ಚಿತ್ರರಂಗದಲ್ಲಿ ನಾಯಕನ ವಯಸ್ಸು ಎಷ್ಟೇ ಆದರೂ 20-35 ಒಳಗಿನ ನಾಯಕಿಯರೇ ಜೊತೆಯಾಗುತ್ತಾರೆ. ಇದಕ್ಕೆ ಎಷ್ಟೋ ಉದಾಹರಣೆಗಳಿವೆ. ನಾಯಕನಿಗಿರುವ ಡಿಮ್ಯಾಂಡ್ ಅಂತಾದ್ದು. ಸಿನಿಮಾಗಳಲ್ಲಿ ನಾಯಕಿ ಇರದಿದ್ದರೂ ನಾಯಕ ಬಹಳ ಮುಖ್ಯ ಎನ್ನಬಹುದು.
ವರನಟ ಡಾ. ರಾಜ್ಕುಮಾರ್ ಅವರಿಗೆ ನಾಯಕಿಯಾಗಿ ಅಭಿನಯಿಸಿದ್ದ ಪಂಡರೀಬಾಯಿ ಅವರು ನಂತರ ಕೆಲವೊಂದು ಸಿನಿಮಾಗಳಲ್ಲಿ ರಾಜಣ್ಣನಿಗೆ ತಾಯಿಯಾಗಿ ನಟಿಸಿದ್ದರು. 16 ವರ್ಷದ ಶ್ರೀದೇವಿ 56 ವರ್ಷದ ಎನ್ಟಿಆರ್ ಅವರಿಗೆ 'ವೇಟೆಗಾಡು' ಚಿತ್ರಕ್ಕೆ ಜೊತೆಯಾಗಿದ್ದರು. ಇದೀಗ ಕಿಚ್ಚನ ಜೊತೆ 'ಹೆಬ್ಬುಲಿ' ಸಿನಿಮಾದಲ್ಲಿ ನಟಿಸಿದ್ದ ಅಮಲಾ ಪೌಲ್, ನಂದಮೂರಿ ಬಾಲಕೃಷ್ಣ ಅವರಿಗೆ ಜೊತೆಯಾಗಿದ್ದಾರೆ. ಅಮಲಾ ಪೌಲ್ ಅವರಿಗೆ ಈಗ 30 ವರ್ಷ ವಯಸ್ಸಾದರೆ ಬಾಲಕೃಷ್ಣ ಅವರಿಗೆ 60. ಇಬ್ಬರಿಗೂ 30 ವರ್ಷಗಳ ವಯಸ್ಸಿನ ವ್ಯತ್ಯಾಸವಿದೆ.
ಕೆಲವು ದಿನಗಳ ಹಿಂದೆ ಅಮಲಾ ಪೌಲ್ ನಾಯಕಿ ಪ್ರಧಾನ ಚಿತ್ರ 'ಆಡೈ' ನಿಂದ ಬಹಳ ಸುದ್ದಿಯಲ್ಲಿದ್ದರು. ಅವರ 'ಅಧೋ ಅಂದ ಪಾರವೈ ಪೊಲ', 'ಕಡವರ್' ಸಿನಿಮಾಗಳು ಕೂಡಾ ಹೆಸರು ಮಾಡಿದ್ದವು. ಈಗ ನಂದಮೂರಿ ಬಾಲಕೃಷ್ಣ ಪ್ರಮುಖ ಪಾತ್ರದಲ್ಲಿ ಅಭಿನಯಿಸುತ್ತಿರುವ ಬೋಯಪಟ್ಟಿ ಶ್ರೀನು ನಿರ್ದೇಶನದ 'ಎನ್ಬಿಕೆ 106' ಚಿತ್ರದಲ್ಲಿ ಅಮಲಾ ಪೌಲ್ ಬಾಲಣ್ಣನಿಗೆ ನಾಯಕಿಯಾಗಿ ನಟಿಸುತ್ತಿದ್ದಾರೆ. ಕೊರೊನಾ ಲಾಕ್ಡೌನ್ ಮುನ್ನವೇ ಆರಂಭವಾದ ಸಿನಿಮಾ ಕೆಲವೇ ದಿನಗಳಲ್ಲಿ ಮತ್ತೆ ಆರಂಭವಾಗಲಿದೆ.