ಮುಂಬೈ: ಭಾರತ ತಂಡ 3ನೇ ಟೆಸ್ಟ್ ಪಂದ್ಯದಲ್ಲಿ ಬ್ಯಾಟಿಂಗ್ ವೈಫಲ್ಯದಿಂದ ಸೋಲು ಕಂಡಿದೆ. ಈ ಕಾರಣದಿಂದ ಮುಂಬೈನ ಸ್ಟೈಲಿಷ್‌ ಬ್ಯಾಟ್ಸ್ಮನ್ ಸೂರ್ಯಕುಮಾರ್ ಯಾದವ್ ಅವರನ್ನು ಓವಲ್ ಟೆಸ್ಟ್ನಲ್ಲಿ 6ನೇ ಬ್ಯಾಟ್ಸ್ಮನ್ ಆಗಿ ಆಡಿಸಬೇಕೆಂದು ಮಾಜಿ ನಾಯಕ ಮತ್ತು ಆಯ್ಕೆ ಸಮಿತಿ ಅಧ್ಯಕ್ಷ ದಿಲೀಪ್ ವೆಂಗ್ಸರ್ಕರ್ ಟೀಂ ಇಂಡಿಯಾ ಮ್ಯಾನೇಜ್ಮೆಂಟ್ಗೆ ಸಲಹೆ ನೀಡಿದ್ದಾರೆ.
ಭಾರತ ತಂಡ ಹೆಡಿಂಗ್ಲೆಯಲ್ಲಿ ನಡೆದ 3ನೇ ಟೆಸ್ಟ್ ಪಂದ್ಯದಲ್ಲಿ ಮಧ್ಯಮ ಕ್ರಮಾಂಕದ ವೈಫಲ್ಯದಿಂದ ಇನ್ನಿಂಗ್ಸ್ ಮತ್ತು 76 ರನ್ಗಳಿಂದ ಸೋಲು ಕಂಡಿತ್ತು.
"4ನೇ ಟೆಸ್ಟ್ ಪಂದ್ಯದಲ್ಲಿ ಭಾರತದ ಬ್ಯಾಟಿಂಗ್ ಬಲಿಷ್ಠವಾಗಬೇಕೆಂದರೆ ಹನುಮ ವಿಹಾರಿಗಿಂತ ಸೂರ್ಯಕುಮಾರ್ ಯಾದವ್ ಸೇರ್ಪಡೆ ಮಾಡಿಕೊಳ್ಳಬೇಕೆಂದು ನಾನು ದೃಢವಾಗಿ ನಂಬುತ್ತೇನೆ. ನಾವು ಒಬ್ಬ ಬೌಲರ್ ಅನ್ನು ಕೈಬಿಟ್ಟು 6 ಬ್ಯಾಟ್ಸ್ಮನ್ಗಳೊಂದಿಗೆ ಹೋಗಬಹುದು" ಎಂದು ಭಾರತ ಕಂಡ ಶ್ರೇಷ್ಠ ಆಯ್ಕೆ ಸಮಿತಿ ಅಧ್ಯಕ್ಷರಾದ ವೆಂಗ್ಸರ್ಕರ್ ಪಿಟಿಐ ಜೊತೆಗಿನ ಸಂವಾದದಲ್ಲಿ ಹೇಳಿದ್ದಾರೆ.
ವಿಶೇಷವೆಂದರೆ, ಇದೇ ಅಭಿಪ್ರಾಯವನ್ನು ಬ್ಯಾಟಿಂಗ್ ಶ್ರೇಷ್ಠ ಸುನೀಲ್ ಗವಾಸ್ಕರ್ ಕೂಡ ಹೇಳಿದ್ದರು. ಅವರು ಒಬ್ಬ ಬೌಲರ್ ಕಡಿಮೆ ಮಾಡಿ 6 ಬ್ಯಾಟ್ಸ್ಮನ್ಗಳೊಂದಿಗೆ ಹೋಗಬೇಕೆಂಬ ಥಿಯರಿಯನ್ನು ಪ್ರತಿಪಾದಿಸಿದ್ದರು.
"ಪ್ರಥಮ ದರ್ಜೆ ಕ್ರಿಕೆಟ್ನಲ್ಲಿ 44 ಪ್ಲಸ್ ಸರಾಸರಿ ಹೊಂದಿರುವ ಸೂರ್ಯಕುಮಾರ್ ಯಾದವ್ 4ನೇ ಟೆಸ್ಟ್ನಲ್ಲಿ ಭಾರತ ತಂಡ ಸೇರಿಕೊಂಡರೆ ತಂಡದ ಬ್ಯಾಟಿಂಗ್ ವಿಭಾಗ ಬಲಿಷ್ಠಗೊಳ್ಳಲಿದೆ. ಕೌಶಲ್ಯಗಳ ಆಧಾರದ ಮೇಲೆ ಈ ತಂಡಕ್ಕೆ ಸೂರ್ಯಕುಮಾರ್ ಸರಿಯಾಗಿ ಹೊಂದಿಕೊಳ್ಳಲಿದ್ದಾರೆ. ಮತ್ತು ಅವರು ಸ್ವಲ್ಪ ಸಮಯದಿಂದ ಇರುವುದರಿಂದ ತಡವಾಗುವ ಮುನ್ನ ಅವರನ್ನು ತಂಡಕ್ಕೆ ಸೇರಿಸಿಕೊಳ್ಳಬೇಕು" ಎಂದು ವೆಂಗ್ಸರ್ಕರ್ ಹೇಳುತ್ತಾರೆ.
ಇನ್ನು ಅಶ್ವಿನ್ರನ್ನು ಸರಣಿಯಲ್ಲಿ ಒಂದೂ ಪಂದ್ಯದಲ್ಲಿ ಪರಿಗಣಿಸದಿರುವುದು ನನಗೆ ಆಶ್ಚರ್ಯವನ್ನುಂಟು ಮಾಡಿದೆ ಎಂದು ದಿಲೀಪ್ ಹೇಳಿದ್ದಾರೆ. "ಸರಣಿಯಲ್ಲಿ ಇಲ್ಲಿಯವರೆಗೆ ಅಶ್ವಿನ್ರನ್ನು ಏಕೆ ಆಯ್ಕೆ ಮಾಡಲಾಗಿಲ್ಲ ಎನ್ನುವುದು ನನಗೆ ನಿಗೂಢವಾಗಿದೆ?, ನೀವು ಆಡುವ 11ರ ಬಳಗದಲ್ಲಿ ನಿಮ್ಮ ಅತ್ಯುತ್ತಮ ಸ್ಪಿನ್ ಬೌಲರ್ಅನ್ನು ಬಿಟ್ಟು ಆಡುತ್ತಿರುವುದು ನನಗೆ ಜೀರ್ಣಿಸಿಕೊಳ್ಳಲು ತುಂಬಾ ಕಷ್ಟವಾಗುತ್ತಿದೆ ಎಂದು ಅವರು ಆಶ್ಚರ್ಯ ವ್ಯಕ್ತಪಡಿಸಿದ್ದಾರೆ.
