ನವದೆಹಲಿ: ಭಾರತ ಮತ್ತು ಪಾಕಿಸ್ತಾನದ ಮಧ್ಯೆ ಕ್ರಿಕೆಟ್ ಹಗ್ಗಜಗ್ಗಾಟ ಮುಂದುವರಿದಿದೆ. ಪಾಕಿಸ್ತಾನದಲ್ಲಿ ನಡೆಯುವ ಏಷ್ಯಾಕಪ್ನಲ್ಲಿ ಭಾರತ ಭಾಗವಹಿಸಲಿಲ್ಲ ಎಂದು ಭಾರತ ಹೇಳಿದ್ದರೆ, ಭಾರತದಲ್ಲಿ ನಡೆಯುವ ವಿಶ್ವಕಪ್ ಅನ್ನು ತಾನು ಗೈರಾಗುವುದಾಗಿ ಪಾಕಿಸ್ತಾನ ಬೆದರಿಕೆ ಹಾಕಿದೆ. ಎರಡೂ ಕ್ರಿಕೆಟ್ ಸಂಸ್ಥೆಗಳ ನಡುವಿನ ಮನಸ್ತಾಪ ಬಗೆಹರಿಸಲು ಅಂತಾರಾಷ್ಟ್ರೀ ಕ್ರಿಕೆಟ್ ಮಂಡಳಿ ಶತಪ್ರಯತ್ನ ನಡೆಸುತ್ತಿದೆ. ಈಗಾಗಲೇ ಪಾಕ್ ಮಂಡಳಿ ಜೊತೆ ಅದರ ನಿಯೋಗ ಮಾತುಕತೆಯನ್ನೂ ನಡೆಸಿದೆ. ಆದಾಗ್ಯೂ ಯಾವುದೇ ನಿರ್ಣಯ ಹೊರಬಿದ್ದಿಲ್ಲ.
ಪಾಕಿಸ್ತಾನ ಮತ್ತು ಭಾರತದ ರಾಜಕೀಯ ಬಿಕ್ಕಟ್ಟಿನಿಂದಾಗಿ ಕ್ರಿಕೆಟ್ ಮೇಲೆ ಅದು ಪರಿಣಾಮ ಬೀರಿದೆ. ಭದ್ರತೆ ಕಾರಣಕ್ಕಾಗಿ ಟೀಂ ಇಂಡಿಯಾ ಪಾಕ್ಗೆ ತೆರಳಲು ಹಿಂದೇಟು ಹಾಕುತ್ತಿದೆ. ಹೀಗಿರುವಾಗ ಪಾಕಿಸ್ತಾನಕ್ಕೆ ಸೂಕ್ತ ಭದ್ರತೆ ನೀಡುವ ಆಶ್ವಾಸನೆ ನೀಡಿದಾಗ್ಯೂ ಅದು ಭಾರತಕ್ಕೆ ಬರಲು ತಗಾದೆ ತೆಗೆಯುತ್ತಿದೆ. ಇದು ರಾಜಕೀಯ ಬಣ್ಣವನ್ನೂ ಪಡೆದುಕೊಂಡಿದೆ.
ಪಾಕಿಸ್ತಾನ ಅದೆಷ್ಟೇ ವಿರೋಧ ವ್ಯಕ್ತಪಡಿಸಿದರೂ ಭಾರತದಲ್ಲಿ ನಡೆಯುವ ವಿಶ್ವಕಪ್ನಲ್ಲಿ ಭಾಗವಹಿಸಲು ಒಪ್ಪಲೇಬೇಕು. ಇಲ್ಲವಾದಲ್ಲಿ ಭಾರಿ ನಷ್ಟ ಅನುಭವಿಸುವುದು ಮಾತ್ರ ಖಂಡಿತ. ಈ ಪ್ರಜ್ಞೆ ಪಾಕ್ ಮಂಡಳಿಗಿದ್ದರೂ ಹಠಕ್ಕೆ ಬಿದ್ದಂತೆ ಅದು ವರ್ತಿಸುತ್ತಿದೆ. ಹೀಗಾಗಿ ಪಾಕಿಸ್ತಾನದ ಕ್ರಿಕೆಟ್ ನಿಯಂತ್ರಣ ಮಂಡಳಿಯು ಸರ್ಕಾರಕ್ಕೆ ಈ ಬಗ್ಗೆ ಮನವರಿಕೆ ಮಾಡಲು ಪ್ರಯತ್ನಿಸುತ್ತಿದೆ.
ಐಸಿಸಿ ನಿಧಿ ಕಟ್: ಒಂದು ವೇಳೆ ಐಸಿಸಿ ವಿಶ್ವಕಪ್ನಲ್ಲಿ ಪಾಕ್ ಭಾಗವಹಿಸದಿದ್ದರೆ, ಐಸಿಸಿಯಿಂದ ಬರುವ ನಿಧಿ ತಂಡದ ಕೈತಪ್ಪಲಿದೆ. ಐಸಿಸಿ ವಾರ್ಷಿಕವಾಗಿ ಕ್ರಿಕೆಟ್ ಮಂಡಳಿಗಳಿಗೆ ಆದಾಯ ಹಂಚಿಕೆ ಮಾಡುತ್ತದೆ. ಅದರಲ್ಲಿ ಪಾಕಿಸ್ತಾನ ನಾಲ್ಕನೇ ಅಧಿಕ ಹಣ ಪಡೆಯುವ ದೇಶವಾಗಿದೆ. ಮುಂದಿನ 4 ವರ್ಷಗಳಲ್ಲಿ (2024-27) ಭಾರತಕ್ಕೆ ಅತ್ಯಧಿಕ 1,908.753 ಕೋಟಿ ರೂಪಾಯಿ (ಶೇ.38.50) ಆದಾಯ ಬರಲಿದೆ. ಪಾಕಿಸ್ತಾನಕ್ಕೆ 285 ಕೋಟಿ(ಶೇ.5.75) ಆದಾಯ ಸಿಗಲಿದೆ. ಹೀಗಾಗಿ ಐಸಿಸಿಯ ಈವೆಂಟ್ಗಳಲ್ಲಿ ಅದು ಪಾಲ್ಗೊಳ್ಳಬೇಕು. ಹಾಗೊಂದು ವೇಳೆ ಭಾಗವಹಿಸದೇ ಇದ್ದಲ್ಲಿ ಬರುವ ಆದಾಯ ಖೋತಾ ಆಗುವುದು ಮಾತ್ರ ಖಂಡಿತ.
ನಿಷೇಧದ ಭೀತಿ: ಭಾರತದಲ್ಲಿ ನಡೆಯಲಿರುವ 2023 ರ ವಿಶ್ವಕಪ್‌ಗೆ ಪಾಕಿಸ್ತಾನ ಸರ್ಕಾರ ಕ್ರಿಕೆಟ್ ತಂಡವನ್ನು ಕಳುಹಿಸದಿದ್ದರೆ, ಕೆಲವು ವರ್ಷಗಳವರೆಗೆ ಪಾಕ್ ಟೀಂ ನಿಷೇಧಕ್ಕೆ ಒಳಗಾಗುವ ಭೀತಿ ಇದೆ. ಇದು ಪಾಕಿಸ್ತಾನ ಕ್ರಿಕೆಟ್ ನಿಯಂತ್ರಣ ಮಂಡಳಿಗೂ ಗೊತ್ತಿದೆ. ನಿಷೇಧಕ್ಕೊಳಗಾದೆ ಮುಂದೆ ನಡೆಯುವ ಯಾವುದೇ ಐಸಿಸಿ ಸ್ಪರ್ಧೆಗಳಲ್ಲಿ ತಂಡ ಭಾಗಿಯಾಗುವಂತಿಲ್ಲ.
ಐಸಿಸಿ ಚಾಂಪಿಯನ್ಸ್ ಟ್ರೋಫಿಯಿಂದಲೂ ಔಟ್: ಮಿನಿ ವಿಶ್ವಕಪ್ ಎಂದೇ ಹೇಳಲಾದ 2025 ರಲ್ಲಿ ನಡೆಯುವ ಐಸಿಸಿ ಚಾಂಪಿಯನ್ಸ್ ಟ್ರೋಫಿಯಿಂದಲೂ ತಂಡ ವಿಮುಖವಾಗಬೇಕಾಗುತ್ತದೆ. ವಿಶ್ವಕಪ್ನಲ್ಲಿ ಭಾಗವಹಿಸದೇ ಹೋದಲ್ಲಿ ಐಸಿಸಿ ಮುಂದಿನ ತನ್ನೆಲ್ಲಾ ಈವೆಂಟ್ಗಳಿಂದ ಪಾಕ್ ತಂಡವನ್ನು ದೂರವಿಡಬಹುದು. ಇಷ್ಟೆಲ್ಲಾ ಅವಘಡಗಳಿಗೆ ಪಾಕ್ ಮಂಡಳಿ ಎಡೆಮಾಡಿಕೊಡುವುದಿಲ್ಲ ಎಂಬುದು ಕ್ರಿಕೆಟ್ ಬಲ್ಲವರ ಅಭಿಪ್ರಾಯ.
ಇದನ್ನೂ ಓದಿ: $15 ಬಿಲಿಯನ್ ತಲುಪಿದ IPL ವ್ಯಾಪಾರ ಉದ್ಯಮ ಮೌಲ್ಯ; CSK, RCB ಫ್ರಾಂಚೈಸಿಗಳಿಗೆ ಹಣದ ಹೊಳೆ
