ಮೊಹಾಲಿ: ಶ್ರೀಲಂಕಾ ವಿರುದ್ಧ ಮೊದಲ ಟೆಸ್ಟ್ನಲ್ಲಿ ರವೀಂದ್ರ ಜಡೇಜಾ ಶತಕದ ನೆರವಿನಿಂದ ಟೀಮ್ ಇಂಡಿಯಾ ಬೃಹತ್ ಮೊತ್ತ ದಾಖಲಿಸಿದ್ದಲ್ಲದೆ, ಮೊದಲ ಇನ್ನಿಂಗ್ಸ್ನಲ್ಲಿ ಲಂಕಾದ 4 ವಿಕೆಟ್ ಉಡಾಯಿಸಿ ಎರಡನೇ ದಿನವೂ ಸಂಪೂರ್ಣ ಪ್ರಾಬಲ್ಯ ಸಾಧಿಸಿದೆ.
ಶುಕ್ರವಾರ ಆರಂಭದ ದಿನ 6 ವಿಕೆಟ್ ಕಳೆದುಕೊಂಡು 357 ರನ್ಗಳಿಸಿದ್ದ ರೋಹಿತ್ ಪಡೆ, 2ನೇ ದಿನ 574 ರನ್ಗಳಿಸಿ ಡಿಕ್ಲೇರ್ ಘೋಷಿಸಿತು. ನಿನ್ನೆ ಅಜೇಯ 45 ರನ್ಗಳಸಿದ್ದ ಆಲ್ರೌಂಡರ್ ರವೀಂದ್ರ ಜಡೇಜಾ ಇಂದು 228 ಎಸೆಗಳಲ್ಲಿ 17 ಬೌಂಡರಿ ಮತ್ತು 3 ಸಿಕ್ಸರ್ಗಳ ನೆರವಿನಿಂದ ಅಜೇಯ 175 ರನ್ಗಳಿಸಿದರು. ಇವರಿಗೆ ಸಾಥ್ ನೀಡಿದ ಅಶ್ವಿನ್ 61 ರನ್ಗಳಿಸಿದರು.
ಶುಕ್ರವಾರ ಮಯಾಂಕ್ ಅಗರ್ವಾಲ್ 33, ರೋಹಿತ್ ಶರ್ಮಾ 29, ಹನುಮ ವಿಹಾರಿ 58, ವಿರಾಟ್ ಕೊಹ್ಲಿ 45, ರಿಷಭ್ ಪಂತ್ 96, ಶ್ರೇಯಸ್ ಅಯ್ಯರ್ 27 ರನ್ಗಳಿಸಿದ್ದರು.
ಲಂಕಾಗೆ ಆರಂಭಿಕ ಆಘಾತ:
ಭಾರತದ 574 ರನ್ಗಳ ಬೃಹತ್ ಮೊತ್ತವನ್ನು ಹಿಂಬಾಲಿಸುತ್ತಿರುವ ಶ್ರೀಲಂಕಾ ತಂಡ ಆರಂಭಿಕ ಆಘಾತ ಅನುಭವಿಸಿದೆ. ತಂಡದ ಬ್ಯಾಟಿಂಗ್ ಬಲವಾಗಿದ್ದ ನಾಯಕ ದಿಮುತ್ ಕರುಣರತ್ನೆ (28)ಯನ್ನು ಜಡೇಜಾ ಎಲ್ಬಿ ಬಲೆಗೆ ಬೀಳಿಸುವ ಮೂಲಕ ಪ್ರವಾಸಿ ತಂಡಕ್ಕೆ ಆಘಾತ ನೀಡಿದ್ದಾರೆ. ಅನುಭವಿ ಅಶ್ವಿನ್ 17 ರನ್ಗಳಿಸಿದ್ದ ತಿರಿಮನ್ನೆ ಮತ್ತು 1 ರನ್ಗಳಿಸಿದ್ದ ಧನಂಜಯ ಡಿಸಿಲ್ವಾ ವಿಕೆಟ್ ಪಡೆದರೆ, ಮ್ಯಾಥ್ಯೂಸ್ರನ್ನು(22) ಬುಮ್ರಾ ಪೆವಿಲಿಯನ್ಗಟ್ಟಿದ್ದಾರೆ.
2ನೇ ದಿನದಾಟದ ಅಂತ್ಯಕ್ಕೆ ಶ್ರೀಲಂಕಾ 4 ವಿಕೆಟ್ ಕಳೆದುಕೊಂಡು 108ರನ್ಗಳಿಸಿದೆ. ಪಾತುಮ್ ನಿಸ್ಸಾಂಕ 17, ಚರಿತ್ ಅಸಲಂಕಾ 1 ರನ್ಗಳಿಸಿ ಕ್ರೀಸ್ನಲ್ಲಿದ್ದಾರೆ.
ಜಡೇಜಾ ದಾಖಲೆ:
ಜಡೇಜಾ ಶನಿವಾರ ಈ ಶತಕದ ಮೂಲಕ ಕಪಿಲ್ ದೇವ್ ಅವರ ಹೆಸರಿನಲ್ಲಿದ್ದ 35 ವರ್ಷಗಳ ಸುದೀರ್ಘ ದಾಖಲೆಯನ್ನು ಮುರಿದರು. ಕಪಿಲ್1986ರಲ್ಲಿ ಶ್ರೀಲಂಕಾ ವಿರುದ್ಧವೇ ಕಾನ್ಪುರದಲ್ಲಿ ನಡೆದಿದ್ದ ಟೆಸ್ಟ್ ಪಂದ್ಯದಲ್ಲಿ 7ನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್ ಇಳಿದು 163 ರನ್ಗಳಿಸಿದರು.
ಜಡೇಜಾ 7ನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್ ಮಾಡಿ 150ಕ್ಕೂ ಹೆಚ್ಚು ರನ್ಗಳಿಸಿದ ಭಾರತದ 3ನೇ ಬ್ಯಾಟರ್ ಎನಿಸಿಕೊಂಡರು. ಜಡೇಜಾ, ಕಪಿಲ್ ದೇವ್ ಅಲ್ಲದೆ, ಭಾರತದ ಯುವ ವಿಕೆಟ್ ಕೀಪರ್ ರಿಷಭ್ ಪಂತ್ 7ನೇ ಕ್ರಮಾಂಕದಲ್ಲಿ 150ರ ಗಡಿ ದಾಟಿದ್ದಾರೆ. ಪಂತ್ 2019 ಸಿಡ್ನಿಯಲ್ಲಿ ಅಜೇಯ 159 ರನ್ಗಳಿಸಿದ್ದರು.
ಇದನ್ನೂ ಓದಿ:ಮಹಿಳಾ ವಿಶ್ವಕಪ್: ಇಂಗ್ಲೆಂಡ್ ವಿರುದ್ಧ ಆಸ್ಟ್ರೇಲಿಯಾಕ್ಕೆ 12 ರನ್ಗಳ ರೋಚಕ ಜಯ
