ಕಲರ್ಸ್ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುತ್ತಿರುವ ನನ್ನರಸಿ ರಾಧೆ ಧಾರಾವಾಹಿ ಯಶಸ್ವಿ 200 ಸಂಚಿಕೆಗಳನ್ನು ಪೂರೈಸಿದೆ. ಫೆಬ್ರವರಿಯಲ್ಲಿ ಆರಂಭಗೊಂಡ ಈ ಧಾರಾವಾಹಿಯು ಸೀರಿಯಲ್ ಪ್ರಿಯರ ಮನ ಸೆಳೆದಿದೆ ಎಂಬುದಕ್ಕೆ 200 ಸಂಚಿಕೆ ಪೂರೈಸಿರುವುದೇ ಸಾಕ್ಷಿ. ಪ್ರತಿ ಸಂಚಿಕೆಯೂ ಕುತೂಹಲಕಾರಿಯಾಗಿದ್ದು ವಿಭಿನ್ನ ಕಥಾ ಹಂದರದ ಧಾರಾವಾಹಿಯನ್ನು ವೀಕ್ಷಕರು ಮೆಚ್ಚಿಕೊಂಡಿದ್ದಾರೆ.
ನಾಯಕಿ ಇಂಚರಾ ಡಿಗ್ರಿ ಮುಗಿಸದಿದ್ದರೂ ಉದ್ಯೋಗ ಅರಸುತ್ತಿರುತ್ತಾಳೆ. ಆಶ್ಚರ್ಯ ಎಂಬಂತೆ ಅಗಸ್ತ್ಯ ಎಂಟರ್ ಪ್ರೈಸಸ್ ನಲ್ಲಿ ಆಕೆಗೆ ಕೆಲಸ ದೊರೆಯುತ್ತದೆ. ಸಂತೋಷ್ ರಾಥೋಡ್ ಅವರ ಪಿಎ ಆಗಿ ಇಂಚರಾ ಕೆಲಸ ಮಾಡುತ್ತಿರುತ್ತಾಳೆ. ಆದರೆ, ಅಲ್ಲಿ ಕೆಲಸ ಮುಂದುವರಿಸಲು ಇಂಚರಾಗೆ ಇಷ್ಟ ಇಲ್ಲದಿದ್ದರೂ ಸನ್ನಿವೇಶಗಳು ಅವಳನ್ನು ಒತ್ತಡಕ್ಕೆ ದೂಡುತ್ತದೆ. ಮುಂದೆ ರಿಷಭ್ ಜೊತೆ ಆಕೆಯ ಮದುವೆಯೂ ನಿಶ್ಚಯವಾಗುತ್ತದೆ. ರಿಷಭ್ ಕೆಟ್ಟವನು ಎಂದು ತಿಳಿದಿದ್ದರೂ ಅಮ್ಮನ ಆಸೆಯನ್ಬು ಈಡೇರಿಸುವ ಸಲುವಾಗಿ ಮದುವೆಗೆ ಸಿದ್ಧಳಾಗಿರುತ್ತಾಳೆ. ರಿಷಭ್ ನನ್ನು ವರಿಸಬೇಕಾಗಿದ್ದ ಇಂಚರಾಳಿಗೆ ಅಗಸ್ತ್ಯ ತಾಳಿ ಕಟ್ಟುತ್ತಾನೆ. ಹೀಗಾಗಿ ಎರಡು ಕುಟುಂಬಗಳ ನಡುವೆ ಜಗಳ ನಡೆಯುತ್ತದೆ.
ಸದ್ಯ ಇಂಚರಾ ಅಗಸ್ತ್ಯನ ಮನೆಗೆ ಬಂದಿದ್ದು, ಇಲ್ಲೂ ಇಬ್ಬರ ಕೋಳಿ ಜಗಳವು ವೀಕ್ಷಕರನ್ನು ಸೆಳೆಯುತ್ತಿದೆ. ಇದರ ಮಧ್ಯೆ ಇಂಚರಾ ನನಗ್ಯಾಕೆ ತಾಳಿ ಕಟ್ಟಿದೆ ಅಗಸ್ತ್ಯ ಎಂದು ಕೇಳುತ್ತಿರುತ್ತಾಳೆ. ಅದಕ್ಕೆ ಅಗಸ್ತ್ಯ ನ ಬಳಿ ಉತ್ತರವಿಲ್ಲ. ಇನ್ನು ಅಗಸ್ತ್ಯ ನ ಅಮ್ಮನ ಬಗ್ಗೆ ತಿಳಿದಿರುವ ರಹಸ್ಯವನ್ನು ಇಂಚರಾ ಇನ್ನಾದರೂ ಹೇಳುತ್ತಾಳಾ ಎಂಬುದನ್ನು ನೋಡಬೇಕಾಗಿದೆ.
ನಾಯಕಿ ಇಂಚರಾ ಆಗಿ ಕೌಸ್ತುಭ ಮಣಿ, ನಾಯಕ ಅಗಸ್ತ್ಯ ಆಗಿ ಅಭಿನಂದನ್ ವಿಶ್ವನಾಥನ್ ನಟಿಸಿದ್ದಾರೆ. ಉಳಿದಂತೆ ಸಿಹಿಕಹಿ ಚಂದ್ರು, ವೈಜಯಂತಿ ಕಾಶಿ, ಶ್ರಾವ್ಯ ಗೌಡ ಮೊದಲಾದರು ತಾರಾಗಣದಲ್ಲಿದ್ದಾರೆ.
