ಇಸ್ಲಾಮಬಾದ್: ಹರಾರೆಯಲ್ಲಿರುವ ಭಾರತೀಯ ರಾಯಭಾರಿ ಕಚೇರಿಯ ಮನವಿ ಮೇರೆಗೆ ಜಿಂಬಾಬ್ವೆ ಮುಖ್ಯ ಕೋಚ್ ಆಗಿರುವ ಭಾರತದ ಮಾಜಿ ಕ್ರಿಕೆಟಿಗ ಲಾಲ್ಚಂದ್ ರಜಪೂತ್ ಅವರನ್ನು ಮುಂಬರುವ ಪಾಕಿಸ್ತಾನ ಪ್ರವಾಸದಿಂದ ಹೊರಬರಲು ಜಿಂಬಾಬ್ವೆ ಕ್ರಿಕೆಟ್ ಅನುವು ಮಾಡಿಕೊಟ್ಟಿದೆ.
ಮಂಗಳವಾರ ಜಿಂಬಾಬ್ವೆ ತಂಡ ಪಾಕಿಸ್ತಾನ ಪ್ರವಾಸ ಕೈಗೊಳ್ಳಲಿದೆ. ಈಗಾಗಲೇ ಪಾಕಿಸ್ತಾನ ರಾಯಬಾರಿ ಕಚೇರಿ ರಜಪೂತ್ ಅವರಿಗೆ ವೀಸಾ ನೀಡಿದ್ದರೂ ಸಹ ಭಾರತೀಯ ರಾಯಭಾರಿ ಕಚೇರಿಯ ಮನವಿ ಪರಿಗಣಿಸಿ, ರಜಪೂತ್ರನ್ನು ಪಾಕಿಸ್ತಾನ ಪ್ರವಾಸಕ್ಕೆ ಕಳುಹಿಸದಿರಲು ಜಿಂಬಾಬ್ವೆ ಕ್ರಿಕೆಟ್ ಮಂಡಳಿ ಒಪ್ಪಿಕೊಂಡಿದೆ.
"ಜಿಂಬಾಬ್ವೆ ಮುಖ್ಯ ಕೋಚ್ ಲಾಲ್ಚಂದ್ ರಜಪೂತ್ ಪಾಕಿಸ್ತಾನ ಪ್ರವಾಸವನ್ನು ತಪ್ಪಿಸಿಕೊಳ್ಳಲಿದ್ದಾರೆ. ಪಾಕಿಸ್ತಾನ ರಜಪೂತ್ ಅವರಿಗೆ ವೀಸಾ ನೀಡಿದ್ರೂ ಸಹ, ಭಾರತೀಯ ರಾಯಭಾರಿ ಕಚೇರಿ ಜಿಂಬಾಬ್ವೆ ತಂಡದ ಜೊತೆ ರಜಪೂತ್ರನ್ನು ಪಾಕಿಸ್ತಾನಕ್ಕೆ ಕಳುಹಿಸದಂತೆ ಪತ್ರ ಬರೆದಿರುವುದರಿಂದ, ಈ ಪ್ರವಾಸದಿಂದ ಅವರನ್ನು ಕೈಬಿಡಲಾಗಿದೆ. ಬೌಲಿಂಗ್ ಕೋಚ್ ಆಗಿರುವ ಡಾಗ್ಲಸ್ ಹೊಂಡೊ ತಾತ್ಕಾಲಿಕ ಮುಖ್ಯಕೋಚ್ ಆಗಿ ಕಾರ್ಯ ನಿರ್ವಹಿಸಲಿದ್ದಾರೆ" ಎಂದು ಜಿಂಬಾಬ್ವೆ ಕ್ರಿಕೆಟ್ ಹೇಳಿಕೆ ಬಿಡುಗಡೆ ಮಾಡಿದೆ.
ಜಿಂಬಾಬ್ವೆ ಕ್ರಿಕೆಟ್ ತಂಡ ಪಾಕಿಸ್ತಾನದ ವಿರುದ್ಧ ತಲಾ 3 ಟಿ20 ಹಾಗೂ ಏಕದಿನ ಪಂದ್ಯವನ್ನಾಡಲಿದೆ. ಅಕ್ಟೋಬರ್ 30, ನವೆಂಬರ್ 1 ಮತ್ತು 3 ರಂದು ಏಕದಿನ ಪಂದ್ಯ ಹಾಗೂ ನವೆಂಬರ್ 7,8 ಹಾಗೂ10 ರಂದು ಲಾಹೋರ್ನಲ್ಲಿ ಟಿ20 ಪಂದ್ಯಗಳನ್ನಾಡಲಿದೆ.
