ಮೊಹಾಲಿ: ರವೀಂದ್ರ ಜಡೇಜಾ ಮತ್ತು ರವಿಚಂದ್ರನ್ ಅಶ್ವಿನ್ ಅವರ ಆಲ್ರೌಂಡರ್ ಆಟದ ನೆರವಿನಿಂದ ಶ್ರೀಲಂಕಾ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯವನ್ನು ಭಾರತ ತಂಡ ಇನ್ನಿಂಗ್ಸ್ ಹಾಗೂ 222 ರನ್ಗಳ ಬೃಹತ್ ಅಂತರದ ಜಯ ಸಾಧಿಸಿ ಸರಣಿಯಲ್ಲಿ 1-0ಯಲ್ಲಿ ಮುನ್ನಡೆ ಸಾಧಿಸಿದೆ.
ಮೊದಲ ಇನ್ನಿಂಗ್ಸ್ನಲ್ಲಿ ರವೀಂದ್ರ ಜಡೇಜಾ ಅವರ ಅಜೇಯ 175 ರನ್ಗಳ ನೆರವಿನಿಂದ ಟೀಂ ಇಂಡಿಯಾ ಬರೋಬ್ಬರಿ 574 ರನ್ ಗಳಿಸಿದ್ದ ವೇಳೆ ಡಿಕ್ಲೇರ್ ಘೋಷಿಸಿ ಕೊಂಡಿತ್ತು. ಅಲ್ಲದೇ 2ನೇ ದಿನವೇ ಶ್ರೀಲಂಕಾ ತಂಡದ ಪ್ರಮುಖ 4 ವಿಕೆಟ್ ಪಡೆದುಕೊಂಡಿತ್ತು.
3ನೇ ದಿನವಾದ ಇಂದು ಬ್ಯಾಟಿಂಗ್ 104/4 ರನ್ಗಳೊಂದಿಗೆ ಬ್ಯಾಟಿಂಗ್ ಆರಂಭಿಸಿದ ಶ್ರೀಲಂಕಾ ಜಡೇಜಾ(41ಕ್ಕೆ5) ಬೌಲಿಂಗ್ ದಾಳಿಗೆ ತತ್ತರಿಸಿ ತನ್ನ ಮೊದಲ ಇನ್ನಿಂಗ್ಸ್ನಲ್ಲಿ 65 ಓವರ್ನಲ್ಲಿ ಕೇವಲ 174 ರನ್ ಗಳಿಗೆ ಆಲೌಟ್ ಆಯಿತು. ಪಾತುಮ್ ನಿಸ್ಸಾಂಕ ಅಜೇಯ 61 ರನ್ಗಳಿಸಿ ಏಕಾಂಗಿ ಹೋರಾಟ ನಡೆಸಿದರು. ಇವರನ್ನು ಹೊರೆತುಪಡಿಸಿದರೆ, ಕರುಣರತ್ನೆ 28, ಅಸಲಂಕ 29 ತಂಡದ ಗರಿಷ್ಠ ಸ್ಕೋರರ್ ಎನಿಸಿಕೊಂಡರು. ನಾಲ್ಕು ಬ್ಯಾಟರ್ಗಳು ಸೊನ್ನೆ ಸುತ್ತಿದರು.
ಇನ್ನು 400 ರನ್ಗಳ ಬೃಹತ್ ಮುನ್ನಡೆ ಸಾಧಿಸಿದ ಭಾರತ ಪ್ರವಾಸಿ ತಂಡದ ಮೇಲೆ ಫಾಲೋ ಆನ್ ವಿಧಿಸಿತು. ಎರಡನೇ ಇನ್ನಿಂಗ್ಸ್ನಲ್ಲೂ ಭಾರತದ ಸ್ಪಿನ್ ದಾಳಿಗೆ ಉತ್ತರಿಸಲಾಗದ ಸಿಂಹಳೀಯ ಪಡೆ ಕೇವಲ 178 ರನ್ಗಳಿಗೆ ಸರ್ವಪತನ ಕಂಡಿತು.
ಎರಡನೇ ಇನ್ನಿಂಗ್ಸ್ನಲ್ಲಿ ವಿಕೆಟ್ ಕೀಪರ್ ನಿರೋಷನ್ ಡಿಕ್ವೆಲ್ಲಾ ಅಜೇಯ 51 ರನ್ಗಳಿಸಿ ತಂಡದ ಗರಿಷ್ಠ ಸ್ಕೋರರ್ ಎನಿಸಿಕೊಂಡರು. ಧನಂಜಯ ಡಿ ಸಿಲ್ವಾ 30, ಏಂಜೆಲೊ ಮ್ಯಾಥ್ಯೂಸ್ 28, ಚರಿತ್ ಅಸಲಂಕಾ 20, ನಾಯಕ ಕರುಣರತ್ನೆ 27 ರನ್ಗಳಿಸಿದರೆ,ಉಳಿದ ಬ್ಯಾಟರ್ಗಳು ಎರಡಂಕಿ ಮೊತ್ತ ದಾಟುವಲ್ಲಿ ವಿಫಲರಾದರು.
ಎರಡನೇ ಇನ್ನಿಂಗ್ಸ್ನಲ್ಲೂ ಮಿಂಚಿದ ರವೀಂದ್ರ ಜಡೇಜಾ 46 ರನ್ ನೀಡಿ 4 ವಿಕೆಟ್ ಪಡೆದರೆ, ಅನುಭವಿ ಸ್ಪಿನ್ನರ್ ಅಶ್ವಿನ್ 47ಕ್ಕೆ4 ವಿಕೆಟ್ ಪಡೆದರು. ಮೊಹಮ್ಮದ್ ಶಮಿ 48ಕ್ಕೆ 2 ವಿಕೆಟ್ ಪಡೆದು ಸುಲಭ ಗೆಲುವಿಗೆ ಕಾರಣರಾದರು.
ಸಂಕ್ಷಿಪ್ತ ಸ್ಕೋರ್:
- ಭಾರತ ಮೊದಲ ಇನ್ನಿಂಗ್ಸ್ 574/8 ಡಿಕ್ಲೇರ್(ರವೀಂದ್ರ ಜಡೇಜಾ 175, ಪಂತ್ 96, ಅಶ್ವಿನ್ 61, ಹನುಮ ವಿಹಾರಿ 58, ಸುರಂಗ ಲಕ್ಮಲ್ 90ಕ್ಕೆ2, ಫರ್ನಾಂಡೊ 135ಕ್ಕೆ2, ಎಂಬುಲ್ದೇನಿಯಾ 188ಕ್ಕೆ 2)
- ಶ್ರೀಲಂಕಾ ಮೊದಲ ಇನ್ನಿಂಗ್ಸ್ 174 ಆಲೌಟ್: ಪಾತುಮ್ ನಿಸ್ಸಾಂಕ ಅಜೇಯ 61, ರವೀಂದ್ರ ಜಡೇಜಾ 41ಕ್ಕೆ 5, ಅಶ್ವಿನ್ 49ಕ್ಕೆ 2, ಬುಮ್ರಾ 36ಕ್ಕೆ 2)
- ಶ್ರೀಲಂಕಾ 2ನೇ ಇನ್ನಿಂಗ್ಸ್ 178ಕ್ಕೆ ಆಲೌಟ್: ನಿರೋಷನ್ ಡಿಕ್ವೆಲ್ಲಾ ಅಜೇಯ 51,ಜಡೇಜಾ 46ಕ್ಕೆ 4, ಅಶ್ವಿನ್ 47ಕ್ಕೆ 4, ಶಮಿ48ಕ್ಕೆ 2 )
- ಭಾರತಕ್ಕೆ ಇನ್ನಿಂಗ್ಸ್ ಹಾಗೂ 222 ರನ್ ಜಯ. ಪಂದ್ಯ ಶ್ರೇಷ್ಠ ರವೀಂದ್ರ ಜಡೇಜಾ
ಇದನ್ನೂ ಓದಿ:ಪುದುಚೆರಿ ವಿರುದ್ಧ ಕರ್ನಾಟಕಕ್ಕೆ ಇನ್ನಿಂಗ್ಸ್ ಮತ್ತು 20 ರನ್ ಜಯ: ಕ್ವಾರ್ಟರ್ ಫೈನಲ್ ಪ್ರವೇಶ
