ಮುಂಬೈ: ಕ್ರಿಕೆಟ್ ಜಗತ್ತಿನ ಶ್ರೀಮಂತ ಕ್ರಿಕೆಟ್ ಲೀಗ್ ಆಗಿರುವ ಐಪಿಎಲ್ ಟೂರ್ನಿಯನ್ನ ಸೆಪ್ಟೆಂಬರ್ 26 ರಿಂದ ನವೆಂಬರ್ 8 ರವರೆಗೆ ನಡೆಸಲು ತಯಾರಿ ನಡಸುತ್ತಿದೆ ಎಂದು ತಿಳಿದು ಬಂದಿದೆ.
ಟಿ-20 ವಿಶ್ವಕಪ್ ನಡೆಯುವುದು ಬಹುತೇಕ ಅನುಮಾನವಾಗಿರುವುದರಿಂದ ಬಿಸಿಸಿಐ 60 ಪಂದ್ಯಗಳ ಐಪಿಎಲ್ ಟೂರ್ನಿಯನ್ನು 44 ದಿನಗಳಲ್ಲಿ ಮುಗಿಸಲು ಬಿಸಿಸಿಐ ರೂಪುರೇಷೆಗಳನ್ನು ತಯಾರಿಸಿಕೊಳ್ಳುತ್ತಿದೆ. ಮೂಲಗಳ ಪ್ರಕಾರ ಎಲ್ಲ ತಂಡಗಳಿಗೆ ಪ್ರತಿ ಆವೃತ್ತಿಯಲ್ಲಿ ಇರುವಂತೆ ಹೋಮ್ ಕ್ರೀಡಾಂಗಣಗಳಿರುವುದಿಲ್ಲ. ಬದಲಾಗಿ ಕೇವಲ 5 ಕ್ರೀಡಾಂಗಣದಲ್ಲಿ ಟೂರ್ನಿ ನಡೆಸಲು ತಾತ್ಕಾಲಿಕ ವೇಳಾಪಟ್ಟಿಯನ್ನ ಬಿಸಿಸಿಐ ಬಿಡುಗಡೆ ಮಾಡಿದೆ ಎಂದು ಮುಂಬೈ ಮಿರರ್ ಹಾಗೂ ಸ್ಪೋರ್ಟ್ಸ್ ಸೈಡ್ ವೆಬ್ಸೈಟ್ ವರದಿ ಮಾಡಿವೆ.
ಐಪಿಎಲ್ನ ಎಲ್ಲ ಪ್ರಾಂಚೈಸಿಗಳು, ಮಾಧ್ಯಮ ಹಕ್ಕು ಪಡೆದಿರುವ ಸ್ಟಾರ್ ಇಂಡಿಯಾ ಮತ್ತು ಐಪಿಎಲ್ನ ಇತರ ಪಾಲುದಾರರೊಂದಿಗೆ ಸಮಾಲೋಚನೆ ನಡೆಸಿ ಸೆಪ್ಟೆಂಬರ್ 26 ರಿಂದ ನವೆಂಬರ್ 8ರ ವರೆಗೆ ಐಪಿಎಲ್ ಟೂರ್ನಿ ಆಯೋಜಿಸಲು ಬಿಸಿಸಿಐ ಮಾತುಕತೆ ನಡೆಸಿದೆ. ಆದರೆ, ಇದೆಲ್ಲವೂ ಅಧಿಕೃತವಾಗಿ ಟಿ-20 ವಿಶ್ವಕಪ್ ಮೂಂದೂಡುವುದರ ಮೇಲೆ ಅವಲಂಬಿಸಿದೆ ಎನ್ನಲಾಗಿದೆ.
ಕ್ರಿಕೆಟ್ ಆಸ್ಟ್ರೇಲಿಯಾ ಕೂಡ ಟಿ-20 ವಿಶ್ವಕಪ್ ಆಯೋಜಿಸಲು ಉತ್ಸುಕತೆ ತೋರುತ್ತಿಲ್ಲ. ಇನ್ನು ಜೂನ್ 10 ರಂದು ನಡೆದಿದ್ದ ಐಸಿಸಿ ಬೋರ್ಡ್ ಸಭೆಯಲ್ಲಿ ಟಿ-20 ವಿಶ್ವಕಪ್ ಕುರಿತ ಅಂತಿಮ ನಿರ್ಧಾರವನ್ನು ಜುಲೈ ತಿಂಗಳವರೆಗೆ ಕಾಯ್ದಿರಿಸಿರುವುದಾಗಿ ತಿಳಿಸಿತ್ತು. ಆಯೋಜನೆ ಮಾಡಬೇಕಿರುವ ಕ್ರಿಕೆಟ್ ಆಸ್ಟ್ರೇಲಿಯಾವೇ ಹಿಂದೇಟು ಹಾಕುತ್ತಿರುವುದರಿಂದ ಬಿಸಿಸಿಐ ಐಪಿಎಲ್ ಆಯೋಜಿಸಲು ತಯಾರಿ ನಡೆಸಿಕೊಳ್ಳುತ್ತಿದೆ. ಐಸಿಸಿ ಅಂತಿಮ ತೀರ್ಮಾನ ಕಾಯಲು ಸಿದ್ದವಿಲ್ಲದ ಬಿಸಿಸಿಐ ಮುಂದಿನ ಐಸಿಸಿ ಸಭೆ ಮುಗಿಯುತ್ತಿದ್ದಂತೆ ಐಪಿಎಲ್ ಆಯೋಜನೆಯ ಅಧಿಕೃತ ಪತ್ರವನ್ನು ಇತರ ಅಸೋಸಿಯೇಷನ್ಗೆ ಕಳುಹಿಸಲಿದ್ದಾರೆ ಎಂದು ತಿಳಿದು ಬಂದಿದೆ.
ಈಗಾಗಲೆ ಬಿಸಿಸಿಐ ಶ್ರೀಲಂಕಾ ಹಾಗೂ ಜಿಂಬಾಬ್ವೆ ವಿರುದ್ಧದ ಸರಣಿಯನ್ನು ಕೋವಿಡ್ 19 ಕಾರಣ ನೀಡಿ ರದ್ದುಗೊಳಿಸಿದೆ.
