ಕೊರೊನಾ ರೋಗಿಗಳಿಗೆ ಹಣ ವಾಪಸ್ ನೀಡಿ... 4 ಖಾಸಗಿ ಆಸ್ಪತ್ರೆಗಳಿಗೆ ಅಲೋಕ್ ಕುಮಾರ್ ಸೂಚನೆ

ಕೊರೊನಾ ಸೋಂಕಿತರಿಂದ ಅಧಿಕ ಹಣ ಲೂಟಿ ಮಾಡುತ್ತಿವೆ ಎಂಬ ಆರೋಪ ಕೇಳಿ ಬರುತ್ತಿರುವುದರಿಂದ ಇದಕ್ಕೆ ಕಡಿವಾಣ ಹಾಕಲು ಐಎಎಸ್ ಹಾಗೂ ಐಪಿಎಸ್ ಅಧಿಕಾರಿಗಳ ತಂಡವನ್ನ ಸರ್ಕಾರ ನೇಮಕ ಮಾಡಿದೆ. ಕಾರ್ಯ ಪ್ರವೃತ್ತರಾದ ಕೆಎಸ್ಆರ್​ಪಿ ಎಡಿಜಿಪಿ ಅಲೊಕ್ ಕುಮಾರ್ ರೋಗಿಗಳಿಗೆ ಹಣ ವಾಪಸ್ ನೀಡುವಂತೆ 4 ಖಾಸಗಿ ಆಸ್ಪತ್ರೆಗಳಿಗೆ ಸೂಚಿಸಿದ್ದಾರೆ.

ಬೆಂಗಳೂರು: ಕೊರೊನಾ ಸೋಂಕು ವ್ಯಾಪಕವಾಗಿ ಹಬ್ಬುತ್ತಿದ್ದಂತೆ ಆಸ್ಪತ್ರೆಗಳಲ್ಲಿ ಬೆಡ್​ಗಳ ಕೊರತೆ ಎದುರಾಗಿದೆ. ಸರ್ಕಾರ, ಖಾಸಗಿ ಆಸ್ಪತ್ರೆಗಳು ಕೊರೊನಾ ಸೋಂಕಿತರಿಗೆ ಅರ್ಧದಷ್ಟು ಬೆಡ್​​​​ಗಳನ್ನು ಮೀಸಲು ಇಡುವಂತೆ ಸೂಚಿಸಿತ್ತು. ಆದರೆ, ಖಾಸಗಿ ಆಸ್ಪತ್ರೆಗಳು ಕೊರೊನಾ ಸೋಂಕಿತರಿಂದ ಅಧಿಕ ಹಣ ಲೂಟಿ ಮಾಡುತ್ತಿವೆ ಎಂಬ ಆರೋಪ ಕೇಳಿಬಂದಿದೆ.

ಸದ್ಯ ಇದಕ್ಕೆ ಕಡಿವಾಣ ಹಾಕಲು ಐಎಎಸ್ ಹಾಗೂ ಐಪಿಎಸ್ ಅಧಿಕಾರಿಗಳ ತಂಡವನ್ನ ಸರ್ಕಾರ ನೇಮಕ ಮಾಡಿದೆ‌. ಖಡಕ್ ಅಧಿಕಾರಿ ಎಂದು ಹೆಸರು ವಾಸಿಯಾಗಿರುವ ಕೆಎಸ್ಆರ್​ಪಿ ಎಡಿಜಿಪಿ ಅಲೋಕ್​​​​ ಕುಮಾರ್ ಅವರು 4 ಖಾಸಗಿ ಆಸ್ಪತ್ರೆಗಳಾದ ಮಣಿಪಾಲ್ ಆಸ್ಪತ್ರೆ, ಬಿ.ಆರ್ ಅಂಬೇಡ್ಕರ್, ಸೆಂಟ್ ಫಿಲೋಮಿನಾ ಆಸ್ಪತ್ರೆ ಹಾಗೂ ಚಿನ್ಮಯ ಮಿಷನ್ ಆಸ್ಪತ್ರೆಗಳಿಗೆ ರೋಗಿಗಳ ಬಳಿಯಿಂದ ಹೆಚ್ಚುವರಿಯಾಗಿ ಹಣ ವಸೂಲಿ ಮಾಡಿದ್ದರೆ ಮರು ಪಾವತಿಸುವಂತೆ ತಿಳಿಸಿದ್ದಾರೆ.

‌ಕೊರೊನಾ ಸೋಂಕು ಬಂದ ವ್ಯಕ್ತಿಗೆ ಕನಿಷ್ಠ ಅಂದರೆ 5 ಸಾವಿರದಿಂದ 10 ಸಾವಿರ ರೂ. ಖರ್ಚಾಗುತ್ತದೆ. ಆದರೆ, ಖಾಸಗಿ ಆಸ್ಪತ್ರೆಗಳು ಲಕ್ಷ ಲಕ್ಷ ಬಿಲ್ ಮಾಡಿದ್ದರಿಂದ ಬಹುತೇಕ ಮಂದಿ ಹಣವಿಲ್ಲದೇ ಪರದಾಡಿದ್ದಾರೆ. ಸದ್ಯ ಐಪಿಎಸ್ ಹಾಗೂ ಐಎಎಸ್ ಅಧಿಕಾರಿಗಳ ತಂಡ ಪ್ರತಿ ಖಾಸಗಿ ಆಸ್ಪತ್ರೆಗಳ ಮೇಲೆ ಕಣ್ಣಿಟ್ಟಿದೆ.