ಗೌರಿ ಲಂಕೇಶ್ ಹತ್ಯೆ ಪ್ರಕರಣ: 18ನೇ ಆರೋಪಿಯನ್ನ 15 ದಿನ ಎಸ್​​ಐಟಿ ವಶಕ್ಕೆ ನೀಡಿದ ಕೋರ್ಟ್​

ಗೌರಿ ಲಂಕೇಶ್ ಹತ್ಯೆ ಪ್ರಕರಣದ 18ನೇ ಆರೋಪಿಯನ್ನ ಎಸ್​​ಐಟಿ ತಂಡ ಇಂದು ನ್ಯಾಯಾಲಯದ ಮುಂದೆ ಹಾಜರು ಪಡಿಸಿತು. ನ್ಯಾಯಾಲಯ ಆರೋಪಿಯ ಹೇಳಿಕೆ ದಾಖಲಿಸಿ 15 ದಿವಸಗಳ ಕಾಲ ಎಸ್​​ಐಟಿ ವಶಕ್ಕೆ ನೀಡಿದೆ.

ಬೆಂಗಳೂರು: ಗೌರಿ ಲಂಕೇಶ್ ಹತ್ಯೆ ಪ್ರಕರಣದ 18ನೇ ಆರೋಪಿಯನ್ನ ಎಸ್​​ಐಟಿ ತಂಡ ಇಂದು ಒಂದನೇ ಸಿಸಿಹೆಚ್ ನ್ಯಾಯಾಲಯದ ಮುಂದೆ ಹಾಜರು ಪಡಿಸಿತ್ತು.

ಈ ವೇಳೆ ಎಸ್​​ಐಟಿ ಪರ ವಕೀಲರು ಆರೋಪಿ ರಿಷಿಕೇಶ್ ಅಲಿಯಾಸ್ ಮುರುಳಿ, ಗೌರಿ ಹತ್ಯೆ ಪ್ರಕರಣದಲ್ಲಿ ವಿಚಾರಣೆಯ ಅವಶ್ಯಕತೆ ಇರುವ ಹಿನ್ನೆಲೆ ಎಸ್​​ಐಟಿ ವಶಕ್ಕೆ ಕೇಳಿದ್ರು. ಹೀಗಾಗಿ ಇದನ್ನ ಮಾನ್ಯ ಮಾಡಿದ ನ್ಯಾಯಾಲಯ ಆರೋಪಿಯ ಹೇಳಿಕೆ ದಾಖಲಿಸಿ 15 ದಿವಸಗಳ ಕಾಲ ಎಸ್​​ಐಟಿ ವಶಕ್ಕೆ ನೀಡಿದೆ.

ಜಾರ್ಖಂಡ್​​ನಲ್ಲಿ ಆರೋಪಿಯನ್ನ ಅರೆಸ್ಟ್ ಮಾಡಿದ್ದ ಎಸ್​​ಐಟಿ ಆರೋಪಿಯನ್ನು ಬೆಂಗಳೂರಿಗೆ ರೈಲಿನಲ್ಲಿ ಬಾಡಿ ವಾರೆಂಟ್ ಮೂಲಕ ಕರೆತಂದಿತ್ತು. ಈತ ಗೌರಿ ಲಂಕೇಶ್ ಹತ್ಯೆ ಪ್ರಕರಣದಲ್ಲಿ 18ನೇ ಅರೋಪಿ. ಈತನಿಗೆ ಎಸ್​​ಐಟಿ ಕಳೆದ ಎರಡು ವರ್ಷಗಳಿಂದ ಹುಡುಕಾಟ ನಡೆಸಿತ್ತು.

ರಾಷ್ಟ್ರದಲ್ಲಿ ನಡೆದಿರುವ ವಿಚಾರವಾದಿಗಳ ಹತ್ಯೆಯಲ್ಲಿಯೂ ಈತ ಭಾಗಿಯಾಗಿರುವ ಶಂಕೆ ಇದ್ದು, ಎಸ್ಐಟಿ ಇದರೆಲ್ಲರ ತನಿಖೆ ಮುಂದುವರೆಸಲಿದೆ ಎನ್ನಲಾಗಿದೆ.