ಬೆಂಗಳೂರು: ದೇಶದಲ್ಲಿ ಸ್ವದೇಶಿ ಅಭಿಯಾನಕ್ಕೆ ಅವಕಾಶ ಕಲ್ಪಿಸುವ ನಿಟ್ಟಿನಲ್ಲಿ ಆರಂಭಿಸಲಾದ ಆತ್ಮನಿರ್ಭರ್ ಆ್ಯಪ್ ಚಾಲೆಂಜ್ನ ಅಂತಿಮ ಸುತ್ತಿನ ಸ್ಪರ್ಧೆಯಲ್ಲಿ ಕೂ ಆ್ಯಪ್ ಆಯ್ಕೆಯಾಗಿದೆ. ಭಾರತದಲ್ಲಿ ಸ್ಟಾರ್ಟಪ್ ಮತ್ತು ಉದ್ಯಮಿಗಳಲ್ಲಿ ಡಿಜಿಟಲ್ ಆವಿಷ್ಕಾರವನ್ನು ಬೆಳೆಸಲು ಪ್ರಧಾನಮಂತ್ರಿಯವರ ಆತ್ಮನಿರ್ಭರ್ ಆ್ಯಪ್ ಚಾಲೆಂಜ್ಅನ್ನು ಭಾರತಕ್ಕೆ ಅಗತ್ಯವಿರುವ 8 ಡಿಜಿಟಲ್ ವಿಭಾಗದಲ್ಲಿ ಆಯೋಜಿಸಿತ್ತು. ಭಾರತದಾದ್ಯಂತ 6900 ಕ್ಕೂ ಹೆಚ್ಚು ನೋಂದಣಿಗಳು ಬಂದಿದ್ದು, ಈಗ ಕೂ ಆ್ಯಪ್ ವಿಜೇತರಲ್ಲಿ ಒಂದಾಗಿದೆ. ಕೂ ಆ್ಯಪ್ ಸಾಮಾಜಿಕ ಅಪ್ಲಿಕೇಶನ್ ವಿಭಾಗದಲ್ಲಿ ಫೈನಲಿಸ್ಟ್ ಆಗಿದೆ.
ಕೂ ಸಹ-ಸಂಸ್ಥಾಪಕ ಮತ್ತು ಸಿಇಒ ಅಪ್ರಮೇಯ ರಾಧಾಕೃಷ್ಣ ಮಾತನಾಡಿ, ಆತ್ಮನಿರ್ಭರ್ ಆ್ಯಪ್ ಚಾಲೆಂಜ್ ವಿಜೇತರಲ್ಲಿ ಒಬ್ಬರಾಗುವ ಬಗ್ಗೆ ತುಂಬಾ ಉತ್ಸುಕರಾಗಿದ್ದೇವೆ. ಪಿಎಂ ಮೋದಿ ಅವರು ಸ್ಟಾರ್ಟ್‌ಅಪ್ಗಳು, ನಾವೀನ್ಯಕಾರರು ಮತ್ತು ಉದ್ಯಮಿಗಳಿಗೆ ಅವರ ಸೃಷ್ಟಿಯನ್ನು ಪ್ರದರ್ಶಿಸಲು ಉತ್ತಮ ವೇದಿಕೆಯನ್ನು ನೀಡುತ್ತಿದ್ದಾರೆ ಮತ್ತು ಈ ಅವಕಾಶಕ್ಕಾಗಿ ನಾವು ಕೃತಜ್ಞರಾಗಿರುತ್ತೇವೆ. ಕೂ ಮೂಲಕ ಜನತೆ ತಮ್ಮ ಮಾತೃಭಾಷೆಯಲ್ಲಿ ಜನರೊಂದಿಗೆ ಸಂಪರ್ಕ ಸಾಧಿಸಲು ಬಯಸುವ ವಿಶಾಲ ಭಾರತಕ್ಕೆ ಕರೆದೊಯ್ಯಲು ನಾವು ಎದುರು ನೋಡುತ್ತಿದ್ದೇವೆ ಎಂದಿದ್ದಾರೆ.
ಕೂ ಸಂಸ್ಥಾಪಕ ಮಾಯಾಂಕ್ ಬಿಡಾವತ್ಕಾ, ಆತ್ಮನಿರ್ಭರ್ ಆ್ಯಪ್ ಚಾಲೆಂಜ್ ಸ್ವೀಕರಿಸಿದ 6940 ನೋಂದಣಿಗಳಲ್ಲಿ ಆಯ್ಕೆ ಮಾಡಲಾದ ಅಪ್ಲಿಕೇಶನ್‌ಗಳ ವಿಜೇತ ಪಟ್ಟಿಯಲ್ಲಿ ಭಾಗವಾಗಲು ನಮಗೆ ಹೆಮ್ಮೆಇದೆ. ಉತ್ತಮ ಭಾರತಕ್ಕಾಗಿ ನಮ್ಮ ಸರ್ಕಾರವು ತಂತ್ರಜ್ಞಾನದ ಆವಿಷ್ಕಾರಕ್ಕೆ ಒತ್ತು ನೀಡುತ್ತಿರುವುದನ್ನು ನಾವು ಗೌರವಿಸುತ್ತೇವೆ ಮತ್ತು ಪ್ರಶಂಸಿಸುತ್ತೇವೆ. ನಮ್ಮ ತಂಡ ಮತ್ತು ನಮ್ಮನ್ನು ಬೆಂಬಲಿಸಿದವರನ್ನು ಗುರುತಿಸಲ್ಪಟ್ಟಿದ್ದು ಹೆಮ್ಮೆಯ ಕ್ಷಣವಾಗಿದೆ. ಕೂ ಮೂಲಕ ಒಂದು ಶತಕೋಟಿ ಭಾರತೀಯರಿಗೆ ಧ್ವನಿ ನೀಡಲು ನಾವು ಎದುರು ನೋಡುತ್ತಿದ್ದೇವೆ ಎಂದಿದ್ದಾರೆ.
ಕೂ ಆ್ಯಪ್ ವಿಶೇಷತೆ:
ಕೂ ಭಾರತೀಯ ಭಾಷೆಗಳಲ್ಲಿನ ಭಾರತದ ಮೈಕ್ರೋ-ಬ್ಲಾಗಿಂಗ್ ವೇದಿಕೆಯಾಗಿದೆ. ಕೂ ಅನ್ನು ಮಾರ್ಚ್ 2020 ರಲ್ಲಿ ಪ್ರಾರಂಭಿಸಲಾಯಿತು ಮತ್ತು ಈಗ ಹಿಂದಿ, ಕನ್ನಡ, ತಮಿಳು ಮತ್ತು ತೆಲುಗು ಸೇರಿ ಒಟ್ಟು 4 ಭಾರತೀಯ ಭಾಷೆಗಳಲ್ಲಿ ಲಭ್ಯವಿದೆ. ಕೂ ಎಂಬುದು ಮೈಕ್ರೋ ಬ್ಲಾಗ್ ಆಗಿದ್ದು, ಭಾರತೀಯರು ತಮ್ಮ ಮಾತೃಭಾಷೆಯಲ್ಲಿ ತಮ್ಮನ್ನು ತಾವು ವ್ಯಕ್ತಪಡಿಸಿಕೊಳ್ಳಲು ಅನುವು ಮಾಡಿಕೊಡುತ್ತದೆ. ಪಠ್ಯ, ಆಡಿಯೋ ಮತ್ತು ವಿಡಿಯೋ ಬಳಸಿ ಬಳಕೆದಾರರು ತಮ್ಮ ಮನದಾಳವನ್ನು ವ್ಯಕ್ತಪಡಿಸಬಹುದು.
ತಮ್ಮ ಆಲೋಚನೆಯನ್ನು ಪಠ್ಯದ 400 ಅಕ್ಷರಗಳಲ್ಲಿ ಅಥವಾ 1 ನಿಮಿಷದ ಸಣ್ಣ ಆಡಿಯೋ ಅಥವಾ ವೀಡಿಯೊ ಕೂಗಳನ್ನು ಮಾಡಬಹುದು. ಕೂ ಆ್ಯಪ್ನ ಕೆಲವು ವೈಶಿಷ್ಟ್ಯಗಳಿಂತಿವೆ: ಜನರು ಫೀಡ್, 1-1 ಸಂದೇಶ ಕಳುಹಿಸುವಿಕೆ, ಇಂಗ್ಲಿಷ್‌ನಿಂದ ಭಾಷಾ ಕೀಬೋರ್ಡ್, ಭಾಷಾ ಸುದ್ದಿ ಫೀಡ್‌ಗಳು ಮತ್ತು ಹೈಪರ್ ಲೋಕಲ್ ಹ್ಯಾಶ್ ಟ್ಯಾಗ್‌ಗಳನ್ನು ಒಳಗೊಂಡಿವೆ. ಮುಂದಿನ ತಿಂಗಳಲ್ಲಿ ಕೂ ವೇದಿಕೆಯಲ್ಲಿ ಇತರ ಭಾಷೆಗಳು ಶೀಘ್ರದಲ್ಲೇ ಪ್ರಾರಂಭವಾಗುತ್ತದೆ. ಆತ್ಮನಿರ್ಭರ್ ಆ್ಯಪ್ ಚಾಲೆಂಜ್ ಬಗ್ಗೆ ಈಗಾಗಲೇ ನಾಗರಿಕರು ಬಳಸುತ್ತಿರುವ ಮತ್ತು ಆಯಾ ವಿಭಾಗಗಳಲ್ಲಿ ವಿಶ್ವದರ್ಜೆಯಲ್ಲಿರುವ ಭಾರತೀಯ ಅಪ್ಲಿಕೇಷನ್‌ಗಳನ್ನು ಗುರ್ತಿಸುವ ಉದ್ದೇಶದಿಂದ ಡಿಜಿಟಲ್ ಇಂಡಿಯಾ ಆತ್ಮನಿರ್ಭರ್ ಭಾರತ್ ಇನ್ನೋವೇಟ್ ಚಾಲೆಂಜ್ ಅನ್ನು ಪ್ರಾರಂಭಿಸಿದೆ.
ಈ ಇನ್ನೋವೇಶನ್ ಚಾಲೆಂಜ್ ಭಾರತೀಯ ಉದ್ಯಮಿಗಳು ಮತ್ತು ಆರಂಭಿಕ ಉದ್ಯಮಗಳನ್ನು ಪ್ರೋತ್ಸಾಹಿಸುವ ಉತ್ತಮ ಪರಿಸರ ವ್ಯವಸ್ಥೆಯನ್ನು ನಿರ್ಮಿಸಲು ಪ್ರಯತ್ನಿಸುತ್ತದೆ ಹಾಗೂ ತಾಂತ್ರಿಕ ಪರಿಹಾರಗಳನ್ನೊದಗಿಸಿ ಹೊಸ ಉದ್ಯಮಿಗಳನ್ನು ಪೋಷಿಸಲು ಪ್ರಯತ್ನಿಸುತ್ತಿದೆ. ಭಾರತೀಯ ನಾಗರೀಕರಿಗೆ ಸೇವೆಯನ್ನೊದಗಿಸುವುದು ಮಾತ್ರವಲ್ಲದೇ ಪ್ರಪಂಚದಾದ್ಯಂತ ಸೇವೆಯನ್ನೊದಗಿಸಲು ಪೂರಕ ವಾತಾವರಣ ಕಲ್ಪಿಸುತ್ತದೆ.
