ನಮ್ಮ ಕನ್ನಡ ಚಿತ್ರರಂಗದಲ್ಲಿ ಬದಲಾವಣೆ ಅಗತ್ಯವಿದೆ, ಡಬ್ಬಿಂಗ್ ಚಿತ್ರಗಳಿಂದ ಕನ್ನಡ ಭಾಷೆ ಬೆಳೆಯುತ್ತದೆ ಎಂದು ಕಿಚ್ಚ ಸುದೀಪ್ ಹೇಳಿದರು.
'ಸೈರಾ ನರಸಿಂಹ ರೆಡ್ಡಿ' ಚಿತ್ರದ ಸಕ್ಸಸ್ ಪ್ರೆಸ್ಮೀಟ್ನಲ್ಲಿ ಡಬ್ಬಿಂಗ್ ಚಿತ್ರಗಳ ಬಗ್ಗೆ ಮಾತನಾಡಿದ ನಟ ಸುದೀಪ್, ಐದು ವರ್ಷಗಳ ಹಿಂದೆ ನಾನೇ ಡಬ್ಬಿಂಗ್ ಚಿತ್ರಗಳಿಗೆ ವಿರೋಧ ವ್ಯಕ್ತಪಡಿಸಿದ್ದೆ. ಈಗ ಇಲ್ಲಿ ಯಾರು ಯಾರ ಪರವಾಗಿಯೂ ಇಲ್ಲ, ವಿರೋಧವಾಗಿಯೂ ಇಲ್ಲ. ಐದು ವರ್ಷಗಳ ಹಿಂದಿನ ಮಟ್ಟಿಗೆ ಡಬ್ಬಿಂಗ್ ಚಿತ್ರಗಳನ್ನು ವಿರೋಧಿಸುವ ಅವಶ್ಯಕತೆ ಇತ್ತು. ಆದರೆ ಈಗ ನಮಗೆ ಬದಲಾವಣೆಯ ಅಗತ್ಯವಿದೆ ಎಂದರು.
ಐದು ವರ್ಷಗಳ ಹಿಂದೆ ಇದ್ದ ರೀತಿಯಲ್ಲೇ ನಾವು ಈಗ ಇಲ್ಲ. ನಾವು ಕನ್ನಡದಲ್ಲಿ 50 ಕೋಟಿ ಬಜೆಟ್ನಲ್ಲಿ ಸಿನಿಮಾ ಮಾಡ್ತಿದ್ದೀವಿ. ಒಂದು ವೇಳೆ ನಾವು ಕೂಡ 100 ಅಥವಾ 200 ಕೋಟಿ ಬಜೆಟ್ನಲ್ಲಿ ಚಿತ್ರ ಮಾಡಿದ್ರೆ, ಭಾಷೆಗಳ ಕಡೆ ಮುಖ ಮಾಡಲೇ ಬೇಕು. ಏಕಂದರೆ ಕನ್ನಡದಲ್ಲಿ ನಾವು ಇಷ್ಟೊಂದು ಬ್ಯುಸಿನೆಸ್ ಮಾಡೋಕೆ ಸಾಧ್ಯವಿಲ್ಲ. ತೆಲುಗು ಚಿತ್ರರಂಗದ ವ್ಯವಹಾರದ ವಿಷಯಕ್ಕೆ ಬಂದ್ರೆ, ದೊಡ್ಡದಾಗಿದೆ. ಆದರೆ ಹೈ ಬಜೆಟ್ನಲ್ಲಿ ಸಿನಿಮಾ ಮಾಡಿದಾಗ ಅವರಿಗೂ ಕೂಡ ಆಂಧ್ರದಲ್ಲೇ ಇಷ್ಟು ಬ್ಯುಸಿನೆಸ್ ಮಾಡುವುದು ಸಾಕಾಗುವುದಿಲ್ಲ, ಹೀಗಾಗಿ ಬೇರೆ ಭಾಷೆಗಳ ಕಡೆ ಮುಖ ಮಾಡಲೇ ಬೇಕು. ಉದಾಹರಣೆಗೆ ಬಾಹುಬಲಿ ಹಾಗೂ ಕೆಜಿಎಫ್ ಚಿತ್ರಗಳನ್ನೆ ತೆಗೆದು ಕೊಂಡ್ರೆ ಬಾಹುಬಲಿ ಆಂಧ್ರಕ್ಕೆ ಮಾತ್ರ ಸೀಮಿತವಾಗಿದ್ರೆ ಹಾಗೂ ಕೆಜಿಎಫ್ ಕರ್ನಾಟಕಕ್ಕೆ ಮಾತ್ರ ಸೀಮಿತವಾಗಿದ್ರೆ ಅಷ್ಟು ದೊಡ್ಡ ಬ್ಯುಸಿನೆಸ್ ಸಾಧ್ಯವಾಗುತ್ತಿರಲಿಲ್ಲ. ಒಂದು ವೇಳೆ ನಮ್ಮ ಭಾಷೆಗೆ ಸಿನಿಮಾಗಳು ಸೀಮಿತವಾಗಬೇಕಾದರೆ ಚಿತ್ರಗಳ ಬಜೆಟ್ ಸಹ ಕಡಿಮೆ ಮಾಡಿಕೊಳ್ಳಬೇಕು ಎಂದರು.
ಸದ್ಯ ಕನ್ನಡ ಚಿತ್ರರಂಗಕ್ಕೆ ವಿಕಾಸದ ಅವಶ್ಯಕತೆ ಇದೆ. ಪ್ರತಿಯೊಬ್ಬರಿಗೂ ಇಲ್ಲಿ ಬೆಳೆಯೋದಕ್ಕೆ ಅವಕಾಶ ಇದೆ, ನಮ್ಮ ಭಾಷೆ ಮೇಲೆ ನಮಗೆ ನಂಬಿಕೆ ಇರಬೇಕು. ನಮ್ಮ ಭಾಷೆ ಇರೋತನಕ ಮಾತ್ರ ಚಿತ್ರರಂಗ ಇರಲು ಸಾಧ್ಯ. ಬೇರೆ ಭಾಷೆ ಚಿತ್ರಗಳು ಕನ್ನಡಕ್ಕೆ ಡಬ್ ಆದರೆ ಕನ್ನಡ ಬೆಳೆಯುತ್ತೆ. ಇದರಿಂದ ನಮ್ಮ ತಂತ್ರಜ್ಞರು ಹಾಗೂ ಕಲಾವಿದರು ಬೇರೆ ಭಾಷೆಯವರಿಗೆ ಬೇಕಾಗುತ್ತೆ. ಇದೊಂದು ವಿಕಾಸ ಅಷ್ಟೆ ಎಂದು ಡಬ್ಬಿಂಗ್ ಚಿತ್ರಗಳ ಕುರಿತು ಕಿಚ್ಚ ಸುದೀಪ್ ವಿವರಣೆ ನೀಡಿದರು.
