ಬೆಂಗಳೂರು: ಭಾರತ ರಾಷ್ಟ್ರೀಯ ಫುಟ್ಬಾಲ್ ತಂಡದ ನಾಯಕ ಸುನಿಲ್ ಛೆಟ್ರಿ ಅವರ ಮನೆಯಲ್ಲಿ ರಕ್ಷಾಬಂಧನ ಸಂತಸ ತಂದಿದೆ. ಭಾರತದ ಪುಟ್ಬಾಲ್ ತಂಡದ ನಾಯಕನಿಗೆ ಗಂಡು ಮಗು ಜನಿಸಿದೆ. ಅವರ ಪತ್ನಿ ಸೋನಂ ಭಟ್ಟಾಚಾರ್ಯ ಗಂಡು ಮಗುವಿಗೆ ಜನ್ಮ ನೀಡಿದ್ದಾರೆ. ಇದು ಸುನೀಲ್ ಮತ್ತು ಅವರ ಪತ್ನಿಯನ್ನು ಹೊರತುಪಡಿಸಿ ಅಭಿಮಾನಿಗಳಿಗೂ ಸಂತೋಷದ ವಿಷಯವಾಗಿದೆ.
ಕುಟುಂಬದ ಮೂಲಗಳು ಮತ್ತು ಮಾಧ್ಯಮ ವರದಿಗಳ ಪ್ರಕಾರ, ಸೋನಂ ಪ್ರಸ್ತುತ ಬೆಂಗಳೂರಿನ ನರ್ಸಿಂಗ್ ಹೋಮ್‌ನಲ್ಲಿ ಆರೋಗ್ಯವಾಗಿದ್ದಾರೆ. ತಾಯಿ ಮತ್ತು ಮಗು ಇಬ್ಬರೂ ಆರೋಗ್ಯವಾಗಿದ್ದಾರೆ ಎಂದು ಹೇಳಲಾಗುತ್ತಿದೆ. ಬುಧವಾರ ಬೆಳಗ್ಗೆ 11:11ಕ್ಕೆ ಸೋನಂ ಗಂಡು ಮಗುವಿಗೆ ಜನ್ಮ ನೀಡಿದ್ದಾರೆ.
ಇನ್ನು ಸುನಿಲ್ ಛಟ್ರಿ ಈ ವಿಷಯವನ್ನು ಸಾಮಾಜಿಕ ಮಾಧ್ಯಮದಲ್ಲಿ ಹಂಚಿಕೊಂಡಿಲ್ಲ. ಇತ್ತೀಚಿನ ದಿನಗಳಲ್ಲಿ ಸೆಲೆಬ್ರಿಟಿಗಳಲ್ಲಿ ಈ ಪ್ರವೃತ್ತಿ ಸಾಮಾನ್ಯವಾಗಿದೆ. ಸಾಮಾನ್ಯವಾಗಿ ಸಕಾರಾತ್ಮಕ ಸುದ್ದಿಗಳು ಸಾಮಾಜಿಕ ಮಾಧ್ಯಮ ಪ್ಲಾಟ್‌ಫಾರ್ಮ್‌ಗಳಲ್ಲಿ ವೈರಲ್ ಆಗುತ್ತವೆ. ಆದರೆ, ಸುನಿಲ್ ಮತ್ತು ಸೋನಮ್ ಇಬ್ಬರೂ ಈ ವಿಷಯದ ಬಗ್ಗೆ ಆನ್‌ಲೈನ್‌ನಲ್ಲಿ ಯಾವುದೇ ಮಾಹಿತಿಯನ್ನು ಹಂಚಿಕೊಳ್ಳದಿರಲು ನಿರ್ಧರಿಸಿದ್ದಾರೆ ಎನ್ನಲಾಗ್ತಿದೆ.
ಕಳೆದ ಜೂನ್‌ ತಿಂಗಳಲ್ಲಿ ನಡೆದ ಇಂಟರ್‌ಕಾಂಟಿನೆಂಟಲ್ ಕಪ್ ಪಂದ್ಯದ ಸಂದರ್ಭದಲ್ಲಿ, ಸುನಿಲ್ ಛೆಟ್ರಿ ತಾನು ತಂದೆಯಾಗುತ್ತಿರುವುದಾಗಿ ಬಹಿರಂಗಪಡಿಸಿದ್ದರು. ಗೋಲು ಗಳಿಸಿದ ಸಂದರ್ಭದಲ್ಲಿ ತಮ್ಮ ಜೆರ್ಸಿಯ ಒಳಗೆ ಫುಟ್ಬಾಲ್ ಚೆಂಡನ್ನು ಇಟ್ಟು ತಮ್ಮ ಪತ್ನಿ ಗರ್ಭಿಣಿ ಎಂಬುದನ್ನು ವಿಭಿನ್ನ ಶೈಲಿಯಲ್ಲಿ ಹೇಳಿದ್ದರು. ಮೈದಾನದ ವೀಕ್ಷಕರ ಗ್ಯಾಲರಿಯಲ್ಲಿದ್ದ ಸೋನಮ್ ಕಡೆಗೆ ನೋಡುತ್ತಾ ಸಂಭ್ರಮಾಚರಿಸಿದ್ದರು. ಅಲ್ಲದೇ ಸೋನಂ ಕೂಡಾ ಅದಕ್ಕೆ ಪ್ರತಿಕ್ರಿಯೆ ನೀಡಿದ್ದರು. ಇದೀಗ ಕುಟುಂಬವು ಮುದ್ದಾದ ಮಗುವನ್ನು ಸ್ವಾಗತಿಸಿದೆ.
ಸುನಿಲ್ ಛೆಟ್ರಿ ಮತ್ತು ಸೋನಮ್ ಭಟ್ಟಾಚಾರ್ಯ 2017ರಲ್ಲಿ ದಾಂಪತ್ಯ ಜೀವನಕ್ಕೆ ಕಾಲಿಟ್ಟರು. ಸೋನಮ್ ಅವರು ದಿಗ್ಗಜ ಫುಟ್ಬಾಲ್ ಆಟಗಾರ ಸುಬ್ರತಾ ಭಟ್ಟಾಚಾರ್ಯ ಅವರ ಮಗಳು. ಸುನಿಲ್ ಛೆಟ್ರಿ ನಾಯಕತ್ವದಲ್ಲಿ ಭಾರತ ಫುಟ್ಬಾಲ್ ತಂಡವು ಈ ವರ್ಷ ಹಲವು ಟ್ರೋಫಿಗಳನು ಗೆದ್ದುಕೊಂಡಿದೆ. ತಂಡವನ್ನು ಮುನ್ನಡೆಸುವಲ್ಲಿ ಛೆಟ್ರಿ ಪ್ರಮುಖ ಪಾತ್ರ ವಹಿಸಿದೆ. ಭಾರತವು ಕಳೆದ ಜೂನ್‌ ತಿಂಗಳಲ್ಲಿ ಇಂಟರ್‌ಕಾಂಟಿನೆಂಟಲ್ ಕಪ್ ಗೆದ್ದುಕೊಂಡಿತು.
ಕಳೆದ ಕೆಲವು ಸಮಯಗಳು ಛೆಟ್ರಿಗೆ ಸಾಥ್ ನೀಡಿವೆ. ಅವರು ಭಾರತಕ್ಕಾಗಿ SAFF ಚಾಂಪಿಯನ್‌ಶಿಪ್ ಗೆದ್ದಿದ್ದರು. ಇದಲ್ಲದೆ, ಅವರು ಗೋಲ್ಡನ್ ಬೂಟ್ ಮತ್ತು ಗೋಲ್ಡನ್ ಬಾಲ್ ಅನ್ನು ಸಹ ಗೆದ್ದಿದ್ದಾರೆ. ಇದಾದ ನಂತರ ಅವರು ತಮ್ಮ ಕುಟುಂಬದೊಂದಿಗೆ ವಿಶ್ರಾಂತಿ ಪಡೆಯುತ್ತಿದ್ದಾರೆ. ಡ್ಯುರಾಂಡ್ ಕಪ್ನಲ್ಲೂ ಸಹ ಛೆಟ್ರಿ ಭಾಗವಹಿಸಿರಲಿಲ್ಲ.
ಸೆಪ್ಟೆಂಬರ್‌ನಲ್ಲಿ ಥಾಯ್ಲೆಂಡ್‌ನಲ್ಲಿ ನಡೆಯಲಿರುವ ಕಿಂಗ್ಸ್ ಕಪ್‌ನಿಂದಲೂ ಛೆಟ್ರಿಗೆ ವಿಶ್ರಾಂತಿ ನೀಡಲಾಗಿದೆ. ಮುಖ್ಯ ತರಬೇತುದಾರ ಇಗೊರ್ ಸ್ಟಿಮ್ಯಾಕ್ ಅವರು ತಮ್ಮ ಕುಟುಂಬದೊಂದಿಗೆ ಸಮಯ ಕಳೆಯಲು ಅನುಮತಿ ನೀಡಿದ್ದಾರೆ. ಏಷ್ಯನ್ ಗೇಮ್ಸ್‌ನಿಂದ ಛೆಟ್ರಿ ಟೀಂ ಇಂಡಿಯಾಗೆ ಪುನರಾಗಮನ ಮಾಡಬಹುದಾಗಿದೆ. ಈ ಪಂದ್ಯಗಳಲ್ಲಿ ಅವರು 9 ವರ್ಷಗಳ ನಂತರ ತಂಡವನ್ನು ಮುನ್ನಡೆಸಲಿದ್ದಾರೆ.
ಓದಿ: Sunil Chhetri: ನಿವೃತ್ತಿ ಬಗ್ಗೆ ಮೌನ ಮುರಿದ ಭಾರತ ಫುಟ್ಬಾಲ್ ತಂಡದ ನಾಯಕ ಸುನಿಲ್ ಛೆಟ್ರಿ
