ಕೊಲಂಬೊ: ಆತಿಥೇಯ ಶ್ರೀಲಂಕಾ ವಿರುದ್ಧ ಶಿಖರ್ ಧವನ್ ನೇತೃತ್ವದ ಯಂಗ್ ಇಂಡಿಯಾ ಇಂದಿನಿಂದ ನಿಗದಿತ ಓವರ್ಗಳ ಕ್ರಿಕೆಟ್ ಸರಣಿಯಲ್ಲಿ ಭಾಗಿಯಾಗುತ್ತಿದ್ದು, ಗೆಲುವು ಸಾಧಿಸುವ ಇರಾದೆಯೊಂದಿಗೆ ಕಣಕ್ಕಿಳಿಯಲಿದೆ. ತಂಡಕ್ಕೆ ದಿ ವಾಲ್ ಖ್ಯಾತಿಯ ರಾಹುಲ್ ದ್ರಾವಿಡ್ ಕೋಚ್ ಆಗಿದ್ದು, ತಂಡಕ್ಕೆ ಯಾವ ರೀತಿಯಾಗಿ ಪ್ರೇರಣೆ ನೀಡುತ್ತಿದ್ದಾರೆ ಎಂಬುದರ ಬಗ್ಗೆ ಶಿಖರ್ ಧವನ್ ಮಾತನಾಡಿದ್ದಾರೆ.
ಈಗಾಗಲೇ ಕೋಚ್ ರವಿಶಾಸ್ತ್ರಿ ಮಾರ್ಗದರ್ಶನ ಪಡೆದು ಟೀಂ ಇಂಡಿಯಾದಲ್ಲಿ ಆಡಿರುವ ಶಿಖರ್ ಧವನ್, ಇದೇ ಮೊದಲ ಸಲ ರಾಹುಲ್ ದ್ರಾವಿಡ್ ಕೋಚ್ನೊಂದಿಗೆ ತಂಡವನ್ನ ಮುನ್ನಡೆಸಲಿದ್ದಾರೆ. ರವಿಶಾಸ್ತ್ರಿ ಹಾಗೂ ರಾಹುಲ್ ದ್ರಾವಿಡ್ ನಡುವೆ ಯಾವ ರೀತಿಯ ಭಿನ್ನತೆ ಇದೆ ಎಂಬುದರ ಬಗ್ಗೆ ವಿವರಣೆ ನೀಡಿದ್ದಾರೆ.
ರವಿಶಾಸ್ತ್ರಿ ಹಾಗೂ ರಾಹುಲ್ ದ್ರಾವಿಡ್ ತಮ್ಮದೇ ವಿಶಿಷ್ಟ ಗುಣ ಹೊಂದಿದ್ದು, ಇಬ್ಬರು ತುಂಬಾ ಸಕಾರಾತ್ಮವಾಗಿ ತಂಡಕ್ಕೆ ಪ್ರೇರಣೆ ನೀಡುತ್ತಾರೆ. ನಾನು ಈಗಾಗಲೇ ರವಿ ಭಾಯ್(ರವಿಶಾಸ್ತ್ರಿ) ಅವರೊಂದಿಗೆ ಸಮಯ ಕಳೆದಿದ್ದೇನೆ. ಅವರ ಪ್ರೇರೇಪಿಸುವ ವಿಧಾನ ಸಂಪೂರ್ಣವಾಗಿ ವಿಭಿನ್ನವಾಗಿದೆ. ರವಿ ಭಾಯ್ ಏರು ಧ್ವನಿಯಲ್ಲಿ ಮಾತನಾಡುವ ಸ್ವಭಾವ ಹೊಂದಿದ್ದಾರೆ. ಆದರೆ ರಾಹುಲ್ ಭಾಯ್(ರಾಹುಲ್ ದ್ರಾವಿಡ್) ತುಂಬಾ ಶಾಂತ, ಸಕಾರಾತ್ಮಕವಾಗಿರುತ್ತಾರೆ. ಇವರಿಬ್ಬರ ಅಡಿಯಲ್ಲಿ ಆಟವಾಡುವುದನ್ನ ನಾನು ಆನಂದಿಸುತ್ತೇನೆ ಎಂದಿದ್ದಾರೆ.
ಇದನ್ನೂ ಓದಿರಿ: ಬೆಂಗಳೂರಿನಿಂದ ಟೋಕಿಯೋಗೆ ಪ್ರಯಾಣ ಬೆಳೆಸಿದ ಪುರುಷ, ಮಹಿಳಾ ಹಾಕಿ ತಂಡ
ಶ್ರೀಲಂಕಾ ವಿರುದ್ಧದ ಮೊದಲ ಏಕದಿನ ಪಂದ್ಯದಲ್ಲಿ ಆಡುವ 11ರ ಬಳಕ ಈಗಾಗಲೇ ಅಂತಿಮಗೊಂಡಿದೆ. ಆದರೆ ಪಂದ್ಯ ಆರಂಭದ ವೇಳೆ ಹೆಸರು ಬಹಿರಂಗಪಡಿಸಲಿದ್ದೇವೆ ಎಂದು ಧವನ್ ಇದೇ ವೇಳೆ ಹೇಳಿದರು. ಶ್ರೀಲಂಕಾ ವಿರುದ್ಧ ಟೀಂ ಇಂಡಿಯಾ ಮೂರು ಏಕದಿನ ಹಾಗೂ ಮೂರು ಟಿ-20 ಪಂದ್ಯಗಳ ಸರಣಿಯಲ್ಲಿ ಭಾಗಿಯಾಗಲಿದೆ.
