ನವದೆಹಲಿ: 49 ವರ್ಷಗಳ ಬಳಿಕ ಸೆಮಿಫೈನಲ್ ಪ್ರವೇಶಿಸಿದ್ದ ಭಾರತ ಪುರುಷರ ಹಾಕಿ ತಂಡ ಮಂಗಳವಾರ ಬೆಲ್ಜಿಯಂ ವಿರುದ್ಧ 2-5ರಲ್ಲಿ ಸೋಲು ಕಾಣುವ ಮೂಲಕ ನಿರಾಸೆಯನುಭವಿಸಿದೆ. ಆದರೆ ಗುರುವಾರ ಕಂಚಿನ ಪದಕಕ್ಕಾಗಿ ನಡೆಯುವ ಪಂದ್ಯದಲ್ಲಿ ಭಾರತ ತಂಡ ಸೆಮಿಫೈನಲ್ನಲ್ಲಿ ಮಾಡಿದ ಕೆಲವು ತಪ್ಪುಗಳನ್ನು ಸರಿಪಡಿಸಿಕೊಳ್ಳಬೇಕಾಗಿದೆ.
ಪೆನಾಲ್ಟಿ ಕಾರ್ನರ್ಸ್ ಬಿಟ್ಟುಕೊಡುವುದನ್ನು ಕಡಿಮೆ ಮಾಡಬೇಕು
ಭಾರತ ತಂಡ ಸೆಮಿಫೈನಲ್ನಲ್ಲಿ ಬೆಲ್ಜಿಯಂ ವಿರುದ್ಧ ಬರೋಬ್ಬರಿ 14 ಪೆನಾಲ್ಟಿ ಕಾರ್ನರ್ಸ್ಗೆ ಅನುವು ಮಾಡಿಕೊಟ್ಟಿತು. ಇದರಲ್ಲಿ ಎದುರಾಳಿ ತಂಡ 3 ಗೋಲು ಸಿಡಿಸಲು ಸಫಲವಾಗಿ ಟೈ ಆಗಿದ್ದ ಪಂದ್ಯವನ್ನು 5-2ರಲ್ಲಿ ಗೆದ್ದುಕೊಂಡಿತು. ಹಾಗಾಗಿ ಪದಕ ನಿರ್ಣಾಯಕ ಪಂದ್ಯದಲ್ಲಿ ಭಾರತೀಯರು ದೇಹಕ್ಕೆ ಚೆಂಡನ್ನು ತಾಗಿಸಿಕೊಳ್ಳುವುದನ್ನ ಕಡಿಮೆ ಮಾಡಬೇಕಿದೆ.
ಡಿಫೆನ್ಸ್ನಲ್ಲಿನ ತಪ್ಪುಗಳನ್ನು ಸರಿಪಡಿಸಕೊಳ್ಳಬೇಕು
ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ಭಾರತದ ಡಿಫೆನ್ಸ್ ಅದ್ಭುತವಾಗಿತ್ತು. ಆದರೆ, ಬೆಲ್ಜಿಯಂ ವಿರುದ್ಧ ಸಂಪೂರ್ಣ ಕಳಪೆಯಾಯಿತು. ಅದರಲ್ಲೂ ಕೊನೆಯ ಕ್ವಾರ್ಟರ್ನಲ್ಲಿ ಎದುರಾಳಿ ತಂಡ ಭಾರತದ ವ್ಯಾಪ್ತಿಗೆ ಸುಲಭವಾಗಿ ದಾಳಿ ಮಾಡಿ ಸಾಕಷ್ಟು ಪೆನಾಲ್ಟಿ ಕಾರ್ನರ್ಸ್ ಪಡೆದುಕೊಂಡರು. ಹಾಗಾಗಿ ಎದುರಾಳಿಯನ್ನು ಸಮರ್ಥವಾಗಿ ತಡೆಯುವತ್ತ ಮತ್ತು ದಾಳಿ ನಡೆಸುವುದರತ್ತ ಭಾರತ ಗಮನ ಹರಿಸಬೇಕು.
ದೈಹಿತವಾಗಿ ಮತ್ತಷ್ಟು ಸದೃಢರಾಗಬೇಕು
ಸೆಮಿಫೈನಲ್ ಭಾರತದ ಫಾರ್ವರ್ಡರ್ ಮತ್ತು ಡಿಫೆಂಡರ್ಗಳು ಬೆಲ್ಜಿಯಂ ವಿರುದ್ಧ ಕೌಂಟರ್ ಅಟ್ಯಾಕ್ ಮಾಡುವಲ್ಲಿ ವಿಫಲರಾದರು. ಪ್ರತಿಯೊಂದು ಹಂತದಲ್ಲೂ ಬೆಲ್ಜಿಯಂ ಭಾರತೀಯರ ಮೇಲೆ ಒತ್ತಡ ಹೇರುವುದರಲ್ಲಿ ಸಫಲರಾದರು. ಭಾರತೀಯರು ಬೆಲ್ಜಿಯಂ ಮಿಡ್‌ಫೀಲ್ಡ್, ವಿಶೇಷವಾಗಿ ಆಂಟೊಯಿನ್ ಸಿಲ್ವೈನ್ ಕಿನಾ ಅವರಿಗೆ ಸಾಕಷ್ಟು ಸ್ಥಳಾವಕಾಶ ಮತ್ತು ಸಮಯ ನೀಡಿದರು. ಇಂತಹ ತಪ್ಪುಗಳನ್ನು ನಿಯಂತ್ರಿಸಬೇಕಾಗಿದೆ.
ವೇಗವಾಗಿ ಹಿಂತಿರುಗುವುದು
ಸೆಮಿಫೈನಲ್ಸ್ ಪಂದ್ಯದಲ್ಲಿ ಪ್ರತಿದಾಳಿಗಳನ್ನು ಸಮರ್ಥಿಸಿಕೊಳ್ಳಲು ಭಾರತೀಯರು ಸ್ವಲ್ಪ ಹಿಂದುಳಿದಿದ್ದರು. ಇದು ತಮ್ಮ ಎದುರಾಳಿಗಳಿಗೆ ಅವಕಾಶಗಳನ್ನು ಸೃಷ್ಟಿಸಲು ಸ್ಥಳ ಮತ್ತು ಸಮಯ ನೀಡಿತು. ಭಾರತೀಯರ ಒದ್ದಾಟವನ್ನು ಬಂಡವಾಳವಾಗಿ ಮಾಡಿಕೊಂಡ ಬೆಲ್ಜಿಯನ್ನರು ತಾವಾಗಿಯೆ ತಪ್ಪುಗಳನ್ನು ಎಸೆಗುವಂತೆ ಮಾಡಿದರು.
ಭಾರತ ತಂಡ ಗುರುವಾರ ಜರ್ಮನಿಯ ವಿರುದ್ಧ ಸೆಣಸಾಡಲಿದ್ದು, ಈ ಮೇಲಿನ ಎಲ್ಲ ವಿಷಯಗಳನ್ನು ಸರಿಪಡಿಸಿಕೊಳ್ಳಬೇಕು. ಬರೋಬ್ಬರಿ 49 ವರ್ಷಗಳ ಬಳಿಕ ಸೆಮಿಫೈನಲ್ ತಲುಪಿರುವ ಭಾರತೀಯ ಪಡೆ ಮಾನಸಿಕವಾಗಿಯೂ ಸದೃಢರಾಗಿ ಕಣಕ್ಕಿಳಿಯುವ ಅವಶ್ಯಕತೆಯಿದೆ.
ಇದನ್ನೂ ಓದಿ: Olympics ಶಾಟ್ಪುಟ್: ಫೈನಲ್ ಪ್ರವೇಶಿಸಲು ವಿಫಲರಾದ ತಾಜಿಂದರ್ಪಾಲ್ ಸಿಂಗ್
