ನ್ಯೂಜಿಲೆಂಡ್ ವಿರುದ್ಧ ಬುಧವಾರ ನಡೆದ ಮೊದಲ ಸೆಮಿಫೈನಲ್ ಪಂದ್ಯ ಜಯಿಸಿದ ಪಾಕಿಸ್ತಾನ ಐಸಿಸಿ ಟಿ20 ವಿಶ್ವಕಪ್ ಕ್ರಿಕೆಟ್ ಟೂರ್ನಿಯ ಫೈನಲ್ ಪ್ರವೇಶಿಸಿದೆ. ಅಂತಿಮ ಹಂತಕ್ಕೆ ತಲುಪಿದ ಬೆನ್ನಲ್ಲೇ ಪಾಕ್ ತಂಡದ ಮೆಂಟರ್ ಮ್ಯಾಥ್ಯೂ ಹೇಡನ್ ಟೀಂ ಇಂಡಿಯಾ ಬಗ್ಗೆ ಮಾತನಾಡಿದ್ದಾರೆ. ತಾವು ಫೈನಲ್ ಪಂದ್ಯದಲ್ಲಿ ಭಾರತವನ್ನು ಎದುರಿಸಲು ಬಯಸುವುದಾಗಿ ಹೇಡನ್ ಹೇಳಿದ್ದಾರೆ.
ಪಂದ್ಯದ ಬಳಿಕ ಮಾಧ್ಯಮದವರೊಂದಿಗೆ ಪ್ರತಿಕ್ರಿಯಿಸಿದ ಮೆಂಟರ್ ಹೇಡನ್, 'ಫೈನಲ್ ಪಂದ್ಯದಲ್ಲಿ ಭಾರತವೇ ನಮಗೆ ಎದುರಾಳಿಯಾಗಬೇಕು. ಯಾಕೆಂದರೆ ಅವರ ವಿರುದ್ಧದ ಪಂದ್ಯವು ಬಹಳ ರೋಚಕತೆಯಿಂದ ಕೂಡಿರಲಿದೆ' ಎಂದು ಅಭಿಪ್ರಾಯಪಟ್ಟಿದ್ದಾರೆ. 'ಇಂದಿನ ಪ್ರದರ್ಶನವು ಬಹಳ ವಿಶೇಷವಾಗಿತ್ತು. ವೇಗದ ಬೌಲರ್ಗಳು ಉತ್ತಮ ಪ್ರದರ್ಶನ ತೋರಿದರು. ನಾವು ಇನ್ನೂ ಸಹ ನಮ್ಮ ಸಾಮರ್ಥ್ಯಕ್ಕೆ ತಕ್ಕಂತೆ ಅತ್ಯುತ್ತಮ ಪ್ರದರ್ಶನ ತೋರಿಲ್ಲ ಎಂದು ನಾನು ಭಾವಿಸುತ್ತೇನೆ. ಇದು ಬಹುಶಃ ನಮ್ಮನ್ನು ಅಂತಿಮ ಪಂದ್ಯದಲ್ಲಿ ಎದುರಿಸುವವರಿಗೆ ಭಯ ಮೂಡಿಸಲಿದೆ' ಎಂದಿದ್ದಾರೆ.
'ಮೆಲ್ಬೋರ್ನ್‌ ಪಿಚ್ ಉತ್ತಮ ಬ್ಯಾಟಿಂಗ್ ಟ್ರ್ಯಾಕ್ ಆಗಿರಲಿದೆ. ಅಲ್ಲಿ ಆಕಾಶವೇ ಮಿತಿಯಾಗಿದೆ. ನೀವು ಆಟಗಾರನ ನೈಪುಣ್ಯತೆಯನ್ನು ಹಿಮ್ಮೆಟ್ಟಿಸಲು ಸಾಧ್ಯವಿಲ್ಲ. ಬಾಬರ್ ಹಾಗೂ ರಿಜ್ವಾನ್ ಹಲವಾರು ವರ್ಷಗಳಿಂದ ತಂಡಕ್ಕಾಗಿ ಉತ್ತಮ ಆಟವಾಡಿದ್ದಾರೆ. ಮೊಹಮ್ಮದ್ ಹ್ಯಾರಿಸ್ ನೆಟ್ ಅಭ್ಯಾಸದ ವೇಳೆ ಪ್ರತಿ ಬೌಲರ್ಗಳಿಗೂ ಭರ್ಜರಿ ಹೊಡೆತ ಬಾರಿಸಿದ್ದಾರೆ' ಎಂದು ತಂಡದ ಆಟಗಾರರ ಪ್ರದರ್ಶನಕ್ಕೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
ನ್ಯೂಜಿಲೆಂಡ್ ಮಣಿಸಿ ಫೈನಲ್ ಪ್ರವೇಶಿಸಿದ ಪಾಕಿಸ್ತಾನ ತಂಡವು ಮೂರನೇ ಬಾರಿಗೆ ಈ ಸಾಧನೆ ಮಾಡಿದಂತಾಗಿದೆ. ಪಾಕ್ ಹೊರತುಪಡಿಸಿ ಶ್ರೀಲಂಕಾ ಮಾತ್ರ ಟಿ20 ವಿಶ್ವಕಪ್ ಟೂರ್ನಿಯಲ್ಲಿ 3 ಸಲ ಪ್ರಶಸ್ತಿ ಸುತ್ತಿಗೆ ತಲುಪಿತ್ತು.
ಇದನ್ನೂ ಓದಿ: ಫೈನಲ್ನಲ್ಲಿ ಭಾರತ ಪಾಕ್ ಸೆಣಸುವುದನ್ನು ನಾವು ನೋಡಲು ಬಯಸುವುದಿಲ್ಲ: ಬಟ್ಲರ್‌
