ಪಂಚೆಯಿಂದ ಸ್ಕೈವಾಕ್ ಕಂಬಿಗೆ ನೇಣು ಬಿಗಿದುಕೊಂಡು ವೃದ್ಧ ಆತ್ಮಹತ್ಯೆ

ಬೆಂಗಳೂರಿನ ಎಂಟನೇ ಮೈಲಿ ಬಳಿಯ ಸ್ಕೈವಾಕ್​ನಲ್ಲಿರುವ ಕಂಬಿಯೊಂದಕ್ಕೆ ವೃದ್ಧನೊಬ್ಬ ಪಂಚೆಯಿಂದ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿರುವ ದುರ್ಘಟನೆ ನಡೆದಿದೆ.

ಬೆಂಗಳೂರು: ಹಾಡಹಗಲೇ ಜನದಟ್ಟಣೆ ಪ್ರದೇಶವೊಂದರ ಸ್ಕೈವಾಕ್ ಮೇಲೆಯೇ ಪಂಚೆಯಿಂದ ನೇಣು ಬಿಗಿದುಕೊಳ್ಳುವ ಮೂಲಕ ವೃದ್ಧನೋರ್ವ ಆತ್ಮಹತ್ಯೆಗೆ ಶರಣಾಗಿರುವ ಘಟನೆ ರಾಜಧಾನಿಯಲ್ಲಿ ನಡೆದಿದೆ.

ಬೆಂಗಳೂರು - ತುಮಕೂರು ಹೆದ್ದಾರಿಯ ಎಂಟನೇ ಮೈಲಿ ಬಳಿಯಿರುವ ಸ್ಕೈವಾಕ್​​ನಲ್ಲಿ ಈ ದುರ್ಘಟನೆ ನಡೆದಿದೆ. ದಾಸರಹಳ್ಳಿಯ ಕಲ್ಯಾಣನಗರ ನಿವಾಸಿಯಾದ ಮೋಹನ್ ದಾಸ್(74) ಇಂದು ಮಧ್ಯಾಹ್ನ ಪಂಚೆಯಿಂದ ಸ್ಕೈವಾಕ್​​ ಕಂಬಿಗೆ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ ಎಂದು ತಿಳಿದು ಬಂದಿದೆ.

ಮೋಹನ್​ ದಾಸ್​​, ನಗರದಲ್ಲಿ ಕೂಲಿ ಕಾರ್ಮಿಕರಾಗಿ ಕೆಲಸ ಮಾಡುತ್ತಿದ್ದರು ಎಂಬ ಮಾಹಿತಿ ಲಭ್ಯವಾಗಿದ್ದು, ಆತ್ಮಹತ್ಯೆ ಮಾಡಿಕೊಂಡಿರುವ ಬಗ್ಗೆ ನಿಖರ ಕಾರಣ ತಿಳಿದು ಬಂದಿಲ್ಲ.

ಸ್ಥಳಕ್ಕಾಗಮಿಸಿದ ಪೀಣ್ಯ ಪೊಲೀಸರು, ಮೃತದೇಹವನ್ನು‌ ಮರಣೋತ್ತರ ಪರೀಕ್ಷೆಗೆ ಕಳುಹಿಸಿದ್ದು, ಈ ಕುರಿತು ಠಾಣೆಯಲ್ಲಿ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.