ಬೆಂಗಳೂರು: ಕೋಲಾರದಲ್ಲಿ ಬೆಡ್, ಆಕ್ಸಿಜನ್ ಯಾವುದೇ ಕೊರತೆಯಾಗದಂತೆ ನೋಡಿಕೊಳ್ಳಬೇಕು. ತೊಂದರೆಯಾದರೆ ಅಧಿಕಾರಿಗಳೇ ನೇರ ಹೊಣೆ ಎಂದು ಖಡಕ್ ವಾರ್ನಿಂಗ್ ನೀಡಲಾಗಿದೆ ಎಂದು ಡಿಸಿಎಂ ಅಶ್ವತ್ಥ ನಾರಾಯಣ ಸ್ಪಷ್ಟಪಡಿಸಿದ್ದಾರೆ.
ಸರ್ಕಾರಿ ನಿವಾಸದಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, 1912 ಸಹಾಯವಾಣಿ ಉತ್ತಮವಾಗಿ ಕೆಲಸ ಮಾಡುತ್ತಿಲ್ಲ. ಹೆಲ್ಪ್ಲೈನ್ ಯಶಸ್ವಿಯಾಗಿ ನಡೆಯಲು ಸರ್ವಪ್ರಯತ್ನ ಆಗಬೇಕು. ಪರಿಣಾಮಕಾರಿಯಾಗಿ ನಡೆಯುತ್ತಿಲ್ಲ. ಅದನ್ನು ಸರಿಪಡಿಸಲು ಎರಡು ದಿನದ ಗಡುವನ್ನು ನೀಡಿದ್ದೇನೆ. ತಕ್ಷಣವೇ ಅದನ್ನು ಸರಿಪಡಿಸುವ ಕೆಲಸವಾಗಬೇಕು. ಅದೇ ರೀತಿ ಹಾಸಿಗೆ ಹಂಚಿಕೆಯಲ್ಲಿ ಯಾರ ಹಸ್ತಕ್ಷೇಪವೂ ಇರಬಾರದು ಎಂದರು.
ಸ್ವಯಂಚಾಲಿತವಾಗಿ ಕೋವಿಡ್ ಸೋಂಕಿತರಿಗೆ ಹಾಸಿಗೆ ಹಂಚಿಕೆಯಾಗಬೇಕು. ಬೆಡ್ ಹಂಚಿಕೆಗೆ ಪಾರದರ್ಶಕ ವ್ಯವಸ್ಥೆಯಾಗಬೇಕು. ಈ ಬಗ್ಗೆ ಸಂಬಂಧಪಟ್ಟ ಅಧಿಕಾರಿಗಳಿಗೆ ಸೂಚಿಸಿದ್ದೇನೆ. ಎರಡು ದಿನದಲ್ಲಿ ಎಲ್ಲ ಸರಿಯಾಗಬೇಕು. ಯಾವ ಆಸ್ಪತ್ರೆಯಲ್ಲಿ ಬೆಡ್ ಖಾಲಿ ಇದೆ ಎನ್ನುವುದನ್ನು ಆನ್ಲೈನ್ನಲ್ಲಿ ತೋರಿಸುತ್ತಿರಬೇಕು. ಸ್ವಯಂಚಾಲಿತವಾಗಿ ಬೆಡ್ ಹಂಚಿಕೆಯಾಗಬೇಕು ಹಾಗೂ ವಿವಿಧ ಹಂತದಲ್ಲಿ ಮಾಹಿತಿ ಹಂಚಿಕೆಯಾಗಲು ವಿವಿಧ ಆ್ಯಪ್ಗಳಿವೆ. ಆ ಎಲ್ಲಾ ಆ್ಯಪ್ಗಳನ್ನು ಇಂಡೆಕ್ಸ್ ಇಂಟಿಗ್ರೇಟ್ ಮಾಡಲು ತಿಳಿಸಲಾಗಿದೆ ಎಂದು ವಿವರಿಸಿದರು.
ಕೋಲಾರದಲ್ಲಿ 700 ಆಕ್ಸಿಜನ್ ಬೆಡ್ ಇದ್ದು, ಅದರಲ್ಲಿ 197 ಐಸಿಯು ಇದೆ. 700 ಆಮ್ಲಜನಕ ರಹಿತ ಬೆಡ್ ಸೇರಿ ಒಟ್ಟು 1400 ಬೆಡ್ಗಳಿವೆ. ಜಿಲ್ಲೆಯಲ್ಲಿ 3600 ಆಕ್ಟೀವ್ ಕೇಸ್ ಇವೆ. ನಿನ್ನೆ 622 ಕೇಸ್ ಬಂದಿದೆ. ಶೇ. 10ರಷ್ಟು ಜನರಿಗೆ ಮಾತ್ರ ಆಸ್ಪತ್ರೆ ಬೇಕು. 3600 ಜನರಲ್ಲಿ 3000 ಜನ ಹೋಂ ಐಸೋಲೇಷನ್ನಲ್ಲಿ ಇದ್ದಾರೆ. ನಮ್ಮ ಅಂಕಿ-ಅಂಶದ ಪ್ರಕಾರ, ಕೋಲಾರದಲ್ಲಿ ಬೆಡ್ ಕೊರತೆ ಇಲ್ಲ. ಇನ್ನು ಬೇಡಿಕೆ ಬಂದರೂ ಅದನ್ನು ಈಡೇರಿಸುವ ದಿಕ್ಕಿನಲ್ಲಿ ಕನಿಷ್ಠ 300 ಆಕ್ಸಿಜನ್ ಬೆಡ್ಗಳನ್ನು ಹೊಸದಾಗಿ ವ್ಯವಸ್ಥೆ ಮಾಡಲಿದ್ದೇವೆ. 150 ಐಸಿಯು ಬೆಡ್ ಹೆಚ್ಚಿಸಲಿದ್ದೇವೆ. ಯಾವ ಸಮಸ್ಯೆ ಇಲ್ಲದೆ ಕೊರೊನಾ ನಿರ್ವಹಣೆ ಮಾಡಲಿದ್ದೇವೆ ಎಂದರು.
