ಬೆಂಗಳೂರು: "ಲಿಬಿಯಾ ದೇಶದಲ್ಲಿ ನೆಲೆಸಿದ್ದ ಅನಿವಾಸಿ ಕನ್ನಡಿಗರು ಅಲ್ಲಿ ತಲೆದೋರಿದ ಆಂತರಿಕ ಬಿಕ್ಕಟ್ಟಿನಿಂದಾಗಿ ವಾಪಾಸು ತಾಯ್ನಾಡಿಗೆ ಬಂದು ಉದ್ಯೋಗ ಕಳೆದುಕೊಂಡು ಆರ್ಥಿಕ ಸಮಸ್ಯೆ ಎದುರಿಸುತ್ತಿದ್ದರು. ಇದೀಗ ಭಾರತೀಯರು ಲಿಬಿಯಾಗೆ ತೆರಳುವ ನಿರ್ಬಂಧವನ್ನು ಸಡಿಲಿಸಲಾಗಿದೆ" ಎಂದು ಅನಿವಾಸಿ ಭಾರತೀಯ ಸಮಿತಿಯ ಉಪಾಧ್ಯಕ್ಷೆ ಡಾ. ಆರತಿ ಕೃಷ್ಣ ತಿಳಿಸಿದ್ದಾರೆ.
ವಿಕಾಸಸೌಧದಲ್ಲಿ ಇಂದು ಸುದ್ದಿಗೋಷ್ಠಿ ನಡೆಸಿ ಮಾಹಿತಿ ನೀಡಿದ ಅವರು, "ಭಾರತೀಯರ ಜೀವ ಮತ್ತು ಜೀವನದ ಹಿತದೃಷ್ಟಿಯಿಂದ ಭಾರತ ಸರ್ಕಾರವು ಭಾರತೀಯರು ಲಿಬಿಯಾ ದೇಶಕ್ಕೆ ತೆರಳದಂತೆ ನಿರ್ಬಂಧ ಹೇರಿತ್ತು. ಆದರೆ ನಿರ್ಬಂಧ ಚಾಲ್ತಿಯಲ್ಲಿದ್ದ ಕಾರಣ ಲಿಬಿಯಾ ದೇಶದಲ್ಲಿ ಸಮಸ್ಯೆ ತಿಳಿಯಾದರೂ ಭಾರತೀಯರು ಅದರಲ್ಲೂ ಕನ್ನಡಿಗರು ಮತ್ತೆ ಲಿಬಿಯಾ ದೇಶಕ್ಕೆ ತೆರಳಿ ತಮ್ಮ ಉದ್ಯೋಗ ಅಥವಾ ವ್ಯವಹಾರವನ್ನು ಮುಂದುವರೆಸಲು ಸಾಧ್ಯವಾಗುತ್ತಿರಲಿಲ್ಲ. ಈ ಸಮಸ್ಯೆಗೆ ಸಂಬಂಧಿಸಿದಂತೆ ಕೇಂದ್ರ ಸರ್ಕಾರದ ಗಮನಕ್ಕೆ ತಂದು ಸೂಕ್ತ ಪರಿಹಾರವನ್ನು ಕೋರಲಾಗಿತ್ತು. ಈ ಹಿನ್ನೆಲೆ ಇದೀಗ ಭಾರತೀಯರು ಲಿಬಿಯಾಗೆ ತೆರಳಲು ನಿರ್ಬಂಧ ಸಡಿಲಿಸಲಾಗಿದೆ" ಎಂದು ತಿಳಿಸಿದರು.
ಭಾರತೀಯರು ಅನೇಕ ವರ್ಷಗಳಿಂದ ಪ್ರಪಂಚದ ವಿವಿಧ ದೇಶಗಳಿಗೆ ಕೆಲಸ ಅರಸಿ ವಲಸೆ ಹೋಗುತ್ತಿರುವುದು ಸರ್ವೇ ಸಾಮಾನ್ಯವಾದ ಸಂಗತಿಯಾಗಿದೆ. ಈ ಪೈಕಿ ಕೌಶಲ್ಯ ಹೊಂದಿದ ಹಾಗೂ ಕೌಶಲ್ಯ ರಹಿತ ಕೆಲಸಗಾರರು ಹೆಚ್ಚಿನ ಸಂಖ್ಯೆಯಲ್ಲಿ ಮಧ್ಯಮ ಹಾಗೂ ಕೆಳವರ್ಗಕ್ಕೆ ಸೇರಿದವರಾಗಿದ್ದಾರೆ. ಇತ್ತೀಚಿನ ದಿನಗಳಲ್ಲಿ ಭಾರತದಲ್ಲಿರುವ ನಿರುದ್ಯೋಗಿ ಯುವಜನಾಂಗ ಬದುಕನ್ನು ಕಟ್ಟಿಕೊಳ್ಳುವ ಕನಸಿನೊಂದಿಗೆ ಅನೇಕ ದೇಶಗಳಲ್ಲಿ ಪ್ರತಿಕೂಲ ಕೆಲಸದ ವಾತಾವರಣವಿದ್ದರೂ ಕೂಡ ಕೆಲಸವನ್ನರಸಿ ಹೋಗುತ್ತಿರುವುದು ತಿಳಿದ ವಿಷಯ.
"ಈ ರೀತಿ ಸಾವಿರಾರು ಭಾರತೀಯರು ಆಫ್ರಿಕಾ ಖಂಡದಲ್ಲಿರುವ ಲಿಬಿಯಾ ದೇಶದಲ್ಲಿ ಪೆಟ್ರೋಲಿಯಂ ಉತ್ಪನ್ನದ ಕಂಪನಿಗಳಲ್ಲಿ ಕೆಲಸ ನಿರ್ವಹಿಸಲು ಅನೇಕ ವರ್ಷಗಳಿಂದ ನೆಲೆಸಿದ್ದಾರೆ. ಆದರೆ 2011ರಲ್ಲಿ ನಡೆದ ಆಂತರಿಕ ರಾಜಕೀಯ ಸಂಘರ್ಷದಿಂದಾಗಿ ಸುಮಾರು 18 ಸಾವಿರಕ್ಕೂ ಹೆಚ್ಚು ಭಾರತೀಯರನ್ನು ವಾಪಾಸು ಕರೆತರಲಾಗಿತ್ತು. 2014ರಲ್ಲಿ ಪರಿಸ್ಥಿತಿ ಇನ್ನಷ್ಟು ಉದ್ವಿಗ್ನಗೊಂಡಾಗ ಸುಮಾರು 4 ಸಾವಿರ ಜನರನ್ನು ಕರೆತರಲಾಗಿತ್ತು." ಎಂದು ತಿಳಿಸಿದರು.
"ಆದರೆ ತದನಂತರವೂ ಕೂಡ ಲಿಬಿಯಾದಲ್ಲಿ ಐಸಿಸ್‌ ಉಗ್ರರು ಮತ್ತು ಸರ್ಕಾರದ ನಡುವೆ ಆಂತರಿಕ ಸಂಘರ್ಷ ಮುಂದುವರೆದಿತ್ತು. 2016ರಲ್ಲಿ ಎರಡೂ ಬಣಗಳ ನಡುವೆ ನಡೆದ ಗುಂಡಿನ ಕಾಳಗದಲ್ಲಿ ಭಾರತೀಯ ಮೂಲದ ದಾದಿಯೊಬ್ಬರು ಮರಣಹೊಂದಿದ್ದರು. ಆ ಕೂಡಲೇ ಭಾರತೀಯ ವಿದೇಶಾಂಗ ವ್ಯವಹಾರ ಸಚಿವಾಲಯವು 2016 ರ ಮೇ 23ರಂದು ಆದೇಶವನ್ನು ಹೊರಡಿಸಿ ಭಾರತೀಯರು ಯಾವುದೇ ಉದ್ದೇಶಗಳಿಗಾಗಿ ಲಿಬಿಯಾ ದೇಶಕ್ಕೆ ಪ್ರವಾಸ ಕೈಗೊಳ್ಳದಂತೆ ನಿರ್ಬಂಧವನ್ನು ಹೇರಿತ್ತು. ನಂತರದ ದಿನಗಳಲ್ಲಿ ಅಲ್ಲಿನ ಪ್ರಕ್ಷುಬ್ದ ವಾತಾವರಣವು ತಿಳಿಗೊಂಡ ಬಳಿಕ ಅಲ್ಲಿ ನೆಲೆಸಿದ್ದ ಭಾರತೀಯರು ವಿದೇಶಾಂಗ ವ್ಯವಹಾರ ಸಚಿವಾಲಯಕ್ಕೆ ಹಾಗೂ ರಾಜಕೀಯ ಮುಖಂಡರುಗಳ ಮೂಲಕ ಪ್ರಯಾಣ ನಿರ್ಬಂಧವನ್ನು ತೆರವುಗೊಳಿಸಲು ಮನವಿ ಮಾಡಿಕೊಂಡಿದ್ದರೂ ಯಾವುದೇ ಪ್ರಯೋಜನವಾಗಿರಲಿಲ್ಲ" ಎಂದರು.
"ಈ ನಡುವೆ ಅನಧಿಕೃತ ಮಾನವ ಸಂಪನ್ಮೂಲ ಸಂಸ್ಥೆಗಳು ಲಿಬಿಯಾ ದೇಶದ ಮೂಲಕ ವಿವಿಧ ದೇಶಗಳಿಗೆ ಅಕ್ರಮ ಮಾನವ ಕಳ್ಳಸಾಗಾಣಿಕೆ ವ್ಯವಹಾರವನ್ನು ಪ್ರಾರಂಭಿಸಿದ್ದರಿಂದಾಗಿ ವಿವಿಧ ದೇಶಗಳಲ್ಲಿನ ರಾಯಭಾರಿ ಕಚೇರಿಗಳು ಅನೇಕ ಭಾರತೀಯರ ಪಾಸ್‌ಪೋರ್ಟ್‌ಗಳನ್ನು ವಶಪಡಿಸಿಕೊಂಡಿದ್ದಾರೆ. ಇದರಿಂದಾಗಿ ಅನೇಕ ಭಾರತೀಯರು ಕೆಲಸ ಕಳೆದು ಕೊಂಡಿದ್ದಲ್ಲದೇ ತಮ್ಮ ಕುಟುಂಬಗಳಿಂದ ನೂರಾರು ದಿನಗಳು ದೂರ ಉಳಿಯಬೇಕಾದ ಅನಿವಾರ್ಯತೆ ಉಂಟಾಗಿತ್ತು." ಎಂದು ಹೇಳಿದರು.
"ಆದರೆ ಈ ನಡುವೆ ಅನೇಕ ಭಾರತೀಯರು ಅನಿವಾರ್ಯತೆಯ ಕಾರಣ ಲಿಬಿಯಾ ದೇಶದಲ್ಲಿ ಉಳಿದು ಕೆಲಸ ನಿರ್ವಹಿಸುತ್ತಿದ್ದರು. ಈ ಮಧ್ಯೆ ಭಾರತ ದೇಶಕ್ಕೆ ವಾಪಸ್ ಆಗಿದ್ದ ಅನೇಕ ಜನರು ವಿಸಾ ಅವಧಿ ಮುಗಿಯುವ ಮುನ್ನ ಪುನಃ ಲಿಬಿಯಾ ದೇಶಕ್ಕೆ ವಾಪಸ್ ಆಗುವ ಪ್ರಯತ್ನದಲ್ಲಿದ್ದರು. ಆದರೆ ಪ್ರವಾಸ ನಿರ್ಬಂಧದ ಕಾರಣ ಕಾರ್ಯ ಸಾಧ್ಯವಾಗಿರಲಿಲ್ಲ. ಲಿಬಿಯಾದಲ್ಲಿ ವಾಸಿಸುತ್ತಿದ್ದ ಭಾರತೀಯರು ವಿವಿಧ ಸಂಘಟನೆಗಳ ಮೂಲಕ ಭಾರತೀಯ ವಿದೇಶಾಂಗ ವ್ಯವಹಾರ ಸಚಿವಾಲಯಕ್ಕೆ ಅನೇಕ ಮನವಿಗಳನ್ನು ಸಲ್ಲಿಸಿದ್ದರೂ ಪ್ರಯೋಜನವಾಗಿರಲಿಲ್ಲ." ಎಂದು ತಿಳಿಸಿದರು.
"ಈ ಹಿನ್ನಲೆಯಲ್ಲಿ ಅನೇಕ ಕರ್ನಾಟಕ ಮೂಲದ ಅನಿವಾಸಿ ಭಾರತೀಯರು ತಮ್ಮ ಕಚೇರಿಗೆ ಭೇಟಿ ನೀಡಿ ಲಿಬಿಯಾ ದೇಶದಲ್ಲಿ ತಾವು ಅನುಭವಿಸುತ್ತಿರುವ ಕಷ್ಟಗಳ ನಡುವೆ ತಮ್ಮ ಭವಿಷ್ಯವನ್ನು ರೂಪಿಸಿಕೊಳ್ಳಲು ತಾವುಗಳು ವಾಪಸ್ ಲಿಬಿಯಾ ದೇಶಕ್ಕೆ ಹೋಗಲೇಬೇಕಾದ ಅನಿವಾರ್ಯತೆಯನ್ನು ತಿಳಿಸಿದ್ದರು. ಹಾಗಾಗಿ, ದೆಹಲಿಯಲ್ಲಿರುವ ಭಾರತೀಯ ವಿದೇಶಾಂಗ ವ್ಯವಹಾರ ಸಚಿವಾಲಯಕ್ಕೆ ಭೇಟಿ ನೀಡಿ ಲಿಬಿಯಾ ದೇಶದಲ್ಲಿ ಆಂತರಿಕ ಪರಿಸ್ಥಿತಿಯು ಸುಧಾರಣೆಯಾಗಿರುವ ಮಾಹಿತಿ ಇದೆಯೆಂದು ಹಾಗೂ ಇವರುಗಳು ವಾಪಸ್ ಲಿಬಿಯಾ ದೇಶಕ್ಕೆ ತೆರಳಲು ಕೋರಿರುವುದನ್ನು ಮನವರಿಕೆ ಮಾಡಿ ಪ್ರವಾಸ ನಿರ್ಬಂಧವನ್ನು ತೆರವುಗೊಳಿಸಲು ವಿನಂತಿಸಲಾಗಿತ್ತು." ಎಂದರು.
"ಈ ಮನವಿಯನ್ನು ಪರಿಗಣಿಸಿ ಭಾರತ ಸರ್ಕಾರವು ಇತ್ತೀಚೆಗೆ ಪ್ರಯಾಣ ನಿರ್ಬಂಧವನ್ನು ಅಲ್ಪ ಪ್ರಮಾಣದಲ್ಲಿ ಸಡಿಲಗೊಳಿಸಿದ್ದಲ್ಲದೇ ಲಿಬಿಯಾಗೆ ತೆರಳುವ ಭಾರತೀಯರು ಅಲ್ಲಿನ ಭಾರತೀಯ ರಾಯಭಾರಿ ಕಚೇರಿಯ ಸಂಪರ್ಕದಲ್ಲಿರುವಂತೆ ಆದೇಶಿಸಿದೆ. ಇದರಿಂದಾಗಿ ಬಹಳ ದಿನಗಳಿಂದ ಸಂಕಷ್ಟದಲ್ಲಿದ್ದ ಅನೇಕ ಅನಿವಾಸಿ ಭಾರತೀಯರು ತಮ್ಮ ಭವಿಷ್ಯವನ್ನು ಮರು ರೂಪಿಸಿಕೊಳ್ಳಲು ಅನುವು ಮಾಡಿಕೊಟ್ಟಂತಾಗಿದೆ" ಎಂದು ಹೇಳಿದರು.
ಇದನ್ನೂ ಓದಿ: ಬೆಳಗಾವಿ ಟು ಲಂಡನ್: ರಾಣಿ ಚನ್ನಮ್ಮ ವಿವಿಯ 5 ವಿದ್ಯಾರ್ಥಿಗಳಿಗೆ ವಿದೇಶ ಪ್ರವಾಸದ ಅವಕಾಶ
