ರಾಕಿಂಗ್​ ಸ್ಟಾರ್​ನ ಹತ್ಯೆಗೂ ಸಂಚು ರೂಪಿಸಿದ್ದ ಸ್ಲಂ ಭರತ!

ಉತ್ತರ ಪ್ರದೇಶದಲ್ಲಿ ಸೆರೆಯಾಗಿದ್ದ ರೌಡಿಶೀಟರ್ ಸ್ಲಂ ಭರತ್ ಪೊಲೀಸರು ನಡೆಸಿದ ಶೂಟೌಟ್​ನಲ್ಲಿ ಬಲಿಯಾಗಿರುವುದು ಗೊತ್ತಿರುವ ಸಂಗತಿ. ಆದ್ರೆ ಈ ಸ್ಲಂ ಭರತ್​ ರಾಕಿಂಗ್​ ಸ್ಟಾರ್​ ಹತ್ಯೆಗೂ ಸಂಚು ರೂಪಿಸಿದ್ದ ಎಂಬ ಆಘಾತಕಾರಿ ವಿಚಾರ ತಿಳಿದು ಬಂದಿದೆ.

ಬೆಂಗಳೂರು: ಸ್ಯಾಂಡಲ್​ವುಡ್​ ಸ್ಟಾರ್ ನಟನ ಹತ್ಯೆಗೆ ಸ್ಕೆಚ್ ಹಾಕಿದ್ದ ಆರೋಪಿ ಕೊನೆಗೂ ಮಟಾಷ್ ಆಗಿದ್ದಾನೆ. ರಾಜಗೋಪಾಲನಗರ ಹಾಗೂ ಕಾಮಾಕ್ಷಿಪಾಳ್ಯ ಪೊಲೀಸ್ ಠಾಣೆಯ ರೌಡಿಶೀಟರ್ ಸ್ಲಂ ಭರತ್​ ಸ್ಟಾರ್ ನಟ ಯಶ್ ಹತ್ಯೆಗೂ ಸ್ಕೆಚ್ ಹಾಕಿದ್ದ. ಆದರೆ ಈ ವಿಚಾರ ತಿಳಿದು ಸಿಸಿಬಿ ಪೊಲೀಸರು ಸ್ಲಂ ಭರತ್‌ನನ್ನ ಈ ಹಿಂದೆೆಯೇ ಬಂಧಿಸಿದ್ದರು. ಆದರೆ ಜೈಲಿನಿಂದ ಹೊರ ಬಂದವನು ಮತ್ತೆ ತನ್ನ ಹಳೆ ಚಾಳಿ ಮುಂದುವರೆಸಿ ಇದೀಗ ಪೊಲೀಸರ ಗುಂಡೇಟಿಗೆ ಹೆಣವಾಗಿದ್ದಾನೆ.

ಏನಿದು ಯಶ್ ಹತ್ಯೆ ಪ್ಲಾನ್?

ಕಳೆದ ವರ್ಷ ಮಾರ್ಚ್ 7ರಂದು ಶೇಷಾದ್ರಿಪುರಂನ ಬಿಡಿಎ ಕಚೇರಿ ಬಳಿ ಸ್ಲಂ ಭರತ್​ ಸಹಚರರಾದ ನಿತೇಶ್, ನಿತ್ಯಾನಂದ, ಮಧು, ಪೃಥ್ವಿ ಎಂಬುವವರು ಸ್ಟಾರ್ ನಟನ ಹತ್ಯೆಗೆ ರೆಡಿಯಾಗಿದ್ದರು. ಈ ವಿಚಾರ ತಿಳಿದು ಸಿಸಿಬಿ ದಾಳಿ ನಡೆಸಿ ಆರೋಪಿಗಳನ್ನು ವಶಕ್ಕೆ ಪಡೆದು ವಿಚಾರಿಸಿದ್ದರು.

ನಟನೊಬ್ಬನ ಹತ್ಯೆ ಮಾಡಲು ಬಂದಿದ್ವಿ. ಸ್ಲಂ ಭರತ್​ ಕಡೆಯಿಂದ ನಮಗೆ ಆದೇಶ ಬಂದಿದ್ದು ಅಷ್ಟೇ ಗೊತ್ತು. ನಾನ್ ಕಾಲ್ ಮಾಡುವಷ್ಟರಲ್ಲಿ ಬಿಡಿಎ ಕಚೇರಿ ಬಳಿ ರೆಡಿಯಾಗಿರಿ ಅಂತ ಭರತ್​ ಹೇಳಿದ್ದ. ಭರತ್​ನ ಮಾತಿನಂತೆ‌ ನಾವೆಲ್ಲರೂ ಮಾರಕಾಸ್ತ್ರಗಳೊಂದಿಗೆ ಕಾದು ಕುಳಿತಿದ್ವಿ ಎಂದು ಆರೋಪಿಗಳು ಪೊಲೀಸರ ವಿಚಾರಣೆ ವೇಳೆ ಬಾಯ್ಬಿಟ್ಟಿದ್ದರು. ಸಿಸಿಬಿ ಪೊಲೀಸರು ಭರತ್​ನನ್ನು ವಿಚಾರಣೆಗೊಳಪಡಿಸಿ ಜೈಲಿಗಟ್ಟಿದ್ರು. ನಂತ್ರ ಮತ್ತೆ ಜಾಮೀನು ಮೇಲೆ ಹೊರ ಬಂದ ಸ್ಲಂ ಭರತ್​ ಸದ್ಯ ಹೆಣವಾಗಿದ್ದಾನೆ.