 ರನ್​ಗಳ ಅಂತರದ ಸೋಲು ಕಂಡಿತು.

ನ್ಯೂಜಿಲೆಂಡ್​ ಪರ ಮಾರಕ ದಾಳಿ ನಡೆಸಿದ ರೋಸ್ಮರಿ ಮೈರ್ 19 ರನ್​ಗೆ 4, ಲೀ ತಹುಹು 15ಕ್ಕೆ 3 ಹಾಗೂ ಈಡನ್ ಕಾರ್ಸನ್ 34ಕ್ಕೆ 2 ವಿಕೆಟ್​ ಪಡೆದು ಭಾರತೀಯರ ಕುಸಿತಕ್ಕೆ ಕಾರಣರಾದರು. ಈ ಗೆಲುವಿನೊಂದಿಗೆ ಕಿವೀಸ್ ವನಿತೆಯರು ಟೂರ್ನಿಯಲ್ಲಿ ಅದ್ಭುತ ಆರಂಭ ಪಡೆದಿದ್ದಾರೆ. ಅಲ್ಲದೆ, ಸತತ 10 ಟಿ20 ಪಂದ್ಯಗಳ ಸೋಲಿನ ಸರಪಳಿಯಿಂದ ಹೊರಬಂದರು.

ಇನ್ನೊಂದೆಡೆ, ಎ ಗುಂಪಿನಲ್ಲಿ -2.900 ರನ್​​ರೇಟ್​ನೊಂದಿಗೆ ಹರ್ಮನ್​ ಪ್ರೀತ್​ ಪಡೆದ ಕೊನೆಯ ಸ್ಥಾನಕ್ಕೆ ಜಾರಿದೆ. ಮುಂದಿನ ಪಂದ್ಯದಲ್ಲಿ ಅ.6ರಂದು ಭಾರತ ತಂಡ ಸಾಂಪ್ರದಾಯಿಕ ಎದುರಾಳಿ ಪಾಕಿಸ್ತಾನದ ವಿರುದ್ಧ ಕಣಕ್ಕಿಳಿಯಲಿದೆ.

ಇದನ್ನೂ ಓದಿ: ​ಅಂತಾರಾಷ್ಟ್ರೀಯ ಕ್ರಿಕೆಟ್​ನಲ್ಲಿ ಒಮ್ಮೆಯೂ ಔಟಾಗದ ಭಾರತೀಯ ಆಟಗಾರರು ಇವರು! - Indian Players Who Never Got Out