ಮಂಗಳೂರು : ಕೋವಿಡ್ ಲಾಕ್ ಡೌನ್ ಕಾರಣ ದಕ್ಷಿಣ ಕನ್ನಡ ಜಿಲ್ಲೆಯ ಜೀವನಾಡಿಗಳಾಗಿರುವ ಖಾಸಗಿ ಬಸ್ಗಳ ಸಂಚಾರ ಸ್ಥಗಿತಗೊಂಡು ಎರಡು ತಿಂಗಳಾಯಿತು. ಇದರಿಂದ ಜನರು ಸಂಕಷ್ಟ ಅನುಭವಿಸಿದಲ್ಲದೆ, ಬಸ್ ಚಾಲಕ, ಮಾಲಕರು ತೀವ್ರ ನಷ್ಟಕ್ಕೆ ಸಿಲುಕಿದ್ದಾರೆ. ಈ ನಡುವೆ ಬಸ್ ಮಾಲಕರಿಗೆ ಹೊಸತೊಂದು ಸವಾಲು ಎದುರಾಗಿದೆ.
ರಾಜ್ಯದಲ್ಲಿ ಕೋವಿಡ್ ಎರಡನೇ ಅಲೆ ನಿಯಂತ್ರಣಕ್ಕೆ ಬರುತ್ತಿದ್ದಂತೆ ಸುಮಾರು ಒಂದೂವರೆ ತಿಂಗಳಿನಿಂದ ಜಾರಿಯಲ್ಲಿದ್ದ ಲಾಕ್‌ಡೌನ್ ತೆರವುಗೊಳಿಸಲಾಗಿದೆ. ಆದರೆ, ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಕೋವಿಡ್ ನಿಯಂತ್ರಣಕ್ಕೆ ಬಾರದ ಕಾರಣ ಜೂನ್ 21 ರವರೆಗೆ ಲಾಕ್ ಡೌನ್ ವಿಸ್ತರಿಸಲಾಗಿದೆ. ಜೂನ್ 21 ರ ಬಳಿಕ ಲಾಕ್ ಡೌನ್ ತೆರವುಗೊಂಡರೂ, ಖಾಸಗಿ ಬಸ್ಗಳ ಓಡಾಟ ಪ್ರಾರಂಭಿಸಲು ಸಾಧ್ಯವಿಲ್ಲ.
ಯಾಕೆಂದರೆ, ಸುದೀರ್ಘ ಸಮಯದಿಂದ ಬಸ್ಗಳು ನಿಂತಲ್ಲೇ ನಿಂತಿರುವುದರಿಂದ ಅವುಗಳನ್ನು ಮತ್ತೆ ಓಡಾಟಕ್ಕೆ ಅನಿಗೊಳಿಸಬೇಕಾದರೆ ಕನಿಷ್ಠ ಅರ್ಧ ಲಕ್ಷದಷ್ಟು ಖರ್ಚು ಮಾಡಬೇಕು. ಬಸ್ಗಳು ಚಾಲನೆಯಿಲ್ಲದೆ ಅವುಗಳ ಟಯರ್ಗಳ ರಬ್ಬರ್ ಸಾಮರ್ಥ್ಯ ಕಳೆದುಕೊಂಡಿದೆ. ನಿಂತಿರುವ ಕೆಲ ಬಸ್ಗಳ ಟೈರ್ ಬಳಿ ಸಸಿಗಳು ಬೆಳೆದಿದೆ.
ಕೆಲವು ಬಸ್ಗಳ ಬ್ಯಾಟರಿಗಳು ಹಾಳಾಗಿವೆ, ಇಂಜಿನ್ ಆಯಿಲ್ ಬದಲಾಯಿಸಬೇಕಿದೆ. ಬಸ್ನಲ್ಲಿರುವ ಸೆನ್ಸಾರ್ಗಳನ್ನು ರಿಬೂಟ್ ಮಾಡಬೇಕಿದೆ. ಇನ್ನೂ ಕೆಲ ಕಡೆಗಳಲ್ಲಿ ನಿಂತಿದ್ದ ಬಸ್ಗಳು ಬೆಂಕಿಗಾಹುತಿಯಾಗಿವೆ. ಇವೆಲ್ಲ ಸರಿಪಡಿಸಲು ಸುಮಾರು 50 ರಿಂದ 60 ಸಾವಿರ ರೂ. ಖರ್ಚು ಮಾಡಬೇಕು. ಮಂಗಳೂರು ನಗರ ಸಾರಿಗೆ ಸೇರಿದಂತೆ ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಸುಮಾರು 2 ಸಾವಿರದಷ್ಟು ಬಸ್ಗಳು ನಿಂತಲ್ಲೇ ನಿಂತಿವೆ. ಬಸ್ಗಳು ಓಡಾಡದೆ, ತೀವ್ರ ಅರ್ಥಿಕ ಸಂಕಷ್ಟಕ್ಕೆ ಸಿಲುಕಿರುವ ಬಸ್ ಮಾಲೀಕರು, ಬಸ್ ರಿಪೇರಿಗೆ ಎಲ್ಲಿಂದ ಹಣ ತರುವುದು ಎಂಬ ಚಿಂತೆಯಲ್ಲಿದ್ದಾರೆ.
ಕಳೆದ ಬಾರಿಯ ಲಾಕ್ ಡೌನ್ ಹೊಡೆತದಿಂದ ಕೊಂಚ ಚೇತರಿಸಿಕೊಳ್ಳುತ್ತಿದ್ದ ಸಂದರ್ಭ ಮತ್ತೊಮ್ಮೆ ಲಾಕ್ ಡೌನ್ ಜಾರಿಯಾದ್ದರಿಂದ ಬಸ್ ಮಾಲೀಕರಿಗೆ ಗಾಯದ ಮೇಲೆ ಬರೆ ಎಳೆದಂತಾಗಿದೆ. ಈ ನಡುವೆ ಡೀಸೆಲ್ ಬೆಲೆ ಕೂಡ ಜಾಸ್ತಿಯಾಗಿದೆ. ಇದರೊಂದಿಗೆ ಈಗ ಬಸ್ ರಿಪೇರಿ ಮಾಡಿಸಬೇಕು ಸಂದಿಗ್ಥತೆ ಎದುರಾಗಿದೆ. ಹಾಗಾಗಿ ಬಸ್ ಮಾಲೀಕರು, ಚಾಲಕರಿಗೆ ದಿಕ್ಕೇ ತೋಚದಂತಾಗಿದೆ.
ಬಸ್ ಗಳು ರಸ್ತೆಗಿಳಿಯಬೇಕಾದರೆ ಅದು ಫಿಟ್ನೆಸ್ ಹೊಂದಿರಬೇಕಾಗುತ್ತದೆ. ಅನ್ ಲಾಕ್ ಆಯಿತೆಂದು ನೇರವಾಗಿ ಬಸ್ಗಳನ್ನು ರಸ್ತೆಗಿಳಿಸುವಂತಿಲ್ಲ. ಇದರಿಂದ ಬಸ್ ಮಾಲಕರಿಗೆ ಆ, ಬಸ್ ರಿಪೇರಿ ಮಾಡಿಸುವುದಾ, ಇಲ್ಲಾ ಬಸ್ ಓಡಿಸುವುದಾ ಎಂಬ ಚಿಂತೆ ಶುರುವಾಗಿದೆ. ಫಿಟ್ನೆಸ್ ಇಲ್ಲದೆ ಬಸ್ ಓಡಿಸಿದರೆ ಸಾರಿಗೆ ನಿಯಮ ಉಲ್ಲಂಘಿಸಿದ ಆರೋಪದಲ್ಲಿ ಬಸ್ ಸೀಜ್ ಆಗಬಹುದು, ಇಲ್ಲವೇ ಅಪಾಯ ಎದುರಾಗಬಹುದು. ಇವೆಲ್ಲವನ್ನು ನಿರ್ವಹಿಸುವುದು ಬಸ್ ಮಾಲಕರಿಗೆ ದೊಡ್ಡ ಸವಾಲಾಗಿದೆ.
ಇದನ್ನೂ ಓದಿ: ಆದೇಶ ಪಾಲಿಸದ ಮಂಗಳೂರು ಪಾಲಿಕೆ : ಸೂಪರ್ ಸೀಡ್ ಎಚ್ಚರಿಕೆ ನೀಡಿದ ಹೈಕೋರ್ಟ್
