ಮುಂಬೈ: ಚೆನ್ನೈ ಸೂಪರ್ ಕಿಂಗ್ಸ್ ಇಂಡಿಯನ್ ಪ್ರೀಮಿಯರ್ ಲೀಗ್ ಇತಿಹಾಸದ ಅತ್ಯಂತ ಯಶಸ್ವಿ ತಂಡಗಳಲ್ಲಿ ಒಂದು. 4 ನಾಲ್ಕು ಬಾರಿ ಟ್ರೋಫಿ ಎತ್ತಿ ಹಿಡಿದಿರುವ ತಂಡ 15ನೇ ಆವೃತ್ತಿಯಲ್ಲಿ ಮತ್ತೆ ವೈಫಲ್ಯ ಅನುಭವಿಸುತ್ತಿದೆ. ಆಡಿರುವ 7 ಪಂದ್ಯಗಳಲ್ಲಿ 5 ಸೋಲು ಮತ್ತು 2 ಗೆಲುವು ಪಡೆದಿರುವ ಹಾಲಿ ಚಾಂಪಿಯನ್ಸ್ ಸೋಮವಾರ ನಡೆಯುವ ಪಂದ್ಯದಲ್ಲಿ ಪಂಜಾಬ್ ಕಿಂಗ್ಸ್ ವಿರುದ್ಧ ಸೆಣಸಾಡುತ್ತಿದೆ.
ಅಂಕಪಟ್ಟಿಯಲ್ಲಿ 9ನೇ ಸ್ಥಾನದಲ್ಲಿದ್ದರೂ ಸಿಎಸ್ಕೆ ಲೀಗ್ನಲ್ಲಿ ಕಳಪೆ ಪ್ರದರ್ಶನ ತೋರಿಲ್ಲ. ಸೋತಿರುವ 5 ಪಂದ್ಯಗಳಲ್ಲಿ 2 ಪಂದ್ಯವನ್ನು ಕೊನೆಯ ಓವರ್ನಲ್ಲಿ ಕಳೆದುಕೊಂಡಿದೆ. ಇದರಲ್ಲಿ ಫೀಲ್ಡಿಂಗ್ ವೈಫಲ್ಯವೂ ಸೇರಿದೆ. ಕಳೆದ ಮೂರು ಪಂದ್ಯಗಳಲ್ಲಿ 2 ರಲ್ಲಿ ಜಯ ಸಾಧಿಸಿದ್ದು, ತನ್ನ ಆತ್ಮ ವಿಶ್ವಾಸವನ್ನು ಹೆಚ್ಚಿಸಿಕೊಂಡಿದೆ. ಪಂಜಾಬ್ ವಿರುದ್ಧ ಲೀಗ್ನ ಮೊದಲ ಪಂದ್ಯದಲ್ಲಿ ಕಂಡಿರುವ ಸೋಲಿಗೆ ಸೇಡು ತೀರಿಸಿಕೊಳ್ಳುವ ಹಂಬಲದಲ್ಲಿದೆ.
ಏಪ್ರಿಲ್ 25 ರಂದು ಸಿಎಸ್ಕೆಗೆ ಸೋಲೇ ಇಲ್ಲ: ಇಂಡಿಯನ್ ಪ್ರೀಮಿಯರ್ ಲೀಗ್ ಇತಿಹಾಸದಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ಏಪ್ರಿಲ್ 25 ರಂದು 7 ಪಂದ್ಯಗಳನ್ನಾಡಿದೆ. ಇದರಲ್ಲಿ ಎಲ್ಲ ಪಂದ್ಯಗಲ್ಲೂ ಸಿಎಸ್ಕೆ ಗೆಲುವು ಸಾಧಿಸಿರುವುದು ಮತ್ತೊಂದು ವಿಶೇಷ. ಎರಡು ಪಂದ್ಯಗಳಲ್ಲಿ ಮುಂಬೈ ವಿರುದ್ಧ , ಮತ್ತೆರಡು ಪಂದ್ಯಗಳಲ್ಲಿ ಆರ್ಸಿಬಿ ವಿರುದ್ಧ ಹಾಗೂ ಸನ್ರೈಸರ್ಸ್ , ಪುಣೆ ವಾರಿಯರ್ಸ್ ಮತ್ತು ಪಂಜಾಬ್ ಕಿಂಗ್ಸ್ ವಿರುದ್ಧ ತಲಾ ಒಂದು ಗೆಲುವು ಸಾಧಿಸಿದೆ. 2009 ಮತ್ತು 2012ರಲ್ಲೂ ಸಿಎಸ್ಕೆ ಕಣಕ್ಕಿಳಿದಿತ್ತಾದರೂ ಮಳೆ ಕಾರಣ ಪಂದ್ಯಗಳು ರದ್ಧಾಗಿದ್ದವು.
- 2010ರ ಏಪ್ರಿಲ್ 25ರಂದು ಮುಂಬೈ ವಿರುದ್ಧ ನಡೆದಿದ್ದ ಫೈನಲ್ ಪಂದ್ಯದಲ್ಲಿ ಸಿಎಸ್ಕೆ 22 ರನ್ಗಳಿಂದ ಗೆಲುವು ಸಾಧಿಸಿತ್ತು. ಈ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ್ದ ಸಿಎಸ್ಕೆ 168 ರನ್ಗಳಿಸಿದರೆ, ಮುಂಬೈ 146 ರನ್ಗಳಿಸಲಷ್ಟೇ ಶಕ್ತವಾಗಿ ಸೋಲು ಕಂಡಿತ್ತು.
- ಏಪ್ರಿಲ್ 25, 2011ರಲ್ಲಿ ಸಿಎಸ್ಕೆ ಪುಣೆ ವಾರಿಯರ್ಸ್ ವಿರುದ್ಧ ಕಣಕ್ಕಿಳಿದಿತ್ತು. ಈ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ್ದ ಧೋನಿ ಪಡೆ 142 ರನ್ಗಳಿಸಿತ್ತು. ಇದಕ್ಕುತ್ತರವಾಗಿ ಪುಣೆ 117ರನ್ಗಳಿಸಿ 25 ರನ್ಗಳಿಂದ ಸೋಲು ಕಂಡಿತ್ತು.
- ಏಪ್ರಿಲ್ 25, 2013ರಲ್ಲಿ ಸಿಎಸ್ಕೆ ಸನ್ರೈಸರ್ಸ್ ಹೈದರಾಬಾದ್ ವಿರುದ್ಧ 5 ವಿಕೆಟ್ ಜಯ ಸಾಧಿಸಿತ್ತು. ಈ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ್ದ ಹೈದರಾಬಾದ್ 159 ರನ್ಗಳಿಸಿದರೆ, ಸಿಎಸ್ಕೆ 19.4 ಓವರ್ಗಳಲ್ಲಿ ಚೇಸ್ ಮಾಡಿ ಗೆಲುವು ಸಾಧಿಸಿತ್ತು.
- ಏಪ್ರಿಲ್ 25, 2014ರಲ್ಲಿ ಸಿಎಸ್ಕೆ ಹಾಲಿ ಚಾಂಪಿಯನ್ ಮುಂಬೈ ಇಂಡಿಯನ್ಸ್ ವಿರುದ್ದ ನಡೆದ 13ನೇ ಪಂದ್ಯದಲ್ಲಿ 7 ವಿಕೆಟ್ಗಳ ಜಯ ಸಾಧಿಸಿತ್ತು. ಮುಂಬೈ ನೀಡಿದ್ದ 142 ರನ್ಗಳ ಗುರಿಯನ್ನು19 ಓವರ್ಗಳಲ್ಲಿ ಚೇಸ್ ಮಾಡಿ ಗೆಲುವು ದಾಖಲಿಸಿತ್ತು. ಮೆಕಲಮ್ ಅಜೇಯ 71 ರನ್ಗಳಿಸಿದ್ದರು.
- ಏಪ್ರಿಲ್ 25, 2016ರಲ್ಲಿ ಪಂಜಾಬ್ ಕಿಂಗ್ಸ್ ವಿರುದ್ಧ ನಡೆದಿದ್ದ ಪಂದ್ಯವನ್ನು 97 ರನ್ಗಳಿಂದ ಗೆಲುವು ಸಾಧಿಸಿತ್ತು. ಪಂಜಾಬ್ ಕೇವಲ 95 ರನ್ಗಳಿಸಿ ಹೀನಾಯ ಸೋಲು ಕಂಡಿತ್ತು.
- ಏಪ್ರಿಲ್ 25, 2018ರಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ವಿರುದ್ಧ ಕಣಕ್ಕಿಳಿದಿದ್ದ ಸಿಎಸ್ಕೆ ಬರೋಬ್ಬರಿ 206 ರನ್ಗಳ ಗುರಿಯನ್ನು 19.4 ಓವರ್ಗಳಲ್ಲಿ ತಲುಪಿತ್ತು. ಧೋನಿ 34 ಎಸೆತಗಳಲ್ಲಿ ಅಜೇಯ 70, ರಾಯುಡು 53 ಎಸೆತಗಳಲ್ಲಿ 82 ರನ್ಗಳಿಸಿ ಗೆಲುವಿನ ರೂವಾರಿಗಳಾಗಿದ್ದರು.
- ಏಪ್ರಿಲ್ 25, 2021ರಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ವಿರುದ್ಧ ಕಣಕ್ಕಿಳಿದಿದ್ದ ಸಿಎಸ್ಕೆ ಮೊದಲು ಬ್ಯಾಟಿಂಗ್ 191 ರನ್ಗಳಿಸಿತ್ತು. ಇದಕ್ಕುತ್ತರವಾಗಿ ಆರ್ಸಿಬಿ ಕೇವಲ 122 ರನ್ಗಳಿಸಿ 69 ರನ್ಗಳ ಸೋಲು ಕಂಡಿತ್ತು.
ಮತ್ತೊಂದು ವಿಶೇಷವೆಂದರೆ ಪಂಜಾಬ್ ಕಿಂಗ್ಸ್ ಕೂಡ 3 ಬಾರಿ ಏಪ್ರಿಲ್ 25 ರಂದು ಆಡಿದ್ದು, ಇದರಲ್ಲಿ 2 ಸೋಲು ಮತ್ತು ಒಂದು ಗೆಲುವು ದಾಖಲಿಸಿದೆ. ಇದಂದು ಏಪ್ರಿಲ್ 25ರ ಸಿಎಸ್ಕೆ ಅಜೇಯ ಓಟಕ್ಕೆ ಬ್ರೇಕ್ ಹಾಕಲಿದೆಯಾ ಕಾದು ನೋಡಬೇಕಿದೆ.
ಇದನ್ನೂ ಓದಿ:ಶತಕ ಸಿಡಿಸಿ 6 ಲಕ್ಷ ಮೌಲ್ಯದ ಅವಾರ್ಡ್ ಪಡೆದ ಕನ್ನಡಿಗ ಕೆಎಲ್ ರಾಹುಲ್ಗೆ 24 ಲಕ್ಷ ರೂ. ದಂಡ!
