ಹಲವು ಚಿತ್ರಗಳನ್ನು ಕೈಯಲ್ಲಿ ಹಿಡಿದುಕೊಂಡಿರುವ ಬಾಲಿವುಡ್ ನಟ ಅಕ್ಷಯ್ ಕುಮಾರ್ ನಟನೆ ಜೊತೆಗೆ ಮತ್ತೊಂದು ಜವಾಬ್ದಾರಿಯನ್ನು ಹೊತ್ತುಕೊಳ್ಳಲಿದ್ದಾರೆ. ಜುಲೈ 27 ರಂದು ಮುಂಬೈನಲ್ಲಿ ನಡೆಯಲಿರುವ ಪ್ರೊ ಕಬಡ್ಡಿ ಲೀಗ್ ಪಂದ್ಯಕ್ಕೆ ಅಕ್ಕಿ ಅತಿಥಿ ನಿರೂಪಕರಾಗಿ ದೇಶಿ ಆಟದ ಬಗ್ಗೆ ವಿವರಣೆ ನೀಡಲಿದ್ದಾರಂತೆ. ಇಂತಹದ್ದೊಂದು ಸುದ್ದಿ ಬಾಲಿವುಡ್ ಅಂಗಳದಲ್ಲಿ ಹರಿದಾಡುತ್ತಿದ್ದು ಕ್ರೀಡಾರ್ಥಿಗಳಲ್ಲಿ ಮತ್ತಷ್ಟು ಸ್ಫೂರ್ತಿ ತರಿಸಿದೆ.
ಅತಿಥಿ ನಿರೂಪಣೆಯ ಜವಾಬ್ದಾರಿ ಹೊತ್ತ ಅಕ್ಷಯ್ ಕುಮಾರ್, ಸೋಮವಾರ ಬಾಂದ್ರಾದ ಮೆಹಬೂಬ್ ಸ್ಟುಡಿಯೋದಲ್ಲಿ ಪ್ರೊ ಕಬಡ್ಡಿ ಲೀಗ್ಗಾಗಿ ವಿಶೇಷ ಪ್ರೋಮೋ ಚಿತ್ರೀಕರಿಸಿದ್ದಾರೆ. ಜು. 27 ರಂದು ಮುಂಬೈನಲ್ಲಿ ನಡೆಯಲಿರುವ ಕಬಡ್ಡಿ ಪಂದ್ಯಕ್ಕೆ ಈ ನಟ ಅತಿಥಿ ನಿರೂಪಣೆ ಮಾಡಲಿದ್ದಾರೆ. ಇನ್ನು ಪ್ರೊ ಕಬಡ್ಡಿ ಲೀಗ್‌ನ ಈ ಆವೃತ್ತಿಗೆ ಜುಲೈ 20ರಂದು ಹೈದರಾಬಾದ್ನಲ್ಲಿ ಚಾಲನೆ ದೊರೆಯಲಿದೆ. ಒಂದು ವಾರದ ಬಳಿಕ ಟೂರ್ನಿಗಳು ಮುಂಬೈಗೆ ಬರಲಿವೆ.
ಅಂದು ನಟ ಅಕ್ಷಯ್ ಕುಮಾರ್ ರಾಷ್ಟ್ರಗೀತೆ ಹಾಡನ್ನು ಹಾಡುವ ಮೂಲಕ ನಿರೂಪಣೆಗೆ ಇಳಿಯಲಿದ್ದಾರಂತೆ. ಎರಡು ವರ್ಷಗಳ ಹಿಂದೆ ಅಕ್ಷಯ್ ಕುಮಾರ್, ಬಂಗಾಳ ವಾರಿಯರ್ಸ್ ತಂಡದೊಂದಿಗೆ ಪಾಲುದಾರಿಕೆ ಹೊಂದಿದ್ದು ಇಲ್ಲಿ ನೆನಪಿಸಿಕೊಳ್ಳಬಹುದು.
