ಮೆಲ್ಬೋರ್ನ್: ಮುಂಬರುವ ಐದು ಪಂದ್ಯಗಳ ಟಿ-20 ಸರಣಿಗಾಗಿ ನ್ಯೂಜಿಲೆಂಡ್ ಪ್ರವಾಸ ಕೈಗೊಂಡಿರುವ ಆಸ್ಟ್ರೇಲಿಯಾ ತಂಡದಲ್ಲಿ ಭಾರತೀಯ ಮೂಲದ ಟ್ಯಾಕ್ಸಿ ಚಾಲಕನ ಪುತ್ರ, ಲೆಗ್ ಸ್ಪಿನ್ನರ್ ತನ್ವೀರ್ ಸಂಗ ಸ್ಥಾನ ಪಡೆದಿದ್ದಾರೆ. ಫೆಬ್ರುವರಿ 22ರಿಂದ ಸರಣಿ ಆರಂಭವಾಗಲಿದೆ.
ಒಂದು ವರ್ಷದ ಹಿಂದೆ ಅಂಡರ್-19 ವಿಶ್ವಕಪ್ನಲ್ಲಿ ಆಸ್ಟ್ರೇಲಿಯಾ ತಂಡ ಪ್ರತಿನಿಧಿಸಿದ್ದ ಸಂಗ, 1997ರಲ್ಲಿ ಪಂಜಾಬ್‌ನ ಜಲಂಧರ್ ಬಳಿಯ ರಹೀಂಪುರ ಕಲಾ ಸಂಗಿಯಾನ್ ಎಂಬ ಹಳ್ಳಿಯಿಂದ ಸಿಡ್ನಿಗೆ ವಲಸೆ ಬಂದ ಜೋಗಾ ಅವರ ಪುತ್ರ. ಅಂಡರ್-19 ವಿಶ್ವಕಪ್ನಲ್ಲಿ 6 ಪಂದ್ಯಗಳಲ್ಲಿ 15 ವಿಕೆಟ್ ಕಬಳಿಸಿ ಆಯ್ಕೆಗಾರರ ಗಮನ ಸೆಳೆದಿದ್ದರು.
ಇದನ್ನೂ ಓದಿ...ಪಾಕ್ ಬೌಲಿಂಗ್ ದಾಳಿಗೆ ದ. ಆಫ್ರಿಕಾ ತತ್ತರ... ಮೊದಲ ಟೆಸ್ಟ್ ಪಂದ್ಯ ಕೈಚೆಲ್ಲಿದ ಹರಿಣಗಳ ಪಡೆ!
ಪ್ರಸ್ತುತ ನಡೆಯುತ್ತಿರುವ ಬಿಗ್ ಬ್ಯಾಷ್ ಲೀಗ್ನಲ್ಲಿ ತನ್ವೀರ್ ಸಂಗ ಉತ್ತಮ ಪ್ರದರ್ಶನ ತೋರಿದ್ದಾರೆ. ಸಿಡ್ನಿ ಥಂಡರ್ ಪರ ಆಡಿದ ಅವರು 16.66ರ ಸರಾಸರಿಯಲ್ಲಿ 21 ವಿಕೆಟ್ಗಳನ್ನು ಪಡೆದಿದ್ದಾರೆ. ಉತ್ತಮ ಪ್ರದರ್ಶನ ತೋರುತ್ತಿರುವ ಸಂಗರನ್ನು ರಾಷ್ಟ್ರೀಯ ತಂಡಕ್ಕೆ ಸೇರಿಸಿಕೊಳ್ಳಬೇಕು ಎಂದು ಮಾಜಿ ನಾಯಕ ರಿಕಿ ಪಾಂಟಿಂಗ್ ಕರೆ ನೀಡಿದ್ದರು.
ಆತನಿನ್ನೂ ಯುವಕ. ತುಂಬಾ ಆತ್ಮವಿಶ್ವಾಸ ಹೊಂದಿದ್ದು, ಮುಂದೇನು ಮಾಡಬೇಕೆಂಬುದರ ಮೇಲೆ ನಿಯಂತ್ರಣ ಹೊಂದಿದ್ದಾನೆ. ಆತನ ಬೌಲಿಂಗ್ನಲ್ಲಿ ಪ್ರಮುಖ ಬ್ಯಾಟ್ಸ್ಮನ್ಗಳು ಕಕ್ಕಾಬಿಕ್ಕಿಯಾಗಿದ್ದನ್ನು ನೋಡಿದ್ದೇನೆ. ಆದ್ದರಿಂದ ಅಂತಾರಾಷ್ಟ್ರೀಯ ಕ್ರಿಕೆಟ್ ಪ್ರವೇಶಿಸಲು ಸೂಕ್ತ ಆಟಗಾರ ಎಂದು ಪಾಂಟಿಂಗ್ ಕ್ರಿಕೆಟ್.ಕಾಂಗೆ ತಿಳಿಸಿದರು. ತನ್ವೀರ್ಗೂ ಮುನ್ನ ಭಾರತೀಯ ಮೂಲದ ವ್ಯಕ್ತಿ ಗುರಿಂದರ್ ಸಂಧು ಆಸ್ಟ್ರೇಲಿಯಾ ರಾಷ್ಟ್ರೀಯ ತಂಡಕ್ಕಾಗಿ ಆಡಿದ ಮೊದಲ ಆಟಗಾರ ಎನಿಸಿಕೊಂಡಿದ್ದಾರೆ.
