ಭಾಲ್ಕಿ ತಾಲೂಕಿನಲ್ಲಿ ಅಬಕಾರಿ ಇಲಾಖೆ ಸರಣಿ ದಾಳಿ.. ಅಕ್ರಮ ಮದ್ಯ, ಭಟ್ಟಿ ಸಾರಾಯಿ ಜಪ್ತಿ..

6 ಲೀಟರ್ ಕಳ್ಳಭಟ್ಟಿ, 10,800 ಲೀಟರ್ ಮದ್ಯ ಹಾಗೂ ಕಿರಾಣಿ ಅಂಗಡಿಯಲ್ಲಿದ್ದ 93,600 ಲೀಟರ್ ಬಿಯರ್ ಜಪ್ತಿ ಮಾಡಿರುವ ಪೊಲೀಸರು.

ಬೀದರ್ : ಲಾಕ್‌ಡೌನ್ ಸಂದರ್ಭವನ್ನೇ ಬಂಡವಾಳ ಮಾಡಿಕೊಂಡು ಅಕ್ರಮ ಮದ್ಯ ಮಾರಾಟ ಮಾಡುತ್ತಿದ್ದ ಕಳ್ಳಭಟ್ಟಿ ಸಾರಾಯಿ ಅಡ್ಡೆ ಮೇಲೆ ದಾಳಿ ನಡೆಸಿ ಅಬಕಾರಿ ಪೊಲೀಸರು ಆರೋಪಿಗಳನ್ನು ಬಂಧಿಸಿದ್ದಾರೆ.

ಜಿಲ್ಲೆಯ ಭಾಲ್ಕಿ ಪಟ್ಟಣದ ಜನತಾ ಕಾಲೋನಿಯಲ್ಲಿ 6 ಲೀಟರ್ ಕಳ್ಳಭಟ್ಟಿ ಸಾರಾಯಿ, ಇಂಚೂರ್ ಗ್ರಾಮದಲ್ಲಿ ಅಕ್ರಮ ಮಾರಾಟಕ್ಕಾಗಿ ಸಂಗ್ರಹಿಸಿಟ್ಟಿದ್ದ 10,800 ಲೀಟರ್ ಮದ್ಯ ಹಾಗೂ ಖೂಂದಪೂರ್ ಗ್ರಾಮದ ಕಿರಾಣಿ ಅಂಗಡಿಯಲ್ಲಿದ್ದ 93,600 ಲೀಟರ್ ಬಿಯರ್ ಜಪ್ತಿ ಮಾಡಿರುವ ಪೊಲೀಸರು, ಮೂರು ಪ್ರತ್ಯೇಕ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.

ಅಬಕಾರಿ ಉಪ ಆಯುಕ್ತ ವೀರಣ್ಣ ಬಾಗೇವಾಡಿ ಮಾರ್ಗದರ್ಶನದಲ್ಲಿ ಉಪ ಅಧೀಕ್ಷಕ ಅನಿಲ್‌ಕುಮಾರ್ ಪೊದ್ದಾರ್ ನೇತೃತ್ವದಲ್ಲಿ ತಹಶೀಲ್ದಾರ್​ ಅಣ್ಣಾರಾವ್ ಪಾಟೀಲ್, ಇನ್ಸ್​ಪೆಕ್ಟರ್​ ಅನಿಲ್‌ಕುಮಾರ್, ಸಬ್‌ಇನ್ಸ್​ಪೆಕ್ಟರ್ ದೌಲತ್ ರೈ ಹಾಗೂ ಇತರ ಸಿಬ್ಬಂದಿ ಕಾರ್ಯಾಚರಣೆಯಲ್ಲಿ ಪಾಲ್ಗೊಂಡಿದ್ದರು.