ಗಾಯಗೊಂಡ ಸಿಂಹಗಳು vs ಸೋಲಿಲ್ಲದ ಸರದಾರರು: ಹೊಸ ದಶಕದ ಚೊಚ್ಚಲ ಸರಣಿ ಗೆಲ್ಲೋರು ಯಾರು?

ಆಸ್ಟ್ರೇಲಿಯಾ ತಂಡ ಕಳೆದ 32 ವರ್ಷಗಳಿಂದ ಸೋಲೇ ಕಾಣದೆ ಮೆರೆದಾಡುತ್ತಿರುವ ಬ್ರಿಸ್ಬೇನ್​ನ ಗಬ್ಬಾದಲ್ಲಿ ಅಂತಿಮ ಟೆಸ್ಟ್​ ಆರಂಭವಾಗಲಿದೆ. ಈ ಕ್ರೀಡಾಂಗಣದಲ್ಲಿ ಆಸ್ಟ್ರೇಲಿಯಾ 55 ಪಂದ್ಯಗಳನ್ನಾಡಿದ್ದು, 33 ಜಯ, 13 ಡ್ರಾ , ಒಂದು ಟೈ ಹಾಗೂ 8 ಪಂದ್ಯಗಳಲ್ಲಿ ಸೋಲು ಕಂಡಿದೆ. 1988ರಲ್ಲಿ ವೆಸ್ಟ್​ ಇಂಡೀಸ್​ ವಿರುದ್ಧ ಕೊನೆಯ ಸೋಲು ಅನುಭವಿಸಿದೆ. ಅಲ್ಲಿಂದೀಚೆಗೆ ಸೋಲು ಎನ್ನುವುದು ಆಸೀಸ್​ ಬಳಗದ ಮುಂದೆ ಮಂಡಿಯೂರಿ ಕುಳಿತಿದೆ.

ಬ್ರಿಸ್ಬೇನ್​: ಆಸ್ಟ್ರೇಲಿಯಾ ತಂಡ ಮೂರು ದಶಕದಿಂದ ಸೋಲು ಕಾಣದೆ ಮೆರೆದಾಡುತ್ತಿರುವ ಬ್ರಿಸ್ಬೇನ್​ನ ಗಬ್ಬಾದಲ್ಲಿ ನಾಳೆಯಿಂದ ಅಂತಿಮ ಟೆಸ್ಟ್​ ಪಂದ್ಯ ಆರಂಭವಾಗಲಿದೆ. ಈ ಕ್ರೀಡಾಂಗಣದಲ್ಲಿ ಆಸ್ಟ್ರೇಲಿಯಾ 55 ಪಂದ್ಯಗಳನ್ನಾಡಿದ್ದು, 33 ಜಯ, 13 ಡ್ರಾ , ಒಂದು ಟೈ ಹಾಗೂ 8 ಪಂದ್ಯಗಳಲ್ಲಿ ಸೋಲು ಕಂಡಿದೆ. 1988ರಲ್ಲಿ ವೆಸ್ಟ್​ ಇಂಡೀಸ್​ ವಿರುದ್ಧ ಆಸೀಸ್ ಕೊನೆಯ ಸೋಲು ಅನುಭವಿಸಿದೆ. ಅಲ್ಲಿಂದೀಚೆಗೆ ಸೋಲೆನ್ನುವುದು ಆಸೀಸ್​ ಬಳಗದ ಮುಂದೆ ಮಂಡಿಯೂರಿಯೇ ಕುಳಿತಿದೆ ಎನ್ನಬಹುದು.

ಆಸ್ಟ್ರೇಲಿಯಾದ ದಾಖಲೆಗಳು ನಮ್ಮ ಕಣ್ಣಮುಂದಿರುವಾಗ ಭಾರತ ಅಲ್ಲಿ ಗೆಲ್ಲಬಹುದು ಎಂದು ಊಹೆ ಮಾಡಲೂ ಕೂಡಾ ಸಾಧ್ಯವಿಲ್ಲ. ಆದರೆ ಡ್ರಾ ಸಾಧಿಸಿದರೆ ಆ ತಂಡ ಸತತ ಮೂರನೇ ಸರಣಿಯ ನಂತರವೂ ಬಾರ್ಡರ್​-ಗಾವಸ್ಕರ್​ ಟ್ರೋಫಿಯನ್ನು ತನ್ನಲ್ಲೇ ಉಳಿಸಿಕೊಳ್ಳುತ್ತದೆ. 2017ರಿಂದಲೂ ಭಾರತ ಈ ಟ್ರೋಫಿಯನ್ನು ತನ್ನಲ್ಲೇ ಉಳಿಸಿಕೊಂಡು ಬರುತ್ತಿದೆ.

ಜಸ್ಪ್ರೀತ್​ ಬುಮ್ರಾ, ರವೀಂದ್ರ ಜಡೇಜಾ, ಹನುಮ ವಿಹಾರಿ ಅಂತಹ ಸ್ಟಾರ್​ ಆಟಗಾರರು ಆಸ್ಟ್ರೇಲಿಯಾ ಭದ್ರಕೋಟೆಯ ಟೆಸ್ಟ್​ನಲ್ಲಿ ಕಣಕ್ಕಿಳಿಯುತ್ತಿಲ್ಲ. ಇವರ ಬದಲಾಗಿ ಕೇವಲ 1 ಅಥವಾ 2 ಟೆಸ್ಟ್​ ಪಂದ್ಯಗಳನ್ನಾಡಿರುವ ಬೌಲರ್​ಗಳನ್ನು ಅನಿವಾರ್ಯವಾಗಿ ಭಾರತ ತಂಡ ಕಣಕ್ಕಿಳಿಸುತ್ತಿದೆ. ಅನುಭವಿಗಳು ಮತ್ತು ಅತ್ಯಂತ ಕಠಿಣ ಮೈದಾನದಲ್ಲಿ ಆಡುತ್ತಿರುವುದು ನಿಜಕ್ಕೂ ಭಾರತ ತಂಡದ ಕೆಟ್ಟ ಕ್ಷಣವಾಗಲಿದೆ. ಮಯಾಂಕ್ ಅಗರ್​ವಾಲ್​ ಮತ್ತು ಅಶ್ವಿನ್​ ಬಗ್ಗೆ ಇನ್ನು ಖಚಿತತೆ ಇಲ್ಲದೆ ಇರುವುದು ಕೂಡ ಭಾರತಕ್ಕೆ ಆತಂಕ ಮೂಡಿಸಿದೆ.

ಶುಬ್ಮನ್ ಗಿಲ್ - ರೋಹಿತ್

ನಾಳೆ ವೈದ್ಯಕೀಯ ತಂಡದ ಜೊತೆ ಮಾತುಕತೆ ನಡೆಸಿದ ನಂತರ ಬುಮ್ರಾ, ಅಶ್ವಿನ್​ ಫಿಟ್​ ಆಗಲಿದ್ದಾರೆ ಎನ್ನುವುದನ್ನು ಖಚಿತಪಡಿಸಲಿದ್ದೇವೆ ಎಂದು ಬ್ಯಾಟಿಂಗ್ ಕೋಚ್​ ಮಾಹಿತಿ ನೀಡಿದ್ದಾರೆ. ಬುಮ್ರಾ ನಾಳಿನ ಪಂದ್ಯದಲ್ಲಿ ಆಡಿದರೆ ಭಾರತಕ್ಕೆ ಸ್ವಲ್ಪ ಬಲ ಬಂದಂತಾಗಲಿದೆ.

ಆದರೆ ರೋಹಿತ್ ಶರ್ಮಾ, ರಹಾನೆ ಮತ್ತು ಪೂಜಾರ ಅವರ ಆತ್ಮವಿಶ್ವಾಸದ ಆಟ ಹಾಗೂ ಪಂತ್ ಫಾರ್ಮ್​ನಲ್ಲಿರುವುದರಿಂದ ಬ್ಯಾಟಿಂಗ್ ವಿಭಾಗದಲ್ಲಿ ಸಮಾಧಾನ ತಂದಿದೆ. ವಿಹಾರಿ ಅನುಪಸ್ಥಿತಿಯಲ್ಲಿ ಪಂತ್​ ಪರಿಪೂರ್ಣ ಬ್ಯಾಟ್ಸ್​ಮನ್ ಆಗಿ ಆಡಲಿ ಮತ್ತು ಕೀಪಿಂಗ್ ಜವಾಬ್ದಾರಿಯನ್ನು ವೃದ್ಧಿಮಾನ್​ ಸಹಾ ನಿರ್ವಹಿಸಲಿ ಎಂಬ ಹಿರಿಯ ಕ್ರಿಕೆಟಿಗರ ಅಭಿಪ್ರಾಯವನ್ನು ಟೀಮ್ ಇಂಡಿಯಾ ಕಾರ್ಯರೂಪಕ್ಕೆ ತಂದರೆ ಆಸೀಸ್​ ಬೌಲರ್​ಗಳಿಗೆ ತಕ್ಕಮಟ್ಟಿನ ಪೈಪೋಟಿ ನೀಡಬಹುದು ಎನ್ನಲಾಗುತ್ತಿದೆ.

ಬೌಲಿಂಗ್ ವಿಭಾಗದಲ್ಲಿ ಭಾರತ 5 ಬೌಲರ್​ಗಳ ಬದಲಾಗಿ ಕೇವಲ 4 ಸ್ಪೆಷಲಿಸ್ಟ್​ ಬೌಲರ್​ಗಳೊಂದಿಗೆ ಹೋಗುವ ಸಾಧ್ಯತೆಯಿದೆ. ಆದರೂ ಟೀಮ್ ಇಂಡಿಯಾ ಬೌಲಿಂಗ್ ದಾಳಿ ತುಂಬಾ ಸಾಧಾರಣವಾಗಿದೆ. ಸಿರಾಜ್​ 2 ಪಂದ್ಯ, ಸೈನಿ ಕೇವಲ ಒಂದು ಹಾಗೂ ಮೂರನೇ ಬೌಲರ್​ ಸ್ಥಾನದಲ್ಲಿ ಬರಲಿರುವ ಶಾರ್ದುಲ್ ತಮ್ಮ ಪದಾರ್ಪಣೆ ಪಂದ್ಯದಲ್ಲಿ ಕೇವಲ 10 ಎಸೆತಗಳನ್ನು ​ ಮಾತ್ರ ಮಾಡಿದ್ದಾರೆ. ಅದು ಎರಡು ವರ್ಷಗಳ ಹಿಂದೆ. ಹಾಗಾಗಿ ಭಾರತದ ಬೌಲಿಂಗ್​ ದಾಳಿ ಆಸ್ಟ್ರೇಲಿಯಾದ ಸ್ಮಿತ್​, ವಾರ್ನರ್​, ಲಾಬುಶೆನ್​ ಅಂತಹ ಬ್ಯಾಟ್ಸ್​ಮನ್​ಗಳಿಗೆ ಹೆಚ್ಚು ಹೊರೆಯಾಗುವುದಿಲ್ಲ ಎಂಬುದು ಖಂಡಿತ ಒಪ್ಪಿಕೊಳ್ಳಬೇಕಾಗಿದೆ.

ಆಸ್ಟ್ರೇಲಿಯಾ ತಂಡದಲ್ಲೂ ಗಾಯದ ಸಮಸ್ಯೆ ಎದುರಾಗಿದೆ. ಯುವ ಬ್ಯಾಟ್ಸ್​ಮನ್​ ವಿಲ್​ ಪುಕೋವ್​ಸ್ಕಿ ನಾಳಿನ ಪಂದ್ಯದಲ್ಲಿ ಕಣಕ್ಕಿಳಿಯುತ್ತಿಲ್ಲ. ಅವರ ಬದಲಾಗಿ ಯುವ ಬ್ಯಾಟ್ಸ್​ಮನ್​ ಮಾರ್ಕಸ್​ ಹ್ಯಾರೀಸ್​ ಕಣಕ್ಕಿಳಿಯಲಿದ್ದಾರೆ. ಇದೊಂದು ಬದಲಾವಣೆ ಬಿಟ್ಟರೆ ಆಸ್ಟ್ರೇಲಿಯಾ ತಂಡ ತಮ್ಮ ಹಿಂದಿನ ತಂಡವನ್ನೇ ಮತ್ತೆ ಕಣಕ್ಕಿಳಿಸಲಿದೆ.

ಫಲಿತಾಂಶ ಏನೇ ಆಗಲಿ ಭಾರತ ತಂಡ ಈಗಾಗಲೇ ರಹಾನೆ ನೇತೃತ್ವದಲ್ಲಿ ವೈಭವ ಕಂಡಿದೆ. ಹಾಗಾಗಿ ನಾಳಿನ ಪಂದ್ಯದಲ್ಲೂ ಏನಾದರೂ ಅದ್ಭುತವನ್ನು ಸೃಷ್ಟಿಸಲಿದೆಯಾ? ಎಂದು ಕಾದು ನೋಡಬೇಕಿದೆ.