ಕಾಫಿ ನಾಡಲ್ಲಿ ವರುಣನ ಆರ್ಭಟ: ಸಂಕಷ್ಟದಲ್ಲಿ ಜನತೆ

ಚಿಕ್ಕಮಗಳೂರು ಜಿಲ್ಲೆಯ ಮಲೆನಾಡು ಭಾಗದಲ್ಲಿ ಮಳೆಯ ರುದ್ರನರ್ತನಕ್ಕೆ ನೂರಾರು ಮನೆಗಳು ಮಣ್ಣು ಪಾಲಾಗಿವೆ. ನಿರಂತರ ಮಳೆಯಿಂದ ಹೊಲ-ಗದ್ದೆ, ತೋಟಗಳು ನೀರು ಪಾಲಾಗಿದೆ. ಮಲೆನಾಡು ಜನರ ಆಸೆ ಜಲ ರಾಕ್ಷಸನ ಒಡಲು ಸೇರಿ ಹೋಗಿದ್ದು, ಈ ಘಟನೆಯಿಂದ ಸಾವಿರಾರೂ ಜನರ ಬದುಕು ಬೀದಿಗೆ ಬಂದಿದೆ.

ಚಿಕ್ಕಮಗಳೂರು: ಮಲೆನಾಡಲ್ಲಿ ಸುರಿದ ಮಳೆಗೆ ಹಳ್ಳ -ಕೊಳ್ಳಗಳು ಉಕ್ಕಿ ಹರಿಯುತ್ತಿದ್ದು, ಮಲೆನಾಡಿಗರ ಬದುಕು ಬರಿದಾಗಿದೆ. ಇರೋಕೆ ಸೂರು ಇಲ್ಲದ್ದಂತೆ ಎಲ್ಲ ಜಾಗವನ್ನು ವರುಣ ಕಿತ್ತುಕೊಂಡು ಹೋಗಿದ್ದಾನೆ. ಅಂದು ದುಡಿದು ಅಂದೇ ತಿನ್ನೋ ಮಲೆನಾಡಿನ ಸಾವಿರಾರು ಜನ ಇದೀಗ ಹಲವಾರು ಸವಾಲುಗಳನ್ನು ಎದುರಿಸುತ್ತಿದ್ದಾರೆ.

ಮಲೆನಾಡಿನ ಜಲ ರಾಕ್ಷಸನ ರುದ್ರನರ್ತನಕ್ಕೆ ಬದುಕನ್ನೆ ಕಳೆದುಕೊಂಡವರು ಸಾವಿರಾರು ಜನ. ಅವರೆಲ್ಲರೂ ನಿರಾಶ್ರಿತ ಕೇಂದ್ರದಲ್ಲಿದ್ದಾರೆ. ಮಲೆನಾಡ ಮಳೆ ಬೆಟ್ಟ-ಗುಡ್ಡ ಎಲ್ಲವನ್ನೂ ತಿಂದು-ತೇಗಿ ನೀರು ಕುಡಿದಿದೆ.ಇಲ್ಲಿನ ಪರಿಸ್ಥಿತಿ ನೋಡಿದರೇ ಮಲೆನಾಡಿನ ಜನರು ಮುಂದೆ ಹೇಗೆ ದುಡಿಯುತ್ತಾರೆ, ಹೊಟ್ಟೆಗೆ ಹಿಟ್ಟು ಹೇಗೆ ಪಡೆದುಕೊಳ್ಳುತ್ತಾರೆ ಅನ್ನೋದು ಯಕ್ಷ ಪ್ರಶ್ನೆಯಾಗಿದೆ. ಆ ದಿನದ ಘಟನೆಗಳು ಇಂದಿಗೂ ಇಲ್ಲಿನ ಜನರನ್ನು ಬೆಚ್ಚಿ ಬೀಳಿಸುತ್ತಿದ್ದು, ಮತ್ತೆ ಯಾವುದೇ ಕಾರಣಕ್ಕೂ ಈ ರೀತಿಯಾ ಅವಾಂತರಗಳು ಸೃಷ್ಟಿ ಆಗೋದು ಬೇಡಾ ಎಂದೂ ದೇವರಲ್ಲಿ ಪ್ರಾರ್ಥನೆ ಮಾಡುತ್ತಿದ್ದಾರೆ.

ಒಟ್ಟಾರೆಯಾಗಿ ಈ ಮಳೆ ಮಲೆನಾಡು ಜನರ ಮನೆ ಜೊತೆ ಹೊಲ-ಗದ್ದೆ-ತೋಟಗಳನ್ನೆಲ್ಲಾ ಕೊಚ್ಚಿಕೊಂಡು ಮತ್ತೆಲ್ಲಿಗೋ ತೆಗೆದುಕೊಂಡು ಹೋಗಿ ಬಿಟ್ಟಿದೆ. ನಮ್ಮ ಮುಂದಿನ ಬದುಕು ಹೇಗೆ ಎಂದು ಪ್ರತಿಯೊಬ್ಬರೂ ಯೋಚನೆ ಮಾಡುವಂತಹ ಪರಿಸ್ಥಿತಿ ಈಗ ತಲೆ ದೋರಿದೆ.