ಪ್ರತಿಯೊಬ್ಬರಿಗೂ ರೋಲ್ ಮಾಡೆಲ್ ಇರುತ್ತಾರೆ. ಜೀವನದಲ್ಲಿ ಏನಾದರೂ ಸಾಧಿಸಬೇಕು ಎಂದುಕೊಂಡಿರುವವರಿಗೆ ಸಾಕಷ್ಟು ಜನರು ಸ್ಫೂರ್ತಿಯಾಗಿರುತ್ತಾರೆ. ಅದೇ ರೀತಿ ಕಂಚಿನ ಕಂಠದ ನಟ ವಸಿಷ್ಠ ಸಿಂಹ ಅವರಿಗೆ ಚಾಲೆಂಜಿಂಗ್ ಸ್ಟಾರ್ ದರ್ಶನ್ ರೋಲ್ ಮಾಡೆಲ್ ಅಂತೆ.
ವಸಿಷ್ಠಸಿಂಹ ಕೇವಲ ನಟ ಮಾತ್ರವಲ್ಲ, ಗಾಯಕ ಆಗಿ ಕೂಡಾ ಹೆಸರು ಮಾಡಿದವರು. ಬದುಕಿದರೆ ದರ್ಶನ್ ಅವರಂತೆ ಬದುಕಬೇಕು ಎಂದು ವಸಿಷ್ಠ ಹೇಳಿಕೊಂಡಿದ್ದಾರೆ. ಜನವರಿ 24 ರಂದು ಬಿಡುಗಡೆಯಾಗುತ್ತಿರುವ 'ಇಂಡಿಯಾ vs ಇಂಗ್ಲೆಂಡ್' ಸಿನಿಮಾದ ಸುದ್ದಿಗೋಷ್ಠಿಯಲ್ಲಿ ವಸಿಷ್ಠ ಈ ರೀತಿ ಹೇಳಿದ್ದಾರೆ. 'ನಾನು ಜೀವನದಲ್ಲಿ ಯಾವ ರೀತಿ ಬದುಕಬೇಕು ಎಂದು ಕನಸು ಕಂಡಿದ್ದೆನೋ, ದರ್ಶನ್ ಅವರು ಆ ರೀತಿ ಬದುಕುತ್ತಿದ್ದಾರೆ. ನನಗೆ ಕುದುರೆ ಓಡಿಸುವುದು, ಹಸುಗಳನ್ನು ಸಾಕುವುದು, ಹಾಲು ಕರೆಯುವುದು, ತೋಟಗಾರಿಕೆ ಮಾಡುವುದು ಬಹಳ ಇಷ್ಟದ ಕೆಲಸ. ಇವುಗಳೊಂದಿಗೆ ನನಗೆ ಕಾರು ಹಾಗೂ ಬೈಕ್ ಕ್ರೇಜ್ ಕೂಡಾ ಇದೆ' ಆದರೆ ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅವರು ಈ ರೀತಿಯ ಜೀವನ ಸಾಗಿಸುತ್ತಿದ್ದಾರೆ. ಅವರನ್ನು ನೋಡುತ್ತಿದ್ದರೆ ನನ್ನ ಕನಸನ್ನು ಅವರು ನಡೆಸುತ್ತಿದ್ದಾರೆ ಎನ್ನಿಸುತ್ತದೆ. ಕೆಲವೊಮ್ಮೆ ಹೊಟ್ಟೆಉರಿ ಆಗಿದ್ದೂ ಉಂಟು. ಆದರೆ ಅವರನ್ನು ನೋಡಿದರೆ ನನಗೆ ಅಷ್ಟೇ ಖುಷಿಯಾಗುತ್ತದೆ' ಎಂದು ವಸಿಷ್ಠ ಹೇಳಿಕೊಂಡಿದ್ದಾರೆ.
