2021ರ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ನ ಫೈನಲ್ ಸೋಲಿನ ನಂತರ ಎರಡು ವರ್ಷ ಬಿಟ್ಟು ಅಂದರೆ, ಈ ವರ್ಷ ಮತ್ತೆ ಅಂತಿಮ ಘಟ್ಟ ಪ್ರವೇಶಿಸಿದರೂ ಭಾರತ ಯಶಸ್ಸು ಸಾಧಿಸಲಿಲ್ಲ. ಕ್ರಿಕೆಟ್ ಜನಕ ಇಂಗ್ಲೆಂಡ್ನ ಮೈದಾನದಲ್ಲಿ ಮೊದಲ ಬಾರಿಗೆ ಟ್ರೋಫಿಯನ್ನು ನ್ಯೂಜಿಲೆಂಡ್ಗೆ ಬಿಟ್ಟುಕೊಟ್ಟರೆ, ಎರಡನೇ ಬಾರಿಗೆ ಆಸ್ಟ್ರೇಲಿಯಾ ಕೈಗೆ ಕೊಟ್ಟಿತು. ಹೀಗಿರುವಾಗ ಭಾರತ ತಂಡದಲ್ಲಿನ ಬದಲಾವಣೆ ಬಗ್ಗೆಯೂ ಚರ್ಚೆಗಳಾಗುತ್ತಿವೆ. ಹೊಸಬರ ಅವಕಾಶದ ಬಗ್ಗೆ ಮಾತುಗಳು ಕೇಳಿಬರುತ್ತಿವೆ.
ಭಾರತದಲ್ಲಿ ಯುವ ಪ್ರತಿಭೆಗಳಿಗೆ ಬರವಿಲ್ಲ. ಐಪಿಎಲ್ ಮತ್ತು ದೇಶೀಯ ಪಂದ್ಯಗಳಲ್ಲಿ ಭರ್ಜರಿ ಪ್ರದರ್ಶನ ನೀಡಿ ಹಲವಾರು ಪ್ರತಿಭೆಗಳು ಗಮನ ಸೆಳೆಯುತ್ತಿದ್ದಾರೆ. ಮುಂದಿನ ದಿನಗಳಲ್ಲಿ ಭಾರತ ತಂಡ ಸೇರುವ ಸಾಧ್ಯತೆ ಇರುವ ಸ್ಟಾರ್ ಯುವ ಆಟಗಾರರ ಪಟ್ಟಿ ನೋಡೋಣ.
- ಅಭಿಮನ್ಯು ಈಶ್ವರನ್: 27 ವರ್ಷದ ಅಭಿಮನ್ಯು ಕೆಲವು ಸರಣಿಯ ಟೆಸ್ಟ್ ತಂಡದಲ್ಲಿ ಸ್ಟ್ಯಾಂಡ್‌ಬೈ ಆಟಗಾರನಾಗಿ ಕಾಣಿಸಿಕೊಂಡಿದ್ದಾರೆ. 2023- 25 ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ ಪ್ರಯಾಣದಲ್ಲಿ ಇವರಿಗೆ ಅವಕಾಶ ಸಿಗುವ ಸಾಧ್ಯತೆಗಳಿವೆ. 87 ಪ್ರಥಮ ದರ್ಜೆ ಪಂದ್ಯಗಳಲ್ಲಿ, 150 ಇನ್ನಿಂಗ್ಸ್‌ಗಳಲ್ಲಿ 22 ಶತಕ ಮತ್ತು 26 ಅರ್ಧಶತಕಗಳೊಂದಿಗೆ 47.85 ಸರಾಸರಿಯಲ್ಲಿ 6,556 ರನ್ ಗಳಿಸಿದ್ದಾರೆ. ಅತ್ಯುತ್ತಮ ಸ್ಕೋರ್ 233 ಆಗಿದೆ. ಹೀಗಾಗಿ ಟೆಸ್ಟ್ನಲ್ಲಿ ಭರವಸೆಯ ಬ್ಯಾಟರ್ ಆಗಿದ್ದಾರೆ.
- ಯಶಸ್ವಿ ಜೈಸ್ವಾಲ್: 15 ಪಂದ್ಯಗಳಲ್ಲಿ 80.21 ಸರಾಸರಿಯಲ್ಲಿ ಒಂಬತ್ತು ಶತಕಗಳು ಮತ್ತು ಎರಡು ಅರ್ಧಶತಕಗಳೊಂದಿಗೆ 1,845 ರನ್ ಗಳಿಸಿರುವ ಯುವ ಬ್ಯಾಟರ್ ಜೈಸ್ವಾಲ್ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ 2023ರ ಫೈನಲ್ ಟೀಂನ ಮೀಸಲು ಆಟಗಾರರಾಗಿ ಆಯ್ಕೆಯಾಗಿದ್ದರು. ಈ ವರ್ಷದ ಐಪಿಎಲ್ನಲ್ಲಿ ಮಿಂಚಿನ ಬ್ಯಾಟಿಂಗ್ ಪ್ರದರ್ಶನವನ್ನು ಯಶಸ್ವಿ ತೋರಿದ್ದಾರೆ. 16ನೇ ಆವೃತ್ತಿಯಲ್ಲಿ ಅವರು 14 ಪಂದ್ಯಗಳಲ್ಲಿ ಒಂದು ಶತಕ ಮತ್ತು ಐದು ಅರ್ಧಶತಕಗಳೊಂದಿಗೆ 625 ರನ್ಗಳನ್ನು ಗಳಿಸುವ ಮೂಲಕ ಭಾರತ ತಂಡದ ಕದ ತಟ್ಟಿದ್ದಾರೆ. ಮುಂದಿನ ದಿನಗಳಲ್ಲಿ ಆಡುವ 11 ರಲ್ಲಿ ಸ್ಥಾನ ಪಡೆಯುವ ಭರವಸೆಯೂ ಇದೆ.
- ರಜತ್ ಪಾಟಿದಾರ್: ಮಧ್ಯಪ್ರದೇಶ ಬ್ಯಾಟರ್ ಪ್ರಥಮ ದರ್ಜೆ ಪಂದ್ಯಗಳಲ್ಲಿ ಉತ್ತಮ ಅಂಕಿಅಂಶಗಳನ್ನು ಹೊಂದಿದ್ದಾರೆ. ಇವರ ಮೇಲೆ ಹೆಚ್ಚಿನ ಭರವಸೆಯೂ ಇದ್ದು ಬೃಹತ್ ಮೊತ್ತ ಕಲೆಹಾಕುವ ಸಾಮರ್ಥ್ಯ ಹೊಂದಿದ್ದಾರೆ. 52 ಪ್ರಥಮ ದರ್ಜೆ ಪಂದ್ಯಗಳಲ್ಲಿ 45.72 ಸರಾಸರಿಯಲ್ಲಿ 3,795 ರನ್ ಗಳಿಸಿದ್ದಾರೆ. 88 ಇನ್ನಿಂಗ್ಸ್‌ಗಳಲ್ಲಿ 11 ಶತಕ ಮತ್ತು 22 ಅರ್ಧ ಶತಕಗಳನ್ನು ಗಳಿಸಿದ್ದಾರೆ. 2022ರಲ್ಲಿ ಆರ್ಸಿಬಿ ಪರ ಉತ್ತಮ ಬ್ಯಾಟಿಂಗ್ ಮಾಡಿದ ಪಾಟಿದಾರ್ ಗಮನ ಸೆಳೆದಿದ್ದರು. ಈ ವರ್ಷ ಗಾಯಕ್ಕೆ ತುತ್ತಾದ ಪಾಟಿದಾರ್ ಸಂಪೂರ್ಣ ಐಪಿಎಲ್ ಆವೃತ್ತಿಯಿಂದಲೇ ಹೊರಗುಳಿದರು. ವಿದೇಶದಲ್ಲಿ ಚಿಕಿತ್ಸೆ ಪಡೆದಿರುವ ಇವರು ಭಾರತ ತಂಡ ಪ್ರವೇಶಿಸುವ ಆಟಗಾರ.
- ರುತುರಾಜ್ ಗಾಯಕ್ವಾಡ್: ಚೆನ್ನೈ ಸೂಪರ್ ಕಿಂಗ್ಸ್ (ಸಿಎಸ್ಕೆ) ಬ್ಯಾಟರ್ ರುತುರಾಜ್ ಐಪಿಎಲ್ನಲ್ಲಿ ಉತ್ತಮ ಪ್ರದರ್ಶನ ನೀಡುತ್ತಿದ್ದಾರೆ. ಈ ವರ್ಷದವೂ ಭರ್ಜರಿ ಬ್ಯಾಟಿಂಗ್ ಮಾಡಿದ್ದರು. ಇದರಿಂದ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ನ ಮೀಸಲು ಆಟಗಾರರ ಪಟ್ಟಿಯಲ್ಲಿ ಅವರ ಹೆಸರು ಕೇಳಿಬಂದಿತ್ತು. ಆದರೆ ವಿವಾಹದ ಕಾರಣ ಅವರು ಇಂಗ್ಲೆಂಡ್ ಪ್ರವಾಸವನ್ನು ತಪ್ಪಿಸಿಕೊಂಡರು. ಅವರ ಬದಲಾಗಿ ಜೈಸ್ವಾಲ್ ಅವರನ್ನು ಆಯ್ಕೆ ಮಾಡಲಾಯಿತು. ಗಾಯಕ್ವಾಡ್ ಪ್ರಥಮ ದರ್ಜೆಯಲ್ಲಿ 28 ಪಂದ್ಯಗಳನ್ನು ಆಡಿದ್ದು, 1,941 ರನ್ನ್ನು 42.19 ಸರಾಸರಿಯಲ್ಲಿ ಕಲೆಹಾಕಿದ್ದಾರೆ. ಅವರು 6 ಶತಕ ಮತ್ತು ಒಂಬತ್ತು ಅರ್ಧಶತಕ ಗಳಿಸಿದ್ದು, ಅತ್ಯುತ್ತಮ ಸ್ಕೋರ್ 195 ಆಗಿದೆ.ಪ್ರಸಿದ್ಧ ಕೃಷ್ಣ ಮತ್ತು ಮುಖೇಶ್ ಕುಮಾರ್
- ಪ್ರಸಿದ್ಧ್ ಕೃಷ್ಣ: ವೇಗಿ ಕೃಷ್ಣ ಭಾರತಕ್ಕಾಗಿ ಈಗಾಗಲೇ 14 ಏಕದಿನಗಳನ್ನು ಆಡಿದ್ದು, 23.92ರ ಸರಾಸರಿಯಲ್ಲಿ 5.32ರ ಎಕಾನಮಿ ದರದಲ್ಲಿ 25 ವಿಕೆಟ್ಗಳನ್ನು ಕಬಳಿಸಿದ್ದಾರೆ. ಗಾಯದಿಂದಾಗಿ ಬುಮ್ರಾ ಅವರ ಅನಿಶ್ಚಿತತೆ ಮತ್ತು ಮೊಹಮ್ಮದ್ ಶಮಿ ವಯಸ್ಸಾದ ಕಾರಣ, ಕೃಷ್ಣ ಅವರು ಭಾರತದ ಟೆಸ್ಟ್ ತಂಡಕ್ಕೆ ಆಯ್ಕೆ ಆಗುವ ಬೌಲರ್ ಆಗಿದ್ದಾರೆ.
- ಮುಖೇಶ್ ಕುಮಾರ್: 29 ವರ್ಷದ ಬಂಗಾಳದ ವೇಗಿ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ನಲ್ಲಿ ಮೀಸಲು ಆಟಗಾರನಾಗಿ ಸ್ಥಾನ ಪಡೆದುಕೊಂಡರು. ಐಪಿಎಲ್ನಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ಗಾಗಿ ಆಡುವ ಈ ಪ್ರತಿಭೆ ಪ್ರಥಮ ದರ್ಜೆ ಕ್ರಿಕೆಟ್ನಲ್ಲಿ ಉತ್ತಮ ಅಂಕಿಅಂಶ ಹೊಂದಿದ್ದಾರೆ. 39 ಪಂದ್ಯಗಳಲ್ಲಿ 21.55 ರ ಸರಾಸರಿ ಮತ್ತು 2.70 ಎಕಾನಮಿ ದರದಲ್ಲಿ 149 ವಿಕೆಟ್ಗಳನ್ನು ಉರುಳಿಸಿದ್ದು, 40 ರನ್ ಕೊಟ್ಟು 6 ವಿಕೆಟ್ ಪಡೆದಿರುವುದು ಉತ್ತಮ ಬೌಲಿಂಗ್ ಸಾಧನೆ.
ಇದನ್ನೂ ಓದಿ: ICC Ranking: ರಹಾನೆ, ಶಾರ್ದೂಲ್ ಐಸಿಸಿ ರ್‍ಯಾಂಕಿಂಗ್ ಏರಿಕೆ; ಆಡದೇ ಇದ್ದರೂ ಅಶ್ವಿನ್‌ಗೆ ಅಗ್ರಸ್ಥಾನ
