ಮುಂಬೈ: 2022ರ ಐಪಿಎಲ್ನಲ್ಲಿ ತಾನಾಡಿದ ಮೊದಲ ಪಂದ್ಯದಲ್ಲೇ ಸೋಲು ಅನುಭವಿಸಿರುವ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡವು ಇಂದು ಮುಂಬೈನ ಡಿವೈ ಪಾಟೀಲ್ ಕ್ರೀಡಾಂಗಣದಲ್ಲಿ ಶ್ರೇಯಸ್ ಅಯ್ಯರ್ ನೇತೃತ್ವದ ಕೋಲ್ಕತ್ತಾ ನೈಟ್ ರೈಡರ್ಸ್ ವಿರುದ್ಧ ಕಣಕ್ಕಿಳಿಯಲಿದೆ. ಡುಪ್ಲೆಸಿಸ್ ಮುಂದಾಳತ್ವದ ಆರ್ಸಿಬಿ ಟೀಂ ಮೊದಲ ಗೆಲುವಿನ ನಿರೀಕ್ಷೆಯಲ್ಲಿದೆ.
ಮೊದಲ ಪಂದ್ಯದಲ್ಲಿ ಕಿಂಗ್ಸ್ ಇಲೆವೆನ್ ಪಂಜಾಬ್ ವಿರುದ್ಧ 205 ರನ್ ಬಾರಿಸಿದ್ದರೂ ಬೌಲಿಂಗ್ನಲ್ಲಿ ವೈಫಲ್ಯತೆ ಅನುಭವಿಸಿದ್ದ ಬೆಂಗಳೂರು 5 ವಿಕೆಟ್ಗಳಿಂದ ಸೋಲು ಕಂಡಿತ್ತು. ತಂಡ ನೂತನ ನಾಯಕ ಫಾಫ್ ಡುಪ್ಲೆಸಿಸ್ ಆರಂಭಿಕ ಪಂದ್ಯದಲ್ಲೇ ಮಿಂಚಿನ ಬ್ಯಾಟಿಂಗ್ ನಡೆಸಿ 57 ಎಸೆತಗಳಲ್ಲಿ 88 ರನ್ ಬಾರಿಸಿದ್ದರು. ಆದರೆ, ಮೊಹಮದ್ ಸಿರಾಜ್ ಸೇರಿದಂತೆ ಪ್ರಮುಖ ಬೌಲರ್ಗಳ ವೈಫಲ್ಯತೆಯಿಂದ ಸೋಲು ಎದುರಾಗಿತ್ತು.
ಇನ್ನೊಂದೆಡೆ, ಎದುರಾಳಿ ನೈಟ್ ರೈಡರ್ಸ್ ಯುವ ಮುಂದಾಳು ಶ್ರೇಯಸ್ ಅಯ್ಯರ್ ನಾಯಕತ್ವದಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ ಟೂರ್ನಿಯ ಆರಂಭಿಕ ಪಂದ್ಯದಲ್ಲಿನ ಗೆಲುವಿನ ವಿಶ್ವಾಸದಲ್ಲಿದೆ. ಉಮೇಶ್ ಯಾದವ್, ನರೈನ್ ಸೇರಿದಂತೆ ಬೌಲರ್ಗಳ ಕರಾರುವಾಕ್ ದಾಳಿಯಿಂದ ಚೆನ್ನೈ ವಿರುದ್ಧ ಸುಲಭದ ಜಯ ಸಾಧಿಸಿತ್ತು.
ಡಿವೈ ಪಾಟೀಲ್ ಕ್ರೀಡಾಂಗಣದಲ್ಲಿ ಉತ್ತಮ ದಾಖಲೆ ಹೊಂದಿರುವ ಕೋಲ್ಕತ್ತಾ, ಇಲ್ಲಿ ಯಾವುದೇ ಸೋಲು ಕಂಡಿಲ್ಲ. ಅಲ್ಲದೆ, ಬೆಂಗಳೂರು ವಿರುದ್ಧ ನೈಟ್ ರೈಡರ್ಸ್ ಕಳೆದ ಸೀಸನ್ನಲ್ಲಿನ ಎಲಿಮಿನೇಟರ್ ಸೇರಿದಂತೆ ಈ ಹಿಂದೆ ಆಡಿದ ಮೂರು ಪಂದ್ಯಗಳಲ್ಲೂ ಗೆಲುವು ಸಾಧಿಸಿದೆ.
ಆರ್ಸಿಬಿಗೆ ನಾಯಕ ಡುಪ್ಲೆಸಿಸ್, ಮಾಜಿ ನಾಯಕ ವಿರಾಟ್ ಕೊಹ್ಲಿ, ಯುವ ಆಟಗಾರ ಅನುಜ್ ರಾವತ್, ಅನುಭವಿ ದಿನೇಶ್ ಕಾರ್ತಿಕ್ ಅವರು ಬ್ಯಾಟಿಂಗ್ ಬಲವಾಗಿದ್ದಾರೆ. ಜೋಶ್ ಹೇಜಲ್ವುಡ್ ಅನುಪಸ್ಥಿತಿಯಲ್ಲಿ ಡೆವಿಡ್ ವಿಲ್ಲಿ, ರುದರ್ಫೋರ್ಡ್, ಶಹಬಾಜ್ ಅಹ್ಮದ್ ಅವರಿಂದ ತಕ್ಕ ಬೆಂಬಲ ಅಗತ್ಯವಿದೆ. ಅದರಲ್ಲೂ ಸಿರಾಜ್, ಹರ್ಷಲ್ ಬೌಲಿಂಗ್ ಜೋಡಿಯು ಚಮತ್ಕಾರ ತೋರಿದರೆ ಗೆಲುವಿನ ನಗೆ ಬೀರುವುದು ಕಷ್ಟವೇನಲ್ಲ.
ಕೋಲ್ಕತ್ತಾವು ದೀರ್ಘ ಬ್ಯಾಟಿಂಗ್ ವಿಭಾಗ ಹೊಂದಿದ್ದು, ಆರಂಭಿಕರಾದ ಅಜಿಂಕ್ಯ ರಹಾನೆ ಮತ್ತು ವೆಂಕಟೇಶ್ ಅಯ್ಯರ್ ಸೇರಿದಂತೆ 8ನೇ ಕ್ರಮಾಂಕದ ಬ್ಯಾಟ್ಸ್‌ಮನ್ ಸುನಿಲ್ ನರೈನ್ವರೆಗೂ ಪಂದ್ಯ ಗೆಲ್ಲಿಸಬಹುದಾದ ಆಟಗಾರರಿದ್ದಾರೆ. ಉಮೇಶ್ ಯಾದವ್ ಅವರು ಪವರ್‌ಪ್ಲೇನಲ್ಲಿ ಪ್ರಮುಖ ಅಸ್ತ್ರವಾಗಿದ್ದಾರೆ. ಆದರೆ, ಸಿಎಸ್ಕೆ ವಿರುದ್ಧ ಕೋಲ್ಕತ್ತಾ ಬೌಲರ್ಗಳು ಕೊನೆಯ ಮೂರು ಓವರ್‌ಗಳಲ್ಲಿ 47 ರನ್‌ಗಳನ್ನು ಬಿಟ್ಟುಕೊಟ್ಟು ದುಬಾರಿಯೆನಿಸಿದ್ದರು.
ಪಂದ್ಯದ ಫಲಿತಾಂಶದ ಮೇಲೆ ಇಬ್ಬನಿಯೂ ಕೂಡ ನಿರ್ಣಾಯಕ ಪರಿಣಾಮ ಬೀರಲಿದ್ದು, ಟಾಸ್ ಗೆಲ್ಲುವ ತಂಡವು ಚೇಸಿಂಗ್ ಆಯ್ಕೆ ಮಾಡುವ ಸಾಧ್ಯತೆ ಹೆಚ್ಚಾಗಿದೆ.
ಪಂದ್ಯದ ಸಮಯ: ಸಂಜೆ 7.30 ಗಂಟೆಗೆ
ಸ್ಥಳ: ಡಿವೈ ಪಾಟೀಲ್ ಮೈದಾನ, ಮುಂಬೈ
ಸಂಭಾವ್ಯ 11ರ ಬಳಗ: ರಾಯಲ್ ಚಾಲೆಂಜರ್ಸ್ ಬೆಂಗಳೂರು: ಫಾಫ್ ಡು ಪ್ಲೆಸಿಸ್ (ನಾಯಕ), ಅನುಜ್ ರಾವತ್, ವಿರಾಟ್ ಕೊಹ್ಲಿ, ದಿನೇಶ್ ಕಾರ್ತಿಕ್ (ವಿ.ಕೀ), ಶೆರ್ಫೇನ್ ರುದರ್ಫೋರ್ಡ್, ವನಿಂದು ಹಸರಂಗಾ, ಡೇವಿಡ್ ವಿಲ್ಲಿ, ಹರ್ಷಲ್ ಪಟೇಲ್, ಶಹಬಾಜ್ ಅಹ್ಮದ್, ಆಕಾಶ್ ದೀಪ್, ಮೊಹಮ್ಮದ್ ಸಿರಾಜ್
ಕೋಲ್ಕತ್ತಾ ನೈಟ್ ರೈಡರ್ಸ್: ವೆಂಕಟೇಶ್ ಅಯ್ಯರ್, ಅಜಿಂಕ್ಯ ರಹಾನೆ, ನಿತೀಶ್ ರಾಣಾ, ಶ್ರೇಯಸ್ ಅಯ್ಯರ್ (ನಾಯಕ), ಸ್ಯಾಮ್ ಬಿಲ್ಲಿಂಗ್ಸ್, ಆಂಡ್ರೆ ರಸೆಲ್, ಶೆಲ್ಡನ್ ಜಾಕ್ಸನ್ (ವಿ.ಕೀ), ಸುನಿಲ್ ನರೈನ್, ಶಿವಂ ಮಾವಿ, ಉಮೇಶ್ ಯಾದವ್, ವರುಣ್ ಚಕ್ರವರ್ತಿ
ಇದನ್ನೂ ಓದಿ: ನಾಯಕತ್ವ ಬಿಟ್ಟರೂ ತಗ್ಗದ ಹವಾ; ಬ್ರಾಂಡ್‌ ಮೌಲ್ಯದಲ್ಲಿ ಈಗಲೂ ವಿರಾಟ್ ಕೊಹ್ಲಿಯೇ 'ಕಿಂಗ್‌'
