ಮ್ಯಾಂಚೆಸ್ಟರ್ : ಇಂಡಿಯನ್ ಪ್ರೀಮಿಯರ್ ಲೀಗ್ ಹಾಗೂ ಹಣಕ್ಕೋಸ್ಕರ ಭಾರತ-ಇಂಗ್ಲೆಂಡ್ ನಡುವಿನ ಫೈನಲ್ ಟೆಸ್ಟ್ ಪಂದ್ಯ ರದ್ಧುಗೊಳಿಸಲಾಗಿದೆ ಎಂದು ಇಂಗ್ಲೆಂಡ್ನ ಮಾಜಿ ಕ್ಯಾಪ್ಟನ್ ಮೈಕಲ್ ವಾನ್ ಆರೋಪ ಮಾಡಿದ್ದಾರೆ.
ಉಭಯ ತಂಡಗಳ ನಡುವಿನ ಮ್ಯಾಂಚೆಸ್ಟರ್ ಟೆಸ್ಟ್ ಪಂದ್ಯ ರದ್ಧುಗೊಂಡಿದ್ದಕ್ಕೆ ಆಕ್ರೋಶ ವ್ಯಕ್ತಪಡಿಸಿರುವ ಅವರು, ಆಟಗಾರರು ಐಪಿಎಲ್ ಮಿಸ್ ಮಾಡಿಕೊಳ್ಳಲಿದ್ದಾರೆ ಎಂಬ ಕಾರಣಕ್ಕಾಗಿ ಈ ನಿರ್ಧಾರ ಕೈಗೊಳ್ಳಲಾಗಿದೆ ಎಂದಿದ್ದಾರೆ.
ಪ್ರಾಮಾಣಿಕವಾಗಿ ಹೇಳಬೇಕೆಂದರೆ, ಹಣ ಮತ್ತು ಐಪಿಎಲ್ಗೋಸ್ಕರ ಮ್ಯಾಚೆಂಸ್ಟರ್ ಟೆಸ್ಟ್ ಪಂದ್ಯ ರದ್ಧುಗೊಳಿಸಲಾಗಿದೆ. ಆಟಗಾರರು ಕೋವಿಡ್ ಸೋಂಕಿಗೊಳಗಾಗುವ ಹಾಗೂ ಐಪಿಎಲ್ನಿಂದ ಹೊರಗುಳಿಯುವ ಭಯದಲ್ಲಿದ್ದರು ಎಂದು ವಾನ್ ಹೇಳಿಕೊಂಡಿದ್ದಾರೆ.
ಇಂಗ್ಲೆಂಡ್ ವಿರುದ್ಧದ ಫೈನಲ್ ಟೆಸ್ಟ್ ಪಂದ್ಯಕ್ಕೆ 11 ಆಟಗಾರರನ್ನ ಕಣಕ್ಕಿಳಿಸಲು ಭಾರತಕ್ಕೆ ಕಷ್ಟವಾಯಿತು ಎಂಬುದನ್ನ ನಂಬಲು ಸಾಧ್ಯವಿಲ್ಲ. ಟಾಸ್ ಮಾಡಲು ಕೇವಲ 90 ನಿಮಿಷಗಳ ಕಾಲ ಬಾಕಿ ಇರುವಾಗ ಟೆಸ್ಟ್ ಪಂದ್ಯ ರದ್ಧು ಮಾಡುವುದು ಎಷ್ಟರ ಮಟ್ಟಿಗೆ ಸರಿ.
ಇದು ಟೆಸ್ಟ್ ಪಂದ್ಯ ವೀಕ್ಷಣೆ ಮಾಡಲು ಆಗಮಿಸಲು ಬಂದಿದ್ದ ಕ್ರೀಡಾಭಿಮಾನಿಗಳಿಗೆ ತೋರಿರುವ ಅಗೌರವ ಎಂದಿದ್ದಾರೆ. ಇದೇ ವಿಚಾರವಾಗಿ ಮಾತನಾಡಿರುವ ಇಂಗ್ಲೆಂಡ್ನ ಮಾಜಿ ನಾಯಕ ನಾಸೀರ್ ಹುಸೇನ್, ಐಪಿಎಲ್ ಟಿ-20 ಗೋಸ್ಕರ ಭಾರತ-ಇಂಗ್ಲೆಂಡ್ ನಡುವಿನ ಅಂತಿಮ ಪಂದ್ಯ ರದ್ಧುಗೊಳಿಸಲಾಗಿದೆ ಎಂದು ಆರೋಪ ಮಾಡಿದ್ದಾರೆ.
ಇದನ್ನೂ ಓದಿರಿ: ಮ್ಯಾಂಚೆಸ್ಟರ್ನಿಂದ ದುಬೈಗೆ ಬರಲು ಕೊಹ್ಲಿ, ಸಿರಾಜ್ಗೋಸ್ಕರ RCBಯಿಂದ ವಿಶೇಷ ಚಾರ್ಟರ್!
ಟೀಂ ಇಂಡಿಯಾ ಕ್ಯಾಂಪ್ನಲ್ಲಿ ಕೊರೊನಾ ವೈರಸ್ ಕಾಣಿಸಿಕೊಳ್ಳುತ್ತಿದ್ದಂತೆ ಉಭಯ ತಂಡಗಳ ನಡುವಿನ ಫೈನಲ್ ಪಂದ್ಯ ರದ್ಧುಗೊಳಿಸಲಾಗಿದೆ. ಈಗಾಗಲೇ ಕೆಲ ಪ್ಲೇಯರ್ಸ್ ಮ್ಯಾಂಚೆಸ್ಟರ್ನಿಂದ ದುಬೈಗೆ ಪ್ರಯಾಣ ಬೆಳೆಸಿದ್ದು, ಇಂದು ತಡರಾತ್ರಿ ಅಥವಾ ನಾಳೆ ಬೆಳಗ್ಗೆಯೊಳಗೆ ದುಬೈಗೆ ಬಂದು ಸೇರಲಿದ್ದಾರೆ.
