ಎತ್ತಿನಗಾಡಿ ಮೇಲೆ ಹೊಲಕ್ಕೆ ಹೊರಟ ರೈತನಿಗೆ ಪೊಲೀಸಪ್ಪನ ಸೆಲ್ಯೂಟ್​​: ವಿಡಿಯೋ ವೈರಲ್

ಪೊಲೀಸ್​​ ಅಧಿಕಾರಿಯೊಬ್ಬರು ರೈತನಿಗೆ ಸೆಲ್ಯೂಟ್​​ ಹೊಡೆದ ಘಟನೆ ಬೆಳಗಾವಿಯ ಚಿಕ್ಕೋಡಿಯಲ್ಲಿ ನಡೆದಿದೆ. ಸದ್ಯ ಈ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗಿದೆ.

ಚಿಕ್ಕೋಡಿ: ಎತ್ತಿನಗಾಡಿ ಕಟ್ಟಿಕೊಂಡು ಹೊಲಕ್ಕೆ ಹೊರಟ ರೈತನಿಗೆ ಪೊಲೀಸ್​​ ಅಧಿಕಾರಿಯೊಬ್ಬರು ಸೆಲ್ಯೂಟ್ ಹೊಡೆದ ಘಟನೆ ಬೆಳಗಾವಿ ಜಿಲ್ಲೆಯ ಚಿಕ್ಕೋಡಿಯಲ್ಲಿ ನಡೆದಿದೆ.

ಬಂಡಿ ಮೇಲಿದ್ದರೂ ಹೆಲ್ಮೆಟ್ ಧರಿಸಿ ರೈತ ಹೋಗುತ್ತಿದ್ದ. ಈ ವೇಳೆ ಪೊಲೀಸ್​ ಅಧಿಕಾರಿ ಆತನನ್ನು ತಡೆದಿದ್ದಾರೆ. ಆಗ ರೈತ ಪೊಲೀಸಪ್ಪನಿಗೆ ಕೊರೊನಾ ಬಗ್ಗೆ ತಿಳುವಳಿಕೆ ಹೇಳಿದ್ದಾನೆ. ಸಾಬೂನ್ ಹಂಚ್ಕೊಂಡು ಕೈ ತೊಳ್ಕಬೇಕ್ರಿ, ಊಟ ಮಾಡುವುದಕ್ಕಿಂತ ಮೊದಲೇ ಕೈ ತೊಳ್ಕೊಬೇಕು. ಕೊರೊನಾ ಹಿನ್ನೆಲೆ ತಲೆಗೆ ಹೆಲ್ಮೆಟ್ ಹಾಕ್ಕೊಂಡು ಓಡಾಡುತ್ತಿದ್ದೇನೆ ಎಂದು ರೈತ ಪೊಲೀಸ್​ಗೆ ಹೇಳಿದ್ದಾನೆ.

ನಿನಗೆ ಹೆಲ್ಮೆಟ್ ಹಾಕ್ಕೊಂಡು ಓಡಾಡು ಅಂತಾ ಯಾರು ಹೇಳಿದ್ದಾರೆ ಎಂಬ ಪೊಲೀಸಪ್ಪನ ಪ್ರಶ್ನೆಗೆ ಉತ್ತರಿಸಿದ ರೈತ, ನಾನೇ ಸ್ವತಃ ತಲೆ ಓಡಿಸಿ ಹಾಕ್ಕೊಂಡಿದ್ದೀನಿ ಸರ್ ಎಂದಿದ್ದಾನೆ. ರೈತನ ಈ ಮಾತು ಕೇಳಿ ನಡು ರಸ್ತೆಯಲ್ಲೇ ಪೊಲೀಸ್​​ ಅಧಿಕಾರಿ ಆತನಿಗೆ ಸೆಲ್ಯೂಟ್ ಹೊಡೆದಿದ್ದಾರೆ. ರೈತನ ಈ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.