ಮುಂಬೈ (ಮಹಾರಾಷ್ಟ್ರ): ಬಾಲಿವುಡ್ ನಟ ಹೃತಿಕ್ ರೋಷನ್‌ಗೆ ಶನಿವಾರ ಬೆಳಗ್ಗೆ 11 ಗಂಟೆಗೆ ಮುಂಬೈ ಅಪರಾಧ ವಿಭಾಗಕ್ಕೆ ಹಾಜರಾಗುವಂತೆ ಸಮನ್ಸ್ ನೀಡಲಾಗಿದೆ.
ಹೃತಿಕ್ ರೋಷನ್ ಹಾಗೂ ಕಂಗನಾ ರಣಾವತ್ ನಡುವೆ 2016 ರ ಸಂದರ್ಭದಲ್ಲಿ ವಿವಾದವೊಂದು ಹುಟ್ಟಿಕೊಂಡಿತ್ತು. ಕಂಗನಾ ವಿರುದ್ಧ ದೂರು ನೀಡಿದ್ದ ಹೃತಿಕ್ ರೋಷನ್, ಕಂಗನಾ ತಮಗೆ ನಕಲಿ ಇ - ಮೇಲ್ ಮೂಲಕ ಮೇಲ್ ಕಳಿಸುತ್ತಿದ್ದಾರೆ ಎಂದು ಆರೋಪಿಸಿ, ದೂರು ನೀಡಿದ್ದರು.
ಇದಕ್ಕೆ ಪ್ರತಿಯಾಗಿ ದೂರು ನೀಡಿದ್ದ ಕಂಗನಾ, ಅಕ್ರಮ ಸಂಬಂಧವನ್ನು ಮುಚ್ಚಿಹಾಕಲು ಹೃತಿಕ್ ದೂರು ನೀಡಿದ್ದಾನೆ. ಅಲ್ಲದೇ ಹೃತಿಕ್ ರೋಷನ್ ಕೂಡ ನನಗೆ ನೂರಕ್ಕೂ ಹೆಚ್ಚು ಇ-ಮೇಲ್ ಕಳುಹಿಸಿದ್ದಾನೆ ಆರೋಪಿಸಿದ್ದರು.
2020 ರಲ್ಲಿ ಹೃತಿಕ್ ರೋಷನ್ ಪರ ವಕೀಲ ಮಹೇಶ್ ಜೆಠ್ಮಲಾನಿ ಅವರು 2016 ರಲ್ಲಿ ನೀಡಿದ್ದ ಪ್ರಕರಣ ಏನಾಯಿತು ಎಂದು ಪೊಲೀಸರ ಬಳಿ ಲಿಖಿತವಾಗಿ ವಿಚಾರಿಸಿದ ನಂತರ, ಪ್ರಕರಣವನ್ನು ಅಪರಾಧ ಗುಪ್ತಚರ ಘಟಕಕ್ಕೆ (ಸಿಐಯು) ವರ್ಗಾವಣೆ ಮಾಡಲಾಯಿತು. ಈ ಮೊದಲು ಪ್ರಕರಣಕ್ಕೆ ಸಂಬಂಧಿಸಿದಂತೆ ಪೊಲೀಸರು ಹೃತಿಕ್ ರೋಷನ್ ಹಾಗೂ ಕಂಗನಾ ರಣಾವತ್ ಇಬ್ಬರ ಹೇಳಿಕೆಯನ್ನು ದಾಖಲಿಸಿಕೊಂಡಿದ್ದಾರೆ.
ಇದೀಗ ಅಪರಾಧ ವಿಭಾಗದ ಅಧಿಕಾರಿಗಳು ಪ್ರಕರಣ ಕುರಿತು ಹೃತಿಕ್ ರೋಷನ್‌ಗೆ ಸಮನ್ಸ್ ನೀಡಿದ್ದು, ಅವರು ನೀಡುವ ಹೇಳಿಕೆಯನ್ನು ದಾಖಲಿಸಿಕೊಳ್ಳಲಿದ್ದಾರೆ. ಅಷ್ಟೇ ಅಲ್ಲದೆ ಕಂಗನಾ ರಣಾವತ್ಗೂ ಸಹ ಸಮನ್ಸ್ ನೀಡುವ ಸಾಧ್ಯತೆ ಇದೆ.
