ಮುಂಬೈ: 2020ರ ಐಪಿಎಲ್ ಆವೃತ್ತಿಗೆ ಡಿಸೆಂಬರ್ನಲ್ಲಿ ಹರಾಜು ಪ್ರಕ್ರಿಯೆ ನಡೆಯಲಿದ್ದು, ಇದಕ್ಕೂ ಮುನ್ನ ಪ್ರಾಂಚೈಸಿಗಳು ಕೆಲವು ಆಟಗಾರರನ್ನು ತಂಡಕ್ಕೆ ಸೇರಿಸಿಕೊಳ್ಳುವ ಹಾಗೂ ತಂಡದಿಂದ ಕೈಬಿಡುವುದಕ್ಕೆ ನವೆಂಬರ್ 14 ಕೊನೆಯ ದಿನಾಂಕವಾಗಿದ್ದರಿಂದ ಕೆಲವು ಆಟಗಾರರನ್ನು ಪ್ರಾಂಚೈಸಿಗಳು ಬೇರೆ ತಂಡಗಳಿಗೆ ಬಿಟ್ಟುಕೊಟ್ಟಿದ್ದಾರೆ.
ಬುಧವಾರ ರಾಜಸ್ಥಾನ ರಾಯಲ್ಸ್ ಆಲ್ರೌಂಡರ್ ಕೆ. ಗೌತಮ್ರನ್ನು ಪಂಜಾಬ್ಗೆ ಮಾರಾಟ ಮಾಡಿ, ಅಂಕಿತ್ ರಜಪೂತ್ರನ್ನು ತಂಡಕ್ಕೆ ಸೇರಿಸಿಕೊಂಡಿತ್ತು. ಇದೀಗ ಗೌತಮ್ ಪಂಜಾಬ್ ಸೇರಿದ 5 ನೇ ಕ್ರಿಕೆಟ್ ಆಟಗಾರನಾದರು. ಕೋಚ್ ಸೇರಿದಂತೆ 7 ಕನ್ನಡಿಗರು ಮುಂದಿನ ಐಪಿಎಲ್ನಲ್ಲಿ ಕಿಂಗ್ಸ್ ಇಲೆವೆನ್ ಪ್ರಾಂಚೈಸಿ ಪರ ಪ್ರದರ್ಶನ ತೋರಲು ಸಿದ್ಧವಾಗಿದ್ದಾರೆ.
ಕರ್ನಾಟಕದ ಮಂಚೂಣಿ ಬ್ಯಾಟ್ಸ್ಮನ್ಗಳಾದ ಮಯಾಂಕ್ ಅಗರ್ವಾಲ್, ಕರುಣ್ ನಾಯರ್, ಕೆ ಎಲ್ ರಾಹುಲ್ ಈ ಮೊದಲು ತಂಡದಲ್ಲಿದ್ದರು. ಕೆಲವು ದಿನಗಳ ಹಿಂದೆ ಅನಿಲ್ ಕುಂಬ್ಳೆಯನ್ನು ಕೋಚ್ ಆಗಿ, ಸುನಿಲ್ ಜೋಷಿಯನ್ನು ಬೌಲಿಂಗ್ ಕೋಚ್ ಆಗಿ ಪಂಜಾಬ್ ತಂಡ ಆಯ್ಕೆ ಮಾಡಿಕೊಂಡಿದೆ.
ಇದೀಗ ನಾಯಕರಾಗಿದ್ದ ಅಶ್ವಿನ್ ಡೆಲ್ಲಿ ಕ್ಯಾಪಿಟಲ್ ಗೆ ವರ್ಗಾವಣೆಗೊಂಡಿದ್ದಾರೆ. ಡೆಲ್ಲಿಯಿಂದ ಜಗದೀಶ್ ಸುಚಿತ್ ರನ್ನು ಪಂಜಾಬ್ ಪಡೆದಿತ್ತು. ನಿನ್ನೆ ಮತ್ತೆ ಆಲ್ರೌಂಡರ್ ಕೆ ಗೌತಮ್ರನ್ನು ಕೂಡ ಪ್ರೀತಿ ಜಿಂಟಾ ಪಡೆ ಖರೀದಿಸಿ ತಮ್ಮ ತಂಡದಲ್ಲಿ ಅರ್ಧ ಕನ್ನಡಿಗರನ್ನೇ ತುಂಬಿಸಿಕೊಂಡಿದೆ.
ಇದೀಗ ಕರ್ನಾಟಕ ಅಭಿಮಾನಿಗಳು ಕನ್ನಡಿಗರಿರುವ ಪಂಜಾಬ್ಗೆ ಬೆಂಬಲ ನೀಡುತ್ತಾರೋ ಅಥವಾ ಕರ್ನಾಟಕದ ಪ್ರಾಂಚೈಸಿ ಆರ್ಸಿಬಿಗೆ ಬೆಂಬಲ ನೀಡುತ್ತಾರಾ ಎಂಬುದನ್ನು ಕಾದು ನೋಡಬೇಕಿದೆ. ಆರ್ಸಿಬಿ ತಂಡದಲ್ಲಿ ಯುವ ಬ್ಯಾಟ್ಸ್ಮನ್ ದೇವದತ್ ಪಡಿಕ್ಕಲ್ ಅವರು ಮಾತ್ರ ಕರ್ನಾಟಕ ತಂಡವನ್ನು ಪ್ರತಿನಿಧಿಸುತ್ತಿರುವ ಆಟಗಾರನಾಗಿದ್ದಾರೆ.
