ಮಾರ್ಚ್ 17 ರಂದು ಪವರ್ ಸ್ಟಾರ್ ಹುಟ್ಟುಹಬ್ಬ. ಅಭಿಮಾನಿಗಳು ಈಗಾಗಲೇ ಮೆಚ್ಚಿನ ನಟನ ಹುಟ್ಟುಹಬ್ಬವನ್ನು ಆಚರಿಸಲು ಎಲ್ಲಾ ತಯಾರಿ ನಡೆಸುತ್ತಿದ್ದಾರೆ. ಪುನೀತ್ ಅಕ್ಕನ ಮಗ ಧೀರನ್ ರಾಮ್ಕುಮಾರ್ ಕೂಡಾ ಸೋದರಮಾವನ ಬರ್ತಡೇಗೆ ಒಂದು ವಿಶೇಷ ಗಿಫ್ಟ್ ಕೊಡಲು ರೆಡಿಯಾಗುತ್ತಿದ್ದಾರೆ.
ಧೀರನ್ ರಾಮ್ಕುಮಾರ್ 'ಅಜಾತ ಶತ್ರು' ಎಂಬ ಕಿರುಚಿತ್ರವನ್ನು ತಯಾರಿಸುತ್ತಿದ್ದಾರೆ. ಈ ಕಿರುಚಿತ್ರ ಮಾರ್ಚ್ 17 ರಂದು ಪುನೀತ್ ಹುಟ್ಟುಹಬ್ಬದ ದಿನ ಲೋಕಾರ್ಪಣೆಯಾಗಲಿದೆ. ಕಿರುಚಿತ್ರ ತೇಜಸ್ ರಂಗನಾಥ್ ನಿರ್ದೇಶನದಲ್ಲಿ ಮೂಡಿಬರುತ್ತಿದೆ. ಪವರ್ ಸ್ಟಾರ್ ಬಗ್ಗೆ ಅಧಿಕೃತ ಮಾಹಿತಿಗಳು ವಿಶೇಷ ಪೋಟೋಗಳು, ವಿಶೇಷ ವ್ಯಕ್ತಿಗಳ ಅನಿಸಿಕೆಗಳು, ಪುನೀತ್ ರಾಜ್ಕುಮಾರ್ ಬಾಲನಟ ಆಗಿದ್ದಾಗಿನಿಂದ 'ಯುವರತ್ನ' ಚಿತ್ರದವರೆಗೂ ಅವರ ಸಿನಿಪಯಣವನ್ನು ಈ ಕಿರುಚಿತ್ರದಲ್ಲಿ ತೋರಿಸಲಾಗುತ್ತಿದೆ. ತೇಜಸ್ ರಂಗನಾಥ್ ಜೊತೆಗೆ ಮನೋಜ್ ಕುಮಾರ್, ವಿಶ್ವನಾಥ್ ಗೌಡ, ಶರತ್ ಕುಮಾರ್, ಪೃಥ್ವಿರಾಜ್, ತಿಲಕ್ ಗೌಡ, ಮಣಿ ಹಾಗೂ ಇತರರು ಸೇರಿಕೊಂಡು ‘ಅಜಾತ ಶತ್ರು’ ಕಿರುಚಿತ್ರವನ್ನು ತಯಾರಿಸುತ್ತಿದ್ದಾರೆ. ಈಗಾಗಲೇ ಚಿತ್ರದ ಪೋಸ್ಟರ್ ಕೂಡಾ ಬಿಡುಗಡೆಯಾಗಿದ್ದು ಈ ಕಿರುಚಿತ್ರದ ಬಗ್ಗೆ ಪುನೀತ್ ರಾಜಕುಮಾರ್ ಅಭಿಮಾನಿಗಳಲ್ಲಿ ಕುತೂಹಲ ಹೆಚ್ಚಾಗಿದೆ.
