ಅಸಮಾಧಾನದಿಂದಲೇ ನನಗೆ ಅನಾರೋಗ್ಯ ಕಾಡಿತ್ತು: ಶ್ರೀಮಂತ ಪಾಟೀಲ

ಬೆಳಗಾವಿ ಜಿಲ್ಲೆಯ ಕಾಗವಾಡ ತಾಲೂಕಿನ ಕೆಂಪವಾಡ ಸಕ್ಕರೆ ಕಾರ್ಖಾನೆಯ ವಿಶ್ರಾಂತಿ ಗೃಹದಲ್ಲಿ ಕಾರ್ಯಕರ್ತರ ಸಭೆ ಏರ್ಪಡಿಸಲಾಗಿತ್ತು. ಈ ವೇಳೆ ಮಾತನಾಡಿದ ಅನರ್ಹ ಶಾಸಕ ಶ್ರೀಮಂತ ಪಾಟೀಲ, ನನಗೆ ಅಸಮಾಧಾನದಿಂದಲೇ ಅನಾರೋಗ್ಯ ಕಾಡಿತ್ತು ಎಂದು ಮಾಧ್ಯಮಗಳಿಗೆ ಹೇಳಿಕೆ ನೀಡಿದ್ದಾರೆ.

ಚಿಕ್ಕೋಡಿ: ನನಗೆ ಅಸಮಾಧಾನದಿಂದಲೇ ಅನಾರೋಗ್ಯ ಕಾಡಿತ್ತು. ಕೇವಲ ಅಸಮಾಧಾನದಿಂದಲೇ ನಾನು ಆಸ್ಪತ್ರೆಗೆ ಹೋಗಿದ್ದು ಎಂದು ಪರೋಕ್ಷವಾಗಿ ಅನರ್ಹ ಶಾಸಕ ಶ್ರೀಮಂತ ಪಾಟೀಲ ಅಸಮಾಧಾನವಿತ್ತೆಂದು ಒಪ್ಪಿಕೊಂಡಿದ್ದಾರೆ.

ಬೆಳಗಾವಿ ಜಿಲ್ಲೆಯ ಕಾಗವಾಡ ತಾಲೂಕಿನ ಕೆಂಪವಾಡ ಸಕ್ಕರೆ ಕಾರ್ಖಾನೆಯ ವಿಶ್ರಾಂತಿ ಗೃಹದಲ್ಲಿ ಆಯೋಜನೆ ಮಾಡಿದ್ದ ಕಾರ್ಯಕರ್ತರ ಸಭೆಯಲ್ಲಿ ಮಾತನಾಡಿದ ಅನರ್ಹ ಶಾಸಕ ಶ್ರೀಮಂತ ಪಾಟೀಲ್, ಕುಮಾರಸ್ವಾಮಿ ವಿರುದ್ಧ ಹರಿಹಾಯ್ದರು. ಕುಮಾರಸ್ವಾಮಿ ಸರ್ಕಾರದಲ್ಲಿ ನಮ್ಮ ಕ್ಷೇತ್ರದ ಯಾವುದೇ ಕೆಲಸ ಕಾರ್ಯಗಳು ಆಗಲಿಲ್ಲ ಎಂದರು.

ಕೃಷ್ಣಾ‌ ನದಿ ಬತ್ತಿ ಹೋಗಿ 3 ತಿಂಗಳು ಕಳೆದರೂ ಸಹ ಇವರಿಗೆ ಮಹರಾಷ್ಟ್ರದಿಂದ ನೀರು ಬಿಡಿಸಲು ಆಗಲಿಲ್ಲ. ಆಗ ನಮ್ಮ ಕ್ಷೇತ್ರದ ಜನ ಕುಡಿಯುವ ನೀರಿಗಾಗಿ ಪರದಾಡುವಂತಾಯಿತು. ಹಾಗಾಗಿ ನಾನು ಇಂತಹ ನಿರ್ಣಯಕ್ಕೆ ಬರಬೇಕಾಯ್ತು ಎಂದರು.

ನಾನು ಭತ್ಯೆಗಾಗಿ ಶಾಸಕನಾಗಿಲ್ಲ. ನಮ್ಮ ಕಾಗವಾಡ ಕ್ಷೇತ್ರದ ತೊಂದರೆಗಳು ಹಾಗೂ ಏನಾದರೂ ಮಾಡಬೇಕು ಎನ್ನುವ ಸಲುವಾಗಿ ಶಾಸಕನಾಗಿದ್ದೇನೆ. ಆದರೆ, ಕುಮಾರಸ್ವಾಮಿ ಸರ್ಕಾರ ನಮಗೆ ಏನೂ ಅನುದಾನ ನೀಡದೆ ಇರುವುದರಿಂದ ನಾನು ನನ್ನ ಕ್ಷೇತ್ರದ ಜನರಿಗೆ ಏನೂ ಮಾಡಲಾಗಲಿಲ್ಲ. ಖಾಲಿ ಪುಗಸಟ್ಟೆ ಆಡಳಿತ ಮಾಡುವುದು ಬೇಡ ಎಂದು ನಾನು ಈ ತೀರ್ಮಾನಕ್ಕೆ ಬಂದಿದ್ದೇನೆ ಎಂದು ಹೇಳಿದರು.

ಅನಾರೋಗ್ಯವಿತ್ತೋ, ಅಸಮಾಧಾನವಿತ್ತೋ ಎಂಬ ಪ್ರಶ್ನೆಗೆ ಅಸಮಾಧಾನದಿಂದಲೇ ಅನಾರೋಗ್ಯ ಬಂದಿತ್ತು ಎಂದು ಕಾಗವಾಡ ಅನರ್ಹ ಶಾಸಕ ಶ್ರೀಮಂತ ಪಾಟೀಲ ಮಾಧ್ಯಮಗಳಿಗೆ ಪ್ರತಿಕ್ರಿಯೆ ನೀಡಿದರು.