ಮುಂಬೈ: ಭಾರತದ ಭವಿಷ್ಯದ ಕ್ರಿಕೆಟಿಗ ಪೃಥ್ವಿ ಶಾ 15ನೇ ಆವೃತ್ತಿಯನ್ನು ಸ್ವಲ್ಪ ಶಾಂತವಾಗಿಯೇ ಆರಂಭಿಸಿದರೂ, ನಂತರ ಸತತ ಅರ್ಧಶತಕ ಸಿಡಿಸುವ ಮೂಲಕ ತಮ್ಮ ನೈಜ ಆಟಕ್ಕೆ ಮರಳಿದ್ದರು. ಮತ್ತೆ ಆರ್ಸಿಬಿ ವಿರುದ್ಧ ಮಂಕಾದರೂ ಬುಧವಾರ ನಡೆದ ಪಂಜಾಬ್ ವಿರುದ್ಧ ಕೇವಲ 20 ಎಸೆತಗಳಲ್ಲಿ 41 ರನ್ ಸಿಡಿಸಿ 116 ರನ್ಗಳ ಗುರಿಯನ್ನು ಕೇವಲ 10.3 ಓವರ್ಗಳಲ್ಲಿ ತಲುಪಲು ನೆರವಾಗಿದ್ದರು.
ಶಾ ಕಳೆದ ಆವೃತ್ತಿಯಿಂದಲೂ ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ನಂಬಿಕಸ್ಥ ಬ್ಯಾಟರ್ ಆಗಿದ್ದು, ತನ್ನ ಆಕ್ರಮಣಕಾರಿ ಬ್ಯಾಟಿಂಗ್ ನೆರವಿನಿಂದ ಕ್ಯಾಪಿಟಲ್ಸ್ಗೆ ಭರ್ಜರಿ ಆರಂಭ ಒದಗಿಸಿಕೊಡುತ್ತಿದ್ದಾರೆ. ಈ ವೇಳೆ ಕೆಲವೊಂದು ಪಂದ್ಯದಲ್ಲಿ ತಮ್ಮ ವೈಯಕ್ತಿಕ ದಾಖಲೆಯನ್ನು ಉತ್ತಮಪಡಿಸಿಕೊಳ್ಳುವ ಅವಕಾಶವಿದ್ದರೂ ತಮ್ಮ ಆಟದಲ್ಲಿ ಯಾವುದೇ ರಾಜಿ ಮಾಡಿಕೊಳ್ಳದ ಅವರನ್ನು ಮಾಜಿ ಕ್ರಿಕೆಟಿಗ ಸಂಜಯ್ ಮಂಜ್ರೇಕರ್ ಭೀತಿಯಿಲ್ಲದೆ ಸ್ವಾರ್ಥವಿಲ್ಲದೆ ಆಡುವ ಪೃಥ್ವಿ ಆಟ ಅಮೂಲ್ಯವಾದ ಕ್ರಿಕೆಟಿಗನನ್ನಾಗಿ ಮಾಡಿದೆ ಎಂದಿದ್ದಾರೆ.
ಐಪಿಎಲ್ನಲ್ಲಿ ಹೇಳುವುದಾದರೆ ಪೃಥ್ವಿ ಶಾ ಖಂಡಿತ ಅಮೂಲ್ಯವಾದ ಕ್ರಿಕೆಟಿಗ. ಒಂದು ವೇಳೆ ನಾನೇನಾದರೂ ಹರಾಜಿನ ಟೇಬಲ್ನಲ್ಲಿದ್ದರೆ, ಎಷ್ಟೇ ಕಷ್ಟವಾದರೂ ಅವರನ್ನು ಪಡೆದುಕೊಳ್ಳುವುದಕ್ಕೆ ಹೋಗುತ್ತೇನೆ. ಏಕೆಂದರೆ ಅವರು ವಿಕೆಟ್ ಒಪ್ಪಿಸುತ್ತೇನೆ ಎಂಬ ಚಿಂತೆಯಿಲ್ಲದೇ ಆಡುವ ವ್ಯಕ್ತಿ ಎಂದು ಮಂಜ್ರೇಕರ್ ಇಎಸ್ಪಿಎನ್ ಕ್ರಿಕ್ಇನ್ಫೋಗೆ ಹೇಳಿದ್ದಾರೆ.
ಆತ ನಿರ್ಭೀತ ಮತ್ತು ನಿಸ್ವಾರ್ಥ. ಅವರು ಸತತವಾಗಿ 3 ಬೌಂಡರಿಗಳನ್ನು ಬಾರಿಸಿ ತನ್ನ ಮೊತ್ತವನ್ನು 48ಕ್ಕೆ ಏರಿಸಿಕೊಂಡರು. ನಂತರದ ಎಸೆತವನ್ನು ಕೂಡ ಸಿಕ್ಸ್ ಹೊಡೆದು 54 ರನ್ ಪಡೆಯಬೇಕೆನ್ನುವ ವ್ಯಕ್ತಿ. ಇಂತಹ ಆಲೋಚನೆಯುಳ್ಳವರು ಅಮೂಲ್ಯವಾದ ಆಟಗಾರರು. ಇವರು ಟಾಪ್ ಆರ್ಡರ್ನಲ್ಲಿ ಎದುರಾಳಿಗೆ ಹಾನಿಯನ್ನುಂಟು ಮಾಡುವ ಸಾಮರ್ಥ್ಯ ಹೊಂದಿದ್ದಾರೆ ಎಂದು ಕೊಂಡಾಡಿದರು.
ಇದನ್ನೂ ಓದಿ:ಐಪಿಎಲ್ ಇತಿಹಾಸದಲ್ಲಿ ಒಂದೇ ತಂಡದ ವಿರುದ್ಧ 1,000 ರನ್ ಗಡಿದಾಟಿದ 2ನೇ ಬ್ಯಾಟರ್ ವಾರ್ನರ್‌
