ಡಿಕೆಶಿ ಆಪ್ತ ಛಬ್ಬಿ ವಿರುದ್ಧ ಸಿದ್ದು ಬೆಂಬಲಿಗ ಸಂತೋಷ ಲಾಡ್ ಕೈ ಮೇಲು!

ಒಂದು ಕಡೆ ಕಾಂಗ್ರೆಸ್ ಪಕ್ಷದಲ್ಲಿ ಸಿಎಂ ಗಾದಿಯ ವಿಚಾರವಾಗಿ ಬಣ ರಾಜಕೀಯ ಜೋರಾಗಿದೆ. ಡಿ.ಕೆ. ಶಿವಕುಮಾರ್​ ಹಾಗೂ ಸಿದ್ದರಾಮಯ್ಯ ಬಣಗಳ ನಡುವಿನ ಮುನಿಸು ಒಂದೊಂದಾಗಿ ಬಹಿರಂಗವಾಗುತ್ತಿವೆ. ಈಗ ಕಲಘಟಗಿಯಲ್ಲಿ ಎರಡು ಬಣಗಳ ಕಿತ್ತಾಟ ಜೋರಾಗಿದೆ.

ಹುಬ್ಬಳ್ಳಿ: ಕಲಘಟಗಿ ವಿಧಾನಸಭಾ ಕ್ಷೇತ್ರದಲ್ಲಿ ಸಿದ್ದರಾಮಯ್ಯ ಆಪ್ತರಾದ ಮಾಜಿ ಸಚಿವ ಸಂತೋಷ ಲಾಡ್ ಮತ್ತು ಡಿಕೆ ಶಿವಕುಮಾರ್​ ಆಪ್ತರಾದ ಮಾಜಿ ಪರಿಷತ್ ಸದಸ್ಯ ನಾಗರಾಜ್ ಛಬ್ಬಿ ನಡುವೆ ಟಿಕೆಟ್​ಗಾಗಿ ಪೈಪೋಟಿ ನಡೆಯುತ್ತಿದೆ.

ಜೂನ್ 12 ರಂದು ಗುರುನಾಥ ದಾನವೇನವರ ಅವರನ್ನ ಕಲಘಟಗಿ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷರನ್ನಾಗಿ ಡಿಕೆಶಿ ನೇಮಕ ಮಾಡಿದ್ದರು. ಡಿಕೆ ಶಿವಕುಮಾರ್​ ಮೂಲಕ ದಾನವೇನವರಗೆ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷ ಪಟ್ಟ ಕಟ್ಟುವಲ್ಲಿ ನಾಗರಾಜ್ ಛಬ್ಬಿ ಯಶಸ್ವಿಯಾಗಿದ್ರು‌. ಸಂತೋಷ ಲಾಡ್ ಬಲಗೈ ಬಂಟ ಮಂಜುನಾಥ ಮುರಳ್ಳಿಯನ್ನ ಅಧ್ಯಕ್ಷ ಸ್ಥಾನದಿಂದ ತೆಗೆಯಲಾಗಿತ್ತು. ಇದರಿಂದ ಸಂತೋಷ ಲಾಡ್​ಗೆ ಭಾರಿ ಮುಖಭಂಗವಾಗಿತ್ತು.

ಡಿಕೆಶಿ ಆಪ್ತ ನಾಗರಾಜ್ ಛಬ್ಬಿ ವಿರುದ್ಧ ಸಿದ್ದು ಬೆಂಬಲಿಗ ಸಂತೋಷ ಲಾಡ್ ಕೈ ಮೇಲು!

ಈಗ ಮತ್ತೆ ಸಂತೋಷ್​ ಲಾಡ್ ಮೇಲುಗೈ ಸಾಧಿಸಿದ್ದಾರೆ. ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷರ ನೇಮಕಾತಿಯನ್ನು ತಡೆ ಹಿಡಿಸುವಲ್ಲಿ ಸಂತೋಷ ಲಾಡ್​ ಯಶಸ್ವಿಯಾಗಿದ್ದಾರೆ. ಸಂಡೂರಿಗೆ ಸಿದ್ದರಾಮಯ್ಯ ಬಂದು ಹೋಗುತ್ತಿದ್ದಂತೆ ಆದೇಶ ಹೊರಬಿದ್ದಿದೆ. ಕೆಪಿಸಿಸಿ ಕಾರ್ಯಾಧ್ಯಕ್ಷ ಸಲೀಂ ಅಹ್ಮದ್ ಮೂಲಕ ಅಧ್ಯಕ್ಷರ ನೇಮಕಾತಿಗೆ ತಡೆ‌ ತರಿಸುವಲ್ಲಿ ಯಶಸ್ವಿಯಾಗಿದ್ದು, ಸ್ಥಳಿಯ ಮಟ್ಟದಲ್ಲೂ ಸಿದ್ದರಾಮಯ್ಯ ಬಣ ಮೇಲುಗೈ ಸಾಧಿಸುತ್ತಿದ್ದಾರೆ ಎಂದು ವಿಶ್ಲೇಷಿಸಲಾಗುತ್ತಿದೆ.