ಸೌಥಂಪ್ಟನ್: ಪ್ರಸಕ್ತ ಸಾಲಿನ ಏಕದಿನ ವಿಶ್ವಕಪ್ನಲ್ಲಿ ಟೀಂ ಇಂಡಿಯಾ ಸೋಲಿಲ್ಲದ ಸರದಾರನಾಗಿ ಮುನ್ನುಗುತ್ತಿದ್ದು, ಮುಂದಿನ ತಿಂಗಳ 2ರಂದು ಭಾರತ-ಬಾಂಗ್ಲಾ ತಂಡ ಸೆಣಸಾಟ ನಡೆಸಲಿವೆ.
ಅಂಕ ಪಟ್ಟಿಯಲ್ಲಿ 5ನೇ ಸ್ಥಾನದಲ್ಲಿರುವ ಬಾಂಗ್ಲಾ ತಂಡ ಸೆಮಿಫೈನಲ್ಗೆ ಲಗ್ಗೆ ಹಾಕಬೇಕಾದರೆ ಮುಂದಿನ ಪಂದ್ಯಗಳಲ್ಲಿ ಗೆಲುವು ದಾಖಲು ಮಾಡಬೇಕಾದ ಅನಿವಾರ್ಯತೆ ಎದುರಾಗಿದೆ. ಹೀಗಾಗಿ ಭಾರತದ ಮನೋಬಲ ಕುಗ್ಗಿಸುವ ಕೆಲಸಕ್ಕೆ ಕೈ ಹಾಕಿದೆ. ಬಾಂಗ್ಲಾ ತಂಡದ ಸ್ಪಿನ್ ವಿಭಾಗದ ಬೌಲಿಂಗ್ ಕೋಚ್ ಆಗಿರುವ ಕನ್ನಡಿಗ ಸುನೀಲ್ ಜೋಶಿ ಇದೀಗ ಕೊಹ್ಲಿ ಪಡೆಗೆ ವಾರ್ನ್ ಮಾಡಿದ್ದಾರೆ.
ಭಾರತದ ಬ್ಯಾಟಿಂಗ್ ವಿಭಾಗದ ಬಗ್ಗೆ ಸರಿಯಾಗಿ ತಿಳಿದುಕೊಂಡಿರುವ ಸುನೀಲ್ ಜೋಶಿ ಮಾತನಾಡಿದ್ದು, ಭಾರತಕ್ಕೆ ಯಾವ ರೀತಿಯಾಗಿ ಬೌಲಿಂಗ್ ಮಾಡಬೇಕು ಎಂಬುದು ನನಗೆ ಗೊತ್ತಿದೆ. ನಮ್ಮ ಬೌಲರ್ಗಳು ಯೋಜನೆ ಪ್ರಕಾರ ಬೌಲಿಂಗ್ ಮಾಡಿ ಗೆಲುವು ದಾಖಲು ಮಾಡಲಿದ್ದಾರೆ ಎಂದಿದ್ದಾರೆ. ಇನ್ನು ಬಾಂಗ್ಲಾದೇಶದ ಆಲ್ರೌಂಡರ್ ಶಕೀಬ್ ಅಲ್ ಹಸನ್ ಬ್ಯಾಟಿಂಗ್ ಹಾಗೂ ಬೌಲಿಂಗ್ನಲ್ಲಿ ಮಿಂಚುತ್ತಿರುವುದು ತಂಡಕ್ಕೆ ಪ್ಲಸ್ ಪಾಯಿಂಟ್ ಆಗಿದೆ.
ಈ ಹಿಂದೆ ಏಷ್ಯಾ ಕಪ್ನಲ್ಲೂ ಭಾರತಕ್ಕೆ ಟಕ್ಕರ್ ನೀಡಿದ್ದ ಬಾಂಗ್ಲಾ ಕೊನೆ ಓವರ್ನಲ್ಲಿ ಮ್ಯಾಚ್ ಕೈ ಚೆಲ್ಲಿತ್ತು. ಈಗಾಗಲೇ ಬಲಿಷ್ಠ ದಕ್ಷಿಣ ಆಫ್ರಿಕಾ, ವೆಸ್ಟ್ ಇಂಡೀಸ್ ವಿರುದ್ಧ ಗೆಲುವು ದಾಖಲು ಮಾಡಿರುವ ಬಾಂಗ್ಲಾ, ಅಫ್ಘಾನಿಸ್ತಾನ ವಿರುದ್ಧ ಸಹ ಜವಾಬ್ದಾರಿಯುತ ಗೆಲುವು ತನ್ನದಾಗಿಸಿಕೊಂಡಿದೆ. ಇದೀಗ ಭಾರತದ ವಿರುದ್ಧ ಸೆಣಸಾಟ ನಡೆಸಲು ಬಾಂಗ್ಲಾ ತಯಾರಿ ನಡೆಸಿದೆ.
